Hatutan.com, (19 Abríl 2022), Díli- Lider Karizmátiku no prezidente Partidu Kongresu Nasionál Rekonstrusaun Timor (CNRT, sigla portugés) Kay Rala Xanana Gusmão, apela ba sidadaun sira atu mantein  estabilidade no pás durante tempu eleisaun no hotu-hotu tenke hakaruk ho respeita  ba desizaun povu nian iha rezultadu eleisaun prezidensiál segunda volta ne’e.

Lee Mós : Lú Olo: Lakon ka Manán Povu Mak Julga

Prezidente partidu CNRT, Kay Rala Xanana Gusmão. Foto/Hatutan.com

Xanana Gusmão hateten, nu’udar votante ida-idak iha esperansa katak nia kandidatu José Manuel Ramos-Horta ho númeru sorteiu ida (1) sei manan. Tanba ne’e, bainhira manan ona sei halo kompromisu iha juramentu pose nu’udár Prezidente Repúblika atu serbí de’it povu no nasaun tuir prinsípiu jerál no kompeténsia sira  ne’ebé tau iha Konstituisaun RDTL.

Nia subliña, estadu direitu demokrátiku ne’e katak demokrasia iha povu nia-liman tenke respeita no kontribui. Nune’e, Xanana husu  ba povu tomak, ba grupu hotu-hotu, labele provoka situasaun, tinan 20 ukun an tenke hatudu katak Timor-Leste iha ona maturidade polítika.

Iha situasaun oin-oin de’it, situasaun difisil, situasaun fasil mais iha situasaun hanesan ne’e labele hatudu imaturidade hodi ameasa tamba iha primeira volta akontese ameasa iha fatin balun hanesan Becora no Fomento II, Díli.

“Husu ba Polisia Nasionál Timor Leste (PNTL) no FALINTIL-Forsa Defeza Timor Leste (F-FDTL) no husu ba instituisaun hotu-hotu atu apela ba pás atu labele akontese saida mak lad’iak ba ita nia rain,” Xanana Gusmão hateten hafoin ezerse nia direitu síviku iha sentru votasaun, Sede Suku Balibar, Tersa (19/04/2022).

Lider karizmátiku ne’e afirma Timor-Leste enfrenta hela krize boot ida iha leten agora labele provoka tan situasaun hodi hatún krize boot husi leten ne’e mai fali povu nia-leet hodi povu mak terus nafatin.

“Ida ne’e mak há’u halo apelu boot ida ba organizasaun hotu-hotu no grupu oin-oin ne’ebé iha atu hakmatek respeita povu nia desizaun,” Xanana hateten.

Xanana halo mós apelu ba povu hotu atu hakmatek, labele provoka malu hodi hein ho esperansa povu nia desizaun, lakon ka manan povu mak deside liu husi votu.

 Jornalista: Vito Salvador