Hatutan.com, (20 Abríl 2022), Díli—Misaun Observasaun Eleitorál (MOE), Comunidade dos Países de Língua Portuguesa (CPLP), konsidera aktu eleitorál iha Timor-Leste (TL) la’o tuir prinsípiu demokrasia no direitu polítiku ne’ebé konsagra ona iha konstituisaun Repúblika Demokrátiku Timor Leste (KRDTL).

Xefe MOE CPLP ne’ebé nu’udár embaixadór Itinerante Repúblika Ángola, José Guerreiro Alves Primo hala’o konferénsia imprensa, iha Novo Turismo, Kuarta (20/04/2020).

Durante iha Timor-Leste MOE CPLP integra membru observadór hamutuk na’in-11 inklui diplomata no tékniku sira ne’ebé indika hosi sekretariadu ezekutivu organizasaun nian.

Lee mós: Pilpres Timor Leste, Ramos-Horta Tetap Unggul

Hosi ekipa membru ne’ebé iha MOE CPLP nia membru sira fahe ba ekipa lima hanesan munisípiu Díli ekipa rua, iha ne’ebé ekipa ida destaka ba iha munisípiu Baucau, ida iha munisípiu Ermera no ekipa ida  seluk destaka ba iha Manatuto.

Hosi ekipa ne’ebé MOE CPLP destaka ba ekipa ne’e observa direta prosesu votasaun iha sentru votasaun hamutuk 74.

MOE CPLP mós servisu hamutuk ho ekipa observadór hosi g7+ nu’udár observadór asosiadu hosi CPLP hodi apoiu halo observasaun ba sentru votasaun hamutuk 10 iha munisipiu Liquiçá.

Totál sentru votasaun ne’ebé MOE CPLP halo observasaun direta hamutuk sentru 84 ne’ebé koresponde eleitór hamutuk 158.722 rejistradus no ekivale ba pursentu 18% númeru eleitór ne’ebé rejista iha eleisaun Prezidensiál segunda volta.

Xefe MOE CPLP ne’ebé nu’udár embaixadór Itinerante Repúblika Ángola, José Guerreiro Alves Primo.

Iha observasaun ne’ebé MOE CPLP hala’o hatudu katak sentru votasaun sira ne’ebé identifikadu hosi órgaun eleitorál sira asesível no iha kondisaun nesesáriu ba funsionamentu no kumpri oráriu abertura no enseramentu.

Prosesu votasaun iha forma organizadu no iha ambiente trankuilidade  no iha ofisiais eleitór ne’ebé aseguraduho efisiénsia no neutralidade ba prosedimentu legál sira ne’ebé previstu no iha esklaresimentu ba eleitór sira. Rejista mós prezensa hosi delegadu sira hosi kandidatu na’in-rua.

“Ami haree katak iha prosesu tomak no aktu eleitorál ne’ebé iha tuir duni prinsípiu demokrátiku no direitu politiku ne’ebé konsagra iha K-RDTL no la’o tuir mós norma eleitorál sira ne’ebé vigora iha  Timor Leste,” Xefe MOE CPLP ne’ebé nu’udár embaixadór Itinerante Repúblika Ángola, José Guerreiro Alves Primo hateten liu hosi konferénsia imprensa, iha Novo Tirusmo, Kuarta (20/04/2020).

MOE CPLP mós konsidera katak partisipasaun sidadaun sira nian iha vida politika nasaun nian tenke hetan asegurasaun liu hosi direitu ba vota no respeita ba igualidade sufrájiu universál no liberdade de espresaun no asosiasaun.

MOE CPLP kongratula autoridade Timor Leste ba realizasaun eleisaun ida kredível, livre no transparante, no sai nu’udár baze ba partisipasaun politika no ezersísiu sidadania no sai mós reforsu ba demokrasia.

MOE CPLP  mos kongratula kompeténsia ne’ebé destaka ba órgaun eleitorál hanesan CNE no STAE hodi organiza no realiza aktu  eleitorál nian iha ko testu pandemia ne’ebé rekere implementasaun medida suplementares rezilénsia ba Covid-19.

MOE CPLP saúda povu RDTL ba forma ezemplár hodi ezerse direitu votu, kontribui ba reforsa demokrasia no Estadu direitu demokrátiku iha país ne’e hodi hametin koezaun internasionál no afirmasaun CPLP nian.

Jornalista: Vito Salvadór