Hatutan.com, (22 Abríl 2022) Díli—Tribunál Distritál Dili (TDD), Sesta (22/04/2022), liu hosi juiz António Helder do Carmo kontinua halo julgamentu bá prosesu sivíl kona-bá asaun rekursu administrativa ne’ebé hatama hosi autór ka rekerente Bernadino Armando da Silva, kontra réu Estadu RDTL liu hosi Komisaun Funsaun Públika (KFP) hodi husu anula desizaun KFP kona-bá demisaun rekerente nian nu’udár Diretór Aprovizionamentu Ministériu Saúde (MS).

Ministra Saúde, Odete Maria de Freitas Belo. Foto/gov.tl

Iha julgamentu kontinuasaun ne’e, Tribunál bolu atuál Ministra Saúde, Odete Maria Freitas Belo hodi fó ninia depoitmentu kona-bá demisaun refere.

Odete rekoñese nia parte mak hatama pedidu ba KFP hodi toma desizaun ba autór tanba durante nia asumi responsabilidade hanesan Ministra Saúde, autór inkomprimentu ba ninia superiór, la konsege implementa servisu iha situasaun emerjénsia iha tempu Covid-19 liu-liu labele halo justifikasaun ba konstrusaun fatin izolamentu iha Tasi Tolu, tanba momentu ne’ebá kompañia ezize atu halo pagamentu, maske konstrusaun ne’e ajudikasaun direta maibé diresaun aprovizionamentu MS tenki funsiona hodi haree konstrusaun ne’e.

“Hanesan MS ha’u mós hala’o servisu autór nian nu’udár DJ aprovizionamentu, liu-liu iha situasaun Covid-19 ba konstrusaun fatin izolamentu Tasi Tolu, Pagamentu ba otél ne’ebé aluga inklui hahan no seguransa ne’ebé presiza justifikasaun no asinatura autór molok halo pagamentu maibé realidade ida  la akontese maske ha’u rasik hatún despaixu urjente ba autór atu halo justifikasaun no asinatura ba prosesu pagamentu maibé autór la kumpri ha’u nia despaixu ne’e,” Odete Belo hateten iha sala audiénsia.

Advertisement

Tuir Odete, maski autór asumi responsabilidade ne’e liu hosi teste ne’ebé KFP loke, maibé bazeia ba faktu ne’ebé iha autór la intende kona-bá servisu aprovizionamentu, autór tauk foti desizaun no autór lakohi koopera hodi foti desizaun ruma iha situasaun emerjénsia.

Molok sasin hatama pedidu ba KFP hodi toma desizaun ba autór nia hahalok, sasin halo uluk xamada tantu eskrita no verbál ba autór maibé laiha mudansa no autór laiha vontade atu aprende.

Bazeia ba autór nia inkomprimentu hirak ne’e, maka sasin deside hatama pedidu ba KFP hodi foti desizisaun ba autór nia hahalok.

Hafoin rona sasin, juiz prezide marka hikas audiénsia ba loron seluk no kontinua fó prazu loron 10 ba sasin hodi hatama dokumentu kona-bá karta xamada ne’ebé sasin hasai ona ba autór molok Tribunál foti desizaun.

Audiénsia julgamentu prezide hosi juiz singulár António Helder do Carmo no autór hetan asisténsia hosi mandatáriu Fernando Carvalho no Réu hetan mandatáriu hosi Pascasio Rosa Alves.

Advertisement

Jornalista: Carmelita Isaac