Hatutan.com, (02 Marsu 2023), Ermera—Sentru Saúde Atsabe, Munisípiu Ermera presiza tebes médiku atu hala’o atendimentu bá pasiente tanba oras-ne’e daudaun iha de’it médiku na’in lima ne’ebé kobre bá suku 12.

Médiku Saturnino Gomes hala’o hela konsulta ba pasiente iha serbisu fatin Sentru Saúde Atsabe, Kinta (09/02/2023). Foto/Cipriano Colo.

Médiku Saturnino Gomes husu Ministériu Saúde liu hosi parte rekursu umanu atu bele halo rekrutamentu bá médiku nune’e bele fó apoiu iha área rurál.

Lee Mós: Edifísiu Sentru Saúde Atsabe Ameasadu Hosi Rai-Halai

“Ha’u serbisu tinan sanulu ona iha Sentru Saúde Atsabe, difikuldade boot liu ne’ebé ami hasoru maka  falta rekursu umanu,” Saturnino Gomes hateten ba Hatutan.com iha serbisu fatin Atsabe, Kinta (09/02/2023).

Advertisement

Médiku ne’e reforsa katak, haree ba balansu entre populasaun iha postu administrativu ne’e kuaze 21.000 abitantes, maibé rekursu umanu sura hotu ho postu saúde sira iha na’in 52, hosi númeru ne’e permanente foin mak ema na’in 30.

“Tanba ne’e mak ko’alia kona-bá ratio entre pessoál saúde ho populasaun la sufisiente. Ami iha suku 12 iha postu saúde hitu ne’ebé mak agora foin prienxe de’it postu saúde tolu no postu saúde haat seluk médiku laiha,” nia hateten.

Iha postu sira mós maioria fatin ladun sufisiente tanba dalaruma médiku ka pessoál saúde sira ba iha ne’ebé, mesak uma antigu ne’ebé laiha ona kondisaun maibé tenke utiliza duni ba atendimentu, no fatin atu hela mak laiha duni.

Médiku sira iha Sentru Saúde Atsabe hetan vizita hosi Pároku Parókia São José Operário Atsabe, Kinta (09/02/2023). Foto/Cipriano Colo.

Saturnino Gomes mós husu bá Governu liu hosi Ministériu Saúde atu investe hodi kria kondisaun hela fatin b’a médiku sira iha sentru saúde Atsabe inklui postu saúde sira nune’e médiku sira bele hela atu halo atendimentu besik liu povu ho efetivu.

“Iha Sentru Saúde Atsabe, maioria pessoál saúde sira hela dook mak mai halo servisu iha ne’e. Tanba ne’e atu garantia serbisu di’ak liu ne’e, bainhira Governu halo hela fatin ba pessoál saúde sira bele hela. Sira bele hela kedan iha ne’e no halo atendimentu hahú hosi Segunda to’o Sesta. Maibé ita ko’alia kona-bá buat sira ne’e, mas ita haree de’it realidade katak, fatin atu halo servisu de’it mós la sufisiente ona sa tan fatin atu hela,” nia kestiona.

Nia fó ezemplu katak, médiku balun hela iha uma rasik, iha suku mak mai servisu iha Sentru Saúde ne’ebé dook tebes. Lorloron tenke ba mai ho motorizada durante oras ida-resin. Ne’e mós difikuldade boot ida ba médiku sira.

Advertisement

Hatutan.com konfirma ona ho Ministra Saúde (MS), Odete Maria Freitas Belo kona-bá preokupasaun ne’e, no minitra rasik promete sei halo rekrutamentu bá pessoál saúde iha tinan ne’e, hodi koloka bá munisípiu sira ne’ebé falta pessoál saúde liuliu prioridade ba munisípiu lima.

Ministra Saúde (MS) Maria Odete Freitas Belo.

“Husu tena ami nia rekursu umanu atu bele haree situasaun sira liga ho rekursu umanu liu-liu liga ho pessoál saúde sira iha Sentru Saúde sira iha área remotas no Postu Saúde sira,”

Ministériu Saúde oras-ne’e iha planu atu halo rekrutamentu hodi aumenta pessoál saúde bá munisípiu lima iha tinan ne’e inklui Sentru Saúde Atsabe munisípiu Ermera ne’ebé presiza tebes pessoál saúde.

“Ministériu Saúde iha ona planu atu tinan ida-ne’e aumenta médiku, Infermeiru no parteira ba iha sentru saúde sira ne’ebé falta pessoál saúde. Tanba ne’e sei halo rekrutamentu hodi fó kontratu bá pessoál saúde sira no importante maka husu sira  nia disponibilidade atu ba iha área rurál,” nia hateten ba jornalista Hatutan.com.

Postu Administrativu Atsabe iha munisípiu Ermera, ho nia populasaun 17.264 (2010) ho área 167,90 km².

Postu administrativu ne’e ho nia suku 12 mak hanesan Atara, Baboi Kraik, Baboi Leten, Batu Mano, Lasaun, Laklo, Laubonu, Leimea Leten, Malabe, Obolu, Parami no Tiarlelo ho aldeia 59.

Advertisement

Lee Mós: Motorista Sira “Halerik” Ho Kondisaun Estrada Gleno-Letefoho-Atsabe

Jornalista: Cipriano Colo/Vito Salvadór