Connect with us
Pakote Ahi

Ermera

Edifísiu Sentru Saúde Atsabe Ameasadu Hosi Rai-Halai

Published

on

Hatutan.com, (27 Fevereiru 2023), Ermera—Oras-ne’e daudaun, edifísiu Sentru Saúde Atsabe, Munisípiu Ermera, ameasadu atu monu tanba rai-halai.

Oras-ne’e daudaun, médiku sira iha Sentru Saúde Atsabe utiliza uma oan ida ho medida kiik tebes hodi hala’o atendimentu ba programa lima mak hanesan programa TBC, Malária, HIV-SIDA, Saúde na Família ho finansas, maibé uma oan ne’e mós iha ameasa nia laran atu monu tanba rai-halai (09/02/2023). Foto/Cipriano Colo.

Tuir observasaun Hatutan.com iha terrenu haree katak, edifísiu ne’e iha laletek ida ne’ebé ninia rai ladún rezistente, tanba hela metru rua de’it ona edifísiu ne’e atu monu no rai monu kuaze metru 15 ba parte lorosa’e nian.

Lee Mós: Motorista Sira “Halerik” Ho Kondisaun Estrada Gleno-Letefoho-Atsabe

Médiku Saturnino Gomes ne’ebé serbisu tinan 10 iha sentru saúde ne’e esplika, problema boot ida iha  sentru saúde ne’e maka konstrusaun infraestrutura ne’ebé ladún di’ak atu bele hala’o servisu ho kualidade.

Advertisement

“Agora rai-halai atu lori tán uma oan ne’e, ninia sorin atu ba ona, inklui edifísiu Sentru Saúde rasik mós iha ameasa nia laran tanba rai halai besik metru rua de’it ona. Ida-ne’e halo ita trauma tanba fatin atu servisu la seguru,” médiku Saturnino Gomes hateten iha Sentru Saúde Atsabe, (09/02/2023).

Oras-ne’e daudaun, médiku sira utiliza uma oan ho medida kiik tebes hodi hala’o atendimentu ba programa lima.

“Ami enfrenta hela rai halai besik atu sobu ami nia fatin oan ne’e. Agora daudaun ami uza hela uma oan ida-ne’e ba programa TBC, Malária, HIV-SIDA, Saúde na Família ho finansas. Maibé ita haree rasik uma oan ne’e nia sorin besik atu monu ona tanba rai halai,” nia hateten.

Médiku sira enfreta problema kona-bá fatin tanba agora programa mós barak no programa sira ne’e rasik mai ho nia ekipamentu, nune’e laiha fatin atu bele tau ekipamentu sira ne’e.

Buat sira ne’e dalaruma implika médiku sira nia servisu lorloron, tanba tuir loloos sasan sira-ne’e tenke tau iha fatin ne’ebé serbisu bá, maibé dalaruma tau fali iha fatin seluk, nune’e bainhira atu halo atendimentu tenke lakon tempu hodi ba foti fali iha fatin seluk.

Advertisement

Médiku Saturnino Gomes. Foto/Cipriano Colo.

Iha postu saúde sira mós maioria fatin la sufisiente tanba pessoál saúde sira ba iha ne’ebá utiliza uma antigu hotu ne’ebé uza loos de’it bá halo atendimentu, no fatin atu hela mak laiha duni.

Nune’e mós iha Sentru Saúde Atsabe, maioria pessoál saúde sira hela dook mak mai hala’o servisu iha ne’e.

“Tanba ne’e atu garantia serbisu di’ak liu ne’e, bainhira Governu halo ona hela fatin ba pessoál saúde sira bele hela. Sira bele hela kedan iha ne’e no halo atendimentu hahú hosi Segunda to’o Sesta. Agora ita ko’alia kona-bá buat sira ne’e, mas ita haree de’it realidade katak, fatin atu halo servisu de’it mós la sufisiente ona sa tán fatin atu hela,” nia haktuir.

Nia fó ezemplu katak, médiku balun hela iha uma rasik iha suku mak mai servisu iha Sentru Saúde ne’ebé dook tebes. Lorloron tenke ba mai ho motorizada durante oras ida-resin.

Kona-bá edifísiu Semtru Saúde nian, oras-ne’e daudaun iha kuartu ida de’it mak utiliza hodi hala’o konsulta jerál ba pasiente sira loroloron nian no úniku inan isin-rua sira mak iha fatin ketak.

Edifísiu Sentru Saúde ne’e iha sala bá loket, sala konsulta jerál, farmásia, Xefe Sentru Saúde nia fatin, sala emerjénsia no sala bá dentista nian.

Advertisement

Loron ida halo atendimentu mínimu liu bá pasiente na’in 30 no másimu ne’e na’in 50-resin no iha loron Segunda ho Tersa sempre atende ema to’o 200.

“Pessoál saúde iha sentru ne’e na’in 32 inklui cleaner. Maioria hela dook. Tanba ne’e husu kria kondisaun nune’e sira bele hela metin iha ne’e atu bele hala’o atendimentu ho efetivu liu tán,” nia husu tán.

Edifísiu Sentru Saúde Atsabe ne’ebé ameasadu atu monu tanba rai halai (09/02/2023). Foto/Cipriano Colo.

Maioria pessoál saúde sira dala barak ladún pontuál tanba hela dook liu ho nia dalan aat, nune’e  dalaruma meiudia atu ba almosu sai hosi ne’e kuaze oras ida-resin, ba han tiha pois mai fali besik tuku haat ona, entaun serbisu oras balun de’it tenke fila fali ona bá uma.

Administradór Atsabe, Contancio da Silva konsidera kondisaun rai halai ne’e tuir loloos la grave tanba rai oitoan mak dada-an tanba fatin ne’e metin hela.

“Maibé Atsabe ne’e presiza tebes Sentru Saúde ida ne’ebé bele akumula fatin ne’e tanba ida agora daudaun ne’e kloot tebes no labele atende ema barak.  Antes ne’e ami mós hato’o ona kestaun ne’e ba Ministériu Saúde liu hosi Vise-Ministru Saúde Bonifácio Maucoli dos Reis no mos Ministra Saúde rasik mai hala’o vizita iha ne’e, ami hato’o ona situasaun ne’e,” nia hateten.

Iha altura ne’ebá, Ministra rasik hatan katak ne’e prioridade atu halo intervensaun tanba ne’e mak hein de’it planu Ministériu nian bainhira mak atu halo intervensaun.

Advertisement

Hatán bá preokupasaun ne’e, Ministra Saúde Ministra Saúde, Odete Maria Freitas Belo hateten Ministériu halo ona levantamentu no sei haree mós ho orsamentu ne’ebé Ministériu Saúde iha.

“Iha tinan kotuk Ministériu Saúde halo ona levantamentu ba edifísiu Sentru Saúde Atsabe, maibé tanba iha problema ho orsamentu, nune’e iha tinan ida-ne’e Ministériu Saúde garante sei tau kondisaun ba infraestrutura ho orsamentu 2023. MS garante atu tinan ida-ne’e sei bele hadi’a kondisaun infraestrutura ne’ebé sentru saúde Atsabe enfrenta,” nia hateten.

Postu Administrativu Atsabe iha munisípiu Ermera, ho nia populasaun 17.264 (2010) ho área 167,90 km².

Postu administrativu ne’e ho nia suku 12 mak hanesan Atara, Baboi Kraik, Baboi Leten, Batu Mano, Lasaun, Laklo, Laubonu, Leimea Leten, Malabe, Obolu, Parami  no Tiarlelo ho aldeia 59.

Jornalista: Cipriano Colo

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Ermera

“Tara Bandu” bá Redusaun Lia Mate-Lia Moris Iha Ermera Sei Implementa ho Rigór

Published

on

Hatutan.com, (30 Dezembru 2023), Ermera—Prezidente Autoridade Munisípiu (PAM) Ermera, Eusebio Salsinha akomapaña husi autoridade Igreja, Governu, Polísia Nasionál Timor Leste (PNTL), veteranus no Autoridade lokál, lansa regulamentu tara bandu redusaun lia mate-lia moris hodi lori esperansa no futuru ne’ebé próspero bá povu Ermera.

(more…)

Kontinua Le'e

Ermera

Servisu Sex Komersiál, Governu Sei Kontrola De’it Autór Sira

Published

on

Hatutan.com, (04 Dezembru 2023), Ermera— Governu liu hosi Ministériu Saúde (MS) esforsu hela atu halo de’it kontrolu bá autór sira ne’ebé involve iha Servisu Sex Komersiál iha Timor-Leste (TL).

(more…)

Kontinua Le'e

Ermera

Autoridade Lokál Ermera Ezije PN-Governu Regula Lia-Mate no Lia-Moris

Published

on

Hatutan.com, (04 Novembru 2023), Ermera—Autoridade lokál no mós estudante sira hosi munisípiu Ermera husu no ezije bá Parlamentu Nasionál (PN) ho Governu atu interven lalais hodi halo Regulamentu no Dekretu Governu nian ou prodús Lei ruma atu bele regula lia-mate no lia-moris tanba fó impaktu negativu boot liuliu trava dezenvolvimentu área hotu-hotu iha munisípiu ne’e.

(more…)

Kontinua Le'e

Trending