Hatutan.com, (22 Abríl 2022), Díli—Empreza Red Star lansa kartaun eletrónika ho naran Grand Dragon Autority App (GDAA) ba master ajénsia inklui membru sira Lotaria Grand Dragon, hodi fasilita no ajuda autoridade Inspesaun Geral do Jogu (IGJ), bele halo kontrolu ba atividade empreza Red Star nian hodi haforsa liután kumprimentu ba regulamentu jogu.

Inspetór IGJ, Domingos da Costa Guterres.

Grand Dragon Autority App (GDAA) sei tulun servisu sira autoridade Inspesaun Geral do Jogu (IGJ), atu bele halo kontrolu di’ak liután ba empreza nia servisu no servisu ajénsia sira nian iha terrenu, atu labele mosu mál prátika ka manobra ka jogu foer ne’ebé lori impaktu negativu ba reseita Estadu no hamosu esplozaun ba kliente sira.

Lee mós: Governu Autoriza Loke Jogu Bola Guling Iha Dili Laran

Parte Ministériu Turizmu Komérsiu Indústria (MTKI) liu hosi Inspesaun Jerál Jogu marka prezensa iha  lansamentu ne’ebé mak empreza Lotaria Grand Dragon halo, hodi moderniza jogu lotaria dijitál ne’ebé iha vantajen boot no fásil kontrola autoridade sira nian no grante direitu kliente nian ne’ebé sei asegura rendimentu sira no kontribui tasa ba Estadu ne’ebé di’ak liu.

IGJ sei fó loron 15 ba empreza hodi submete sira nia pedidu ba aprova kartaun elektróniku ne’ebé empreza sei distribui ba ajénsia sira iha teritóriu nasionál hodi asegura no garante katak atividade ne’ebé Lotaria Grand Dragon halo ne’e iha legalidade no koñesimentu hosi autoridade kompetente.

“Ho dijitalizasaun ida-ne’e bele fasilita IGJ ho autoridade sira seluk atu bele halo kontrolu ida mais adekuadu no bele minimiza jogu ilísitu ka jogu illegál iha Timor laran tomak,” Inspetór IGJ, Domingos da Costa Guterres hateten hafoin partisipa iha serimónia lansamentu GDAA ba ajensia Lotaria Grand Dragon, iha Praia dos Coqueiros, Sesta (22/04/2022).

MTKI liu hosi IGJ, iha ona planu atu molok tinan ne’e remata sei halo esforsu hotu-hotu hodi dijitaliza jogu lotaria hotu iha Timor-Leste hodi garante fornesimentu servisu ida di’ak ba kliente sira no garante kontrolu hodi asegura tasa ba Estadu liu hosi meiu legál ne’ebé Governu prevee.

Iha trimestre dahuluk tinan 2022, Lotaria sira ne’ebé rejista iha IGJ hanesan Bed Ford, Amizade, Timor Pools, Kiss, Rudal no Lotaria Grand Dragon kontribui ona tasa ba Estadu hamutuk $700.000-resin.

CEO Lotaria Grand Drago, Datuk Harry NG.

Iha fatin hanesan CEO Lotaria Grand Drago, Datuk Harry NG hateten, lansamentu kartaun eletróniku kida ne’e nu’udár meiu legál ida ne’ebé empreza Red Star iha hodi fornese servisu ho kualidade no garante labele mosu jogu illegál ne’ebé afeita ba rendimentu Estadu nian.

“Lansamentu ne’e atu tulun governu liu husi IGJ no autoridade seguransa sira halo kontrolu di’ak liután ba atividade sira Lotaria Grand Dragon nian,” Datuk Harry NG hateten.

Lotaria Grand Dragon iha konfiansa katak ho servisu dijitalizasaun ne’ebé iha sei tulun tebes Governu atu iha kontrolu ida diak liu ho rigór no bele kontribui ba hasa’e rendimentu Estadu Timor Leste nian.

Jornalista: Vito Salvadór