Hatutan.com (25 Abril 2022), Díli—Tribunál Distritál Díli (TDD), iha Segunda 25 fulan ne’e, liu husi juiz kolektivu José Gonçalves, Argentino Nunes, Alvaro Maria Freitas kontinua hala’o julgamentu ba krime omesídiu agravadu, ne’ebé deskonfia involve arguidu na’in 18, tanba oho no so’e ona vítima Hendrique Soares iha arredór edifísiu Universidade da Paz (UNPAZ).

Sala Julgamentu TDD. Foto/Hatutan.com.

Arguidu na’in 18 mak hanesan Francisco Palmira, Feliciano Tilman, Dália Imaculada da Cruz, Francisco de Carvalho, Quintino Bianco, Santiago Pereira, José Lúcia, João Paulo, Alfredo Verato, Lucas Soares, João Soares, Joana da Silva, Deonísio Pereira, Leonito da Silva, Zeferino Carvalho, Germano Paulo, Natalino Ivo no João Câncio.

Lee Mós: Omisídiu iha UNPAZ, Arguidu SP La hatene Sé Mak “Oho” Vítima

Iha audiénsia kontinuasaun ne’e, arguidu João Paulo nu’udár vítima nia tiu deklara ba Tribunál, nia parte laiha koñesimentu kona-bá vítima nia mate, tanba momentu ne’ebá arguidu sei iha servisu fatin.

“Ha’u laiha koñesimentu kona-bá ha’u nia subriñu nia mate, tanba momentu so’e osan ha’u la ba tanba ha’u iha hela servisu fatin no fila hosi servisu fatin ha’u hadi’a motór iha ha’u nia uma kotuk to’o kalan tanba kolen entaun ha’u mós deskansa. Iha dadersan de’it mak ha’u rona ema tanis iha vitima nia uma no ha’u hader tesik ba dehan vitima mate. Tanba ne’e ha’u mós halo servisu iha mate uma,” arguidu deklara.

Depois de halo servisu oitoan iha vítima nia uma, arguidu fila ba uma hodi prepara ba servisu maske liu hosi dalan UNPAZ, maibé arguidu la tama ba haree vítima nia mate-isin.

Maski arguidu ne’e nia deklarasaun hanesan mós arguidu na’in-hitu seluk ne’ebé antes ne’e deklara ona ba Tribunál katak sira laiha koñesimentu kona-bá matebian nia mate, maibé Tribunál tenta halo konfirmasaun ho arguidu hodi hetan informasaun balun kona-bá vitima nia mate maibé arguidu sira nafatin laiha koñesimentu.

Tanba ne’e, Tribunál esplika ba arguidu sira katak rezultadu autopsia hatudu katak vítima la’ós monu tún hosi andar UNPAZ, maibé iha kanek barak iha isin lolon ne’ebé deskonfia katak vítima la’ós monu tún maibé ema mak oho no so’e iha arredór UNPAZ nian.

Hafoin rona arguidu João Paulo, Tribunál adi’a hikas julgamentu ba loron seluk hodi kontinua rona arguidu sira seluk.

Arguidu na’in 18, Ministériu Públiku (MP) liu hosi Prokuradór Matias Soares akuza ho krime omesídiu agravadu ne’ebé previstu iha artigu 139 hosi kódigu penál TL, relasiona ho kazu omisídiu ne’ebé akontese iha UNPAZ iha loron 20 fulan Juñu 2021, ne’ebé hamate ona Hendrique Soares.

Audiénsia julgamentu iha Segunda 25 tinan ne’e, akompaña mós hosi familia arguidu sira nian no Advogada Privada Adelina Lobo, Virna Carvalho no Manuel Tilman.

Jornalista: Carmelita Isaac