Hatutan.com, (23 Abríl 2022), Díli– Komisaun Anti-Korrupsaun (CAC, sigla portugés) konstitui ona arguidu na’in-rua liu husi prosesu inkéritu ne’ebé hala’o ona liu husi depoimentu sasin no dokumentu sira ba kazu krime abuzu podér no partisipasaun ekonomia iha negósiu ne’ebé akontese iha Rejiaun Administrativu Espesiál Oé-Cusse Ambeno (RAEOA).

Lee Mós : CAC Kontinua Investiga Kazu Abuzu Podér iha RAEOA

Ekipa Investigadór CAC hala’o investigasaun iha rezidénsia MN iha Sikluli, RAEOA.Foto/Dok.CAC.

Iha prosesu inkéritu no foti depoimentu husi sasin na’in-10 resin, inklui bazeia bá arguidu nia deklarasaun hamosu tan naran no informasaun foun tanba ne’e CAC presiza rona tan ema na’in-rua.

“Investigasaun kuaze termina ona, tanba konstitui ona arguidu na’in-rua, maibé seidauk finaliza tanba husi deklarasaun arguidu hamosu tan naran foun no informasaun foun liu-liu kona-bá provas foun ne’ebé foin mosu, tanba ne’e CAC sei bolu tan ema na’in-rua ne’ebé automatikamente hola parte iha prosesu ne’e liu-liu funsionáriu ZEESM,” Diretór Jerál Investigasaun CAC, José Verdial  hateten bá Hatutan.com via telefónika, Sábadu (23/4/2022).

CAC mós koordena ona ho administrasaun ZEEMS hodi fornese dokumentu ne’ebé arguidu sira temi no bá CAC sei iha tempu loron 25 hodi termina prosesu investigasaun no sei remesa rezultadu bá Ministériu Públiku (MP) hodi haree no halo akuzasaun. Tanba ne’e, bainhira provas sufisiente atu halo akuzasaun maka sei konklui kedas, maibé bainhira provas seidauk sufisiente maka sei delega fali ba CAC hodi kontinua investiga.

Iha loron 18 fulan-Janeiru 2022, Ekipa Investigadór CAC nian lidera hosi Diretór Investigasaun Kriminál (UIK), Emílio Quintas, akompaña hosi Polísia Nasionál Servisu Investigasaun Kriminál (PNSIK) ezekuta no asegura mandadu Tribunál Rejiaun Administrativa Espesiál Oé-Cusse Ambeno (RAEOA) ho númeru NUC 0057/21.PDOEC loron 17/12/2021.

Mandadu ne’e hasai husi juis Yudi Pamungkas fó podér ba investigadór CAC hodi halo operasaun buska no apreensaun ba suspeitu diretór emprezáriu na’in-ida (1) hanesan mós sobriñu hosi suspeitu seluk nudár Jerente Seniór RAEOA/ZEESM ka Adjuntu Prezidente Autoridade ho inisiál MN ho ninia espoza (co-autór ne’ebé posibilidade bele sai suspeitu), tanba deskonfia envolve iha kazu krime korrupsaun.

Lee Mós : CAC Halo Buska Apreensaun ba Emprezáriu no Adjuntu Prezidente Autoridade RAEOA

Mandadu ba buska iha domisiliáriu no prende sasán ne’e, juis haruka no fó orden atu halo buska iha domisiliáriu ho posibilidade ba prende sasán ne’ebé mak iha ligasaun ho faktu hirak ne’ebé investiga ona, tuir dispozisaun iha art 37 no nú 2, hosi KRTL, iha artigu 226 no 1, al. c) artigu 108 no 1 artigu 170, hotu-hotu hosi KPP ba suspeitu ninian hela fatin.

Bá kumprimentu efetivu bá mandadu ida-ne’e, iha autorizasaun ba asesu iha dependénsia hotu-hotu, inklui kofre, fatin hirak rai sasán nian, veíkulu hirak ne’ebé uza hosi suspeitu, bele fera odamatan, hakat sai hosi moru no neutraliza animál sira, se presija duni, ho observánsia ba dispozisaun iha artigu 169 no 170 hosi KPPTL.

Iha operasaun buska domisiliáriu no apreensaun ne’e, investigadór CAC halibur dokumentu lubun boot; konta bankária, osan cash ho montante boot, dokumentu kompañia nian, telefone no dokumentu sobre projetu eletrifikasaun, no projetu balun iha RAEOA/ZEEMS ne’ebé suspeitu ho ninian espoza nian kompañia manán nu’udár evidénsia no objetivu krime.

Kazu ne’e rasik hetan delegasaun kompeténsia hosi Prokuradór Distritál Oé-Cusse hodi fó delegasaun ba investigadór CAC tuir podér lei hodi halo prosesu investigasaun ho kuidadozu hanesan rona sasin sira, halibur dokumentu no halo survelénsia ba iha intervenenti prosesuál liu-liu arguidu nian bens sira.

Jornalista: Carmelita Isaac