Hatutan.com, (28 Abríl 2022), Díli- Atu asegura estabilidade presu kombustivel nian no evita konsekuénsia prejudisiál sira bá ekonomia no bá konsumidór sira, Governu deside halo intervensaun iha merkadu kombustivel sira liu husi atribuisaun subsídiu.

Lee Mós: Benefisiáriu Sei Lori Voucher Enxe Kombustível Subsídiu iha Postu Abastesimentu 59

Atividade diária iha Realistic Fuel. Foto/Hatutan.com.

“Medida ida-ne’e sei benefisia setor atividade sira ne’ebé atinjidu liu bá folin kombustivel nia aumentu, hanesan operadór transporte rodoviáriu públiku nian sira, bá operadór transporte aéreu no marítimu nasionál sira, no bá kompradór sira kombustivel nian ne’ebé destina ba atividade agríkola no peska nian,” sita komunikadu imprensa husi Governu ne’ebé Hatutan.com asesu, Kinta (28/04/2022).

Subsídiu ne’e sei halo liuhusi vale deskontu nian (voucher) ida atu uza iha estasaun sira ne’ebé maka fa’an kombustivel ho ninia montante ne’ebé korrespondente bá 100% husi valór diferensa nian entre folin médiu gazolina ka gazóleu litru ida nian, iha fulan-dezembru t2021 no folin gazolina ka gazóleu litru ida nian iha data fó-sai voucher kombustivel nian, ho konsiderasaun bá tipu kombustivel nian no ninia karakterístika sira.

Advertisement

“Ne’e signifika katak, medida ida-ne’e sei permite katak benefisiáriu sira sei selu de’it valor médiu kombustivel nian husi fulan-Dezembru tinan kotuk,” sita komunikadu ne’e.

Ministériu Transporte no Komunikasaun (MTK), ne’ebé responsável bá pagamentu subsídiu ba operadór transporte rodoviário públiku nian sira, ba operadór transporte aéreu no marítimu nasionál sira, no Ministériu Agrikultura no Peska (MAP), ne’ebé responsável ba subsídio ba kompradór kombustivel ne’ebé maka destina ba atividade agríkola no peska nian, atu besik remata prosedimentu sira ne’ebé nesesáriu hodi lakleur tan bele hahú pagamentu subsidiu ne’e.

Ministru Transporte no Komunikasaun, José Agostinho da Silva, ba jornalista sira iha edifísiu MTK, Caicoli, Díli, Kinta ne’e, klarifika katak folin kombustivel sa’e kauza husi situasaun politika mundiál no funu entre  Ukránia no Rússia ne’ebé afeta too mai Timor Leste.

Ministru José Agostinho da Silva hateten, Governu iha ona politika no baze legal ne’ebé promulga husi Prezidente Repúblika hodi atribui subsídiu kombustivel ba transporte públiku sira ne’ebé hala’o operasaun ilegálmente iha Timor-Leste.

“Faze implementasaun ekipa konjunta husi ministériu tolu, hanesan MTK, Ministériu Ppetróleu no Rekursu Minerál (MPRM) no MAP sei finaliza hela diploma konjuntu ida no uainhira publika ona iha Jornal da Republica bele tama ba faze implementasaun,” José Agostinho da Silva hateten.

Advertisement

MTK sei prepara lista transporte públiku sira ne’ebé hetan lisensa operasionál husi ministériu bazeia bá baze dadus ne’ebé ministériu iha, atu nune’e, benefisiáriu sira ne’ebé hetan labele hamosu duvida.

“Mekanismu distribuisaun voucher bá benefisiáriu sira MTK garante sei simplifika sistema atu nune’e lais,” nia hateten.

Dekretu-Lei Nu. 18/2022, husi 19 fulan-Abril, ne’ebé estabelese subsídiu sira ne’e Governu aprova ona iha sorumutuk Konsellu Ministrus nian iha loron 13 fulan-Abríl  2022 no promulga husi Prezidente Repúblika iha loron 19 fulan-Abríl 2022.

Subsídiu kombustivel bá transporte públiku sira ne’ebé hala’o atividade operasaun iha área terrestre, aéreu no marítima, ne’e ho durasaun fulan-tolu no sei hahú iha fulan-Maiu no sei remata iha loron 31 fulan-Jullu, tinan ne’e.

Jornalista: Vito Salvador

Advertisement