Hatutan.com, (28 Abríl 2022) Díli-Programa Monitorizaun bá Sistema Judisiál (JSMP, sigla ingles) liu husi rezultadu monitorizasaun ne’ebé hala’o durante períodu tinan 2021 iha setór justisa, parlamentár no instituisaun Estadu sira hotu, hatudu katak progresu ne’ebé signifikativu. 

Lee Mós : JSMP Husu MP Nakloke Ba Públiku Kona-bá Kazu Set-top Box RTTL,E.P

JSMP lansa relatóriu tinan 2021 nian kona-bá servisu justisa ninian. Foto/Hatutan.com

JSMP apresia tebes tanba  Parlamentu Nasionál (PN) konsege aprova lei organizasaun judisiáriu, rejime jurídiku arbitrajen, ezbosu lei kona-bá protesaun labarik ne’ebé ajuda órgaun judisiáriu atu hala’o servisu ho di’ak liután. Maibé, tuir JSMP nia haree katak, iha pontu balu ne’ebé presiza konsidera no tenke servisu maka’as liután hodi luta kontra violénsia bazeia bá jéneru liu-liu feto no labarik feto sira tanba númeru violénsia bazeia ba jéneru sei atinje 415.

“Kazu violénsia  bazeia ba jéneru kontinua ás  signifika iha buat rua, primeiru komunidade komprende ona sira-nia  direitu atu asesu ba justisa, maibé iha pontu segundu ne’ebé presiza konsidera maka kontinua servisu maka’as kontra violénsia bazeia bá jéneru tanba ema barak nafatin sai vítima bá violénsia bazeia  bá jéneru, liu-liu feto no labarik feto,” Diretora JSMP,  Ana Paula Marçal bá jornalista sira hafoin halo lansamentu relatóriu observasaun jerál setor justisa iha El-Legendario, Kinta (28/04/2022).

Advertisement

JSMP mós rekomenda bá Governu liu-liu Parlamentu Nasionál (PN) hodi kria kondisaun ne’ebé foka liubá utilizasaun lingua ne’ebé maioria ho lian Portugés liu-liu kona-bá lei sira, inklui halo sosializasaun bá lei ne’ebé iha ligasaun iha setor justisa.

JSMP mós husu ba PN atu tau konsiderasaun bá rekomendasaun husi parte JSMP bainhira atu halo aprovasaun ba lei balun. Tanba ne’e, JSMP husu bá entidade hotu hodi servisu hamutuk halo sosializasaun bá ema hotu oinsá respeita ema nia direitu no devér nu’udár família uma laran.

Membru Parlamentu Nasionál husi Bankada Partidu Demokrátiku (PD) Adriano Nascimento, ne’ebé partisipa iha serimónia lansamentu relatóriu JSMP nian ne’e hateten, Komisaun A Parlamentu Nasionál  sempre simu no fó konsiderasaun hodi halo audiénsia hodi rona JSMP.

JSMP lansa relatóriu tinan 2021. Foto/Hatutan.com

“Ami simu JSMP nia rekomendasaun lubuk ida ne’ebé maka ohin aprezenta iha pontu lubuk ida, no kona-bá tradusaun lingua, maibé hakarak hateten katak lei ho portugés ida ne’e maka ita nia kondisaun,” Adriano do Nascimento hateten

PN iha ona planu hodi halo sosializasaun bá munisípiu sira hotu kona-bá lei hirak ne’ebé aprova ona, maibé tanba tempu tanba ne’e husu mós bá sosiedade sivíl  atu ajuda  halo sosializasaun.

Tuir dadus JMSP rejista ona kazu krime hamutuk 524 ne’ebé kompostu husi violénsia bazeia bá jéneru 415 no kazu sivíl hamutuk 20.

Advertisement

Jornalista: Carmelita Isaac