Hatutan.com, (29 Abríl 2022), Díli-Ekipa konjunta  kompostu hosi Comissão Anti Corrupção (CAC), Diresaun Nasionál Transporte no Terrestre (DNTT), Comissão da Função Pública (CFP), Patrimóniu Estadu ho Polísia Nasionál Timor-Leste (PNTL) Unidade Tránzitu Munisípiu Díli, Sesta (29/04/2022),  halo operasaun no konsege prende karreta Estadu ida iha área Surik-mas nian bainhira transporta hela oan sira atu bá eskola.

Lee Mós: Utiliza Veíkulu Estadu iha Loron Feriadu Komete Krime Pekulatu Ba Uzu

Ekipa konjunta prende Karreta Estadu ne’ebé tula oan ba eskola. Foto/Hatutan.com

Karreta estadu ne’e ho marka Pajero Sport, xapa matrikula 06.160 G, ekipa konjunta sira prende deskonfia utiliza hosi funsionáriu Instituto para a Defesa dos Direitos Humanos (INDDIC).

Hafoin halo apreensaun, ekipa sira foti kedan xave karreta nian, inklui transporta ona mós funsionáriu ne’e ba iha patrimóniu Estadu, Balide, Díli.   

Pontu Fokál CAC, Euclides Madeira esplika, operasaun ne’e haktuir bá iha rezolusaun Governu 130/2021 no dekretu Lei 21/2021, kona-bá subsídiu transporte ne’ebé maka aloka bá iha diresaun xefia sira, iha instituisaun sira Estadu nian.

Hahú hosi rezolusaun ida ne’e, la autoriza ka taka ona dalan funsionáriu sira ne’ebé assume kargu xefia iha ministériu hotu-hotu, atu lori karreta Estadu bá uma.  Maibé, funsionáriu ho kargu xefia sira, iha de’it maka karreta ba operasionál ninian. Ho ida ne’e maka, bainhira utiliza karreta la tuir rezolusaun ne’ebé mak Governu hasai, ekipa konjunta ne’ebé halo operasaun, sei foti medida no prosesa tuir lei.

“Operasaun bá iha karreta sira ne’ebé mak ita identifika, ita konsege foti de’it mak karreta ida iha Estatál,” pontu Fokál CAC, Euclides Madeira hateten bá jornalista sira hafoin operasaun konjunta iha Salaun enkontru, Diresaun Jerál Patrimóniu Estadu, Balide, Díli.

Alvu operasaun ne’ebé ekipa konjunta halo ne’e, bá ministériu rua; Ministériu Administrasaun Estatál (MAE), ho Ministériu Agrikultura no Peska (MAP), ho marka Hilux Fiu, xapa matrikula 06.337 G. Maibé, infelizmente, karreta ida hosi MAP ne’e, la konsege foti, tanba sei hala’o viajen servisu bá Munisipiu Manatuto.

“Ami la konsege foti. Maibé ami fó tiha ona xamada, depois  nia fila hosi Manatuto mai, oras ida nia diretamente mai entrega karreta ne’e bá iha patrimóniu Estadu, ne’e para atu kumpre rezolusaun Governu 130/2021 ne’ebá mak sai, liu-liu bá iha diresaun kargu no xefia sira iha funsaun públika, tantu direta kaindireta,” Euclides Madeira hateten tán.

Ekipa konjunta sira mós komunika ona ho diretór administrasaun no finansas iha MAP, atu aprezenta mós ho karta ruma kona-bá orden servisu nian, no mós dokumentu seluk ne’ebé mak suporta sira nia viajen hosi Dili bá Manatuto.

“Sé ida ne’e mak sira la konsege fornese, entaun, signifika katak, sira bá iha Manatuto ne’e, fora  autorizasaun, no laiha planu, entaun, ita tenke atu tuir lei ne’ebé mak iha,” dehan Euclides.

Identifika Karreta Estadu ida hosi DNTT

Ekipa Konjunta bá konfirma dokumentu karreta ida ne’ebé iha MAP deskunfia halo operasaun la tuir oras servisu. Foto/Hatutan.com

Durante operasaun, ekipa konjunta sira identifika mós karreta Estadu nian ida ne’ebé durante para de’it iha funsionáriu DNTT ida nia rezidénsia, iha área Surikmas, Suku Bairro Pité, Díli. Karreta ne’e ho kór mutin, tipu Land Cruiser Prado, xapa matrikula, 04.888 G. 

“Ida ne’e mós, oras ida, ekipa konjunta sei tau hotu iha relatóriu ida, depois maka hosi ne’ebá, ekipa haree hosi relatóriu ne’e, depois ekipa analiza. Seráke hahalok ida ne’ebé nia komete ne’e, prienxe duni elementu kona-bá krime ninian, liu-liu tanba nia utiliza ba iha oras ida haree, seráke karreta ne’e soke ne’e, nia halo hela servisu mak soke ka, ou fora de servisu mak nia ba soke kareta ne’e iha ne’ebá. Sé nia fora de oras servisu, konserteza tenke ita prosesu,” Euclides afirma.

Prosesu normál ba karreta sira ne’ebé halo ona apreensaun, haktuir iha rezolusaun Governu nian ne’ebé mak fó kompeténsia bá iha Ministériu Finansas (MF), liuhosi Diresaun Jerál Patrimóniu Estadu, sei atua ho kategoria tolu.

“Ida primeiru, karreta balu iha fiksa, ne’e nafatin hela iha ministériu ida-idak, maibé ninia númeru fiksa ne’e hosi ministériu das finansas, liuhosi patrimóniu do estadu. Agora, iha ne’ebá. Segundu, halo leilaun. Ikus liu maka, re-aloka,” Euclides esplika.

Iha kategoria ida kona-bá atu halo re-alokasaun, signifika, karreta ne’ebé prende hosi ministériu ida, depois patrimóniu estadu mak sei fó apoiu fali ba ministériu seluk, tuir nesesidade.

Bainhira iha duni indísiu krime ruma hosi karreta sira ne’ebé prende, tenke prosesa tuir lei númeru 07/2022, kona-bá medida sira bá prevensaun no kombate korrupsaun nian, liu-liu kona-bá pekulatu ba uzu.

Jornalista: Rogério Pereira Cárceres