Hatutan.com (03 Maiu 2022), Díli– Iha entrada fulan-Novembru 2020, Polísia Nasionál Investigasaun Kriminál  (PNSIK) lansa operasaun maratona ida iha Díli no munisípiu hodi detein jestór prinsipál sira operadór telekomunikasaun, hanesan Guardamor,  Jestór prinsipál iha Telemor,  Metrolink, Elite Computer, kompañia R2M IT Solution,  Prezidente Autoridade Nasionál Komunikasaun (ANC), João Olívio Freitas no seluk-seluk tan tanba deskonfia envolve iha ligasaun internet ilegál iha Timor-Leste.  

Lee Mós : Kazu Internet Ilegál iha Faze Rekolla Dokumentu

PNSIK halo buska no apreensaun bá empreza Elite Computer iha Colmera, Dili. Foto/Dok.Espesiál

Jestór bá empreza telekomunikasaun hirak-ne’e  balun detein iha sela Polísia durante oras 24 nia laran hodi submete ba investigasaun iha tempu ne’ebá no balun hetan Termu Identidade Rezidénsia (TIR) iha primeiru interrogatóriu iha Tribunál Distritál Díli (TDD).

Liuhusi desizaun primeira interrogatóriu iha Tribunál Díli tempu ne’ebá, aplika Termu Identidade Rezidénsia (TIR) jerál bá  jerente prinsipál hosi kompañia Guardamor ho inisiál EBS no Metrolink ho inisiál JJDRC.

Liuhosi primeiru interrogatóriu, iha loron 28 fulan-Novembru 2020, iha TDD aplika mós medida koasaun  prizaun preventiva ba jestór prinsipál  operadór telekomunikasaun Telemor ho inisiál TVB no jestór prinsipál Elite Computer ho inisiál DP.

Husi kazu ne’e mós, iha loron 26 fulan-Novembru 2020, PNSIK mós ezekuta mandadu detesaun husi Tribunál Distritál Díli,   bá Prezidente ANC, João Olívio Freitas, no halo apreensaun mós ba evidénsia karreta privadu ida hosi Prezidente ANC nian ne’e rasik.   

Lee Mós :  Kazu Internet Ilegál La Prejudika Atribuisaun Lisensa ba Operadór Telekomunikasaun Sira

Andamentu bá prosesu kazu ne’e to’o agora kuaze nonook tiha de’it. Nune’e, Hatutan.com konfirma ho Adjunta Prokuradoria Jerál Repúblika, Remigia de Fátima,  katak kazu iha hela prosesu investigasaun nia laran.    

Suspeitu kazu internet ilegál iha sela detesaun. Foto/Dok.Espesiál

Hosi sorin seluk, fonte importante balun iha Ministériu Públiku ne’ebé lakohi temi nia identidade, informa mós katak prosesu kazu ne’e iha hela  investigasaun nia laran, tanba ne’e, seidauk iha konstituisaun bá arguido hodi hein bá prosesu julgamentu nian.

Fontes ne’e mós konfirma katak juridikamente prosesu ne’e iha hela investigasaun tanba ne’e parte sira ne’ebé tempu ne’ebá hetan detensaun no apreensaun bá sira-nia sasán sei konsidera  sei “inosente” no la eziste arguido.

Lee Mós : Kazu Internet Ilegál, Medida Koasaun TIR La Limita Arguidu Sira-Nia Knar

Hosi sorin seluk, advogadu privadu ne’ebé fó asisténsia legál bá suspeitu sira iha kazu internet ilegál ne’e,   Manuel Tilman, konsidera kazu fornesimentu internet illegal ne’ebé deskonfia komete husi operadór telekomunikasaun hanesan R2M IT Solution, Guardamor, Metrolink, Telemor, Elite Computer, inklui Prezidente Autoridade Nasionál Komunikasaun (ANC), João Olivio Freitas, arkivadu ona tanba Autoridade Nasional Komunikasaun (ANC) atribui ona lisensa atividade ba operadór telekomunikasaun hirak ne’e.

Manuel Tilman esplika, nia kliente hirak ne’ebé liu husi primeiru interrogatóriu Tribunal aplika TIR ne’e, tanba sira laiha lisensa, maibé bainhira iha ona lisensa atividade maka parte kriminál hotu ona, maibé bá arguidu na’in-ida ne’ebé prizaun preventive maka prosesu investigasaun kontinua lao.

Prezidente ANC, João Olívio Freitas, tuir julgamentu iha TDD kona-bá kazu internet ilegál. Foto/Dok. Espesiál

“Ha’u hanoin ha’u nia kliente mós kumpre ona dekretu balun liu-liu kona-bá lisensa atividade, tanba ANC atribui ona lisensa bá sira, signifika sira-nia atividade fornesimentu internet ne’e legal ona no kazu ne’e mós parese arkivadu ona, tanba razaun ema kaer sira ne’e laiha lisensa, maibé ne’e bá ha’u nia kliente ne’ebé hetan medida koasaun TIR, maibé ema Indianu na’in-ida ne’ebé tama hela prizaun preventiva ne’e ha’u sente prosesu investigasaun sei la’o,” Advogadu privadu Manuel Tilman haktuir bá Hatutan.com iha ninia knar fatin, Bidau, Tersa (03/05/2022).

Karreta privadu ne’ebé PNSIK prende husi prezidente ANC João Olívio Freitas daudaun ne’e devolve ona ho razaun laiha ligasaun ho akuzasaun.

Prosesu investigasaun ba kazu kriminál la hanesan, tanba hirak ne’ebé Tribunál aplika medida koasaun prizaun preventiva nia prosesu investigasaun lais, maibé hirak ne’ebé hetan TIR ninia prosesu investigasaun kleur bele to’o tinan-tolu bainhira kazu ne’e kompleksidade.

Maske Tribunal aplika ona TIR ba arguidu sira hodi aprezenta-án kada semana iha Postu Polisia ne’ebé besik, maibé la hasai liberdade kondisionál no direitu ba vida.

Jornalista: Carmelita Isaac