Hatutan.com, (11 Maiu 2022), Díli—Embaixadór Timor-Lesta bá Japaun,  Ilidio Ximenes da Costa, Kuarta (11/05/2022), ofisiálmente entrega karta nomesaun (Letter of Comission) husi Ministra Negósiu Estranjeiru no Kooperasaun Timor-Leste (MNEK), Adaljiza Albertina Xavier Reis Magno, bá antigu Embaixadór  Japaun mai Timor-Leste, Iwao Kitahara  hanesan Konsul Jerál onoráriu Timor-Leste nian bá Japaun.

Embaixadór TL bá Japaun, Elidio  Ximenes da Costa, entrega karta nomesaun (Letter of Comission) husi Ministra MNEK TL, Adaljiza Albertina Xavier Reis Magno, bá antigu Embaixadór Japaun mai Timor-Leste, Iwao Kitahara hanesan Konsul Jerál onoráriu Timor-Leste nian bá Japaun, Kuarta (11/05/2022). Foto/Espesiál

Iha abertura serimónia ne’e, Embaixador Ilidio Ximenes da Costa, hato’o agradesimentu bá reprezentante husi Ministériu Negósiu Estranjeiru Japaun, KANO Takehiro, Diretór Jerál bá asuntu Southwest Asian Affairs no MASUDA Ayako, asistente diretór ne’ebé partisipa iha serimónia ida ne.

Liuhusi komunikadu imprensa ne’ebé Hatutan.com asesu relata katak Embaixadór Elidio Ximenes da Cota informa, nomeasaun bá Konsul Jerál onoráriu  Timor-Leste bá Japaun hanesan misaun ida ne’ebé importante bainhira nia misaun hanesan Embaixadór Timor-Leste bá Japaun.

Iwao  Kitahara hanesan pesoál ida ne’ebé iha relasaun forte ho lideransa Timor-Leste nian no  hanesan mós pesoál importante ida ne’ebé iha sosiedade sivíl iha Japaun ne’ebé bele tulun no ajuda halo koneksaun bá setór privadu sira no organizasaun sira seluk, atu nune’e bele tulun dezenvolve ekonomia no industria iha Timor-Leste, liu-liu iha área peska, agrikultura, turizmu no área sira seluk.

Embaixadór Ilidio Ximenes  mós informa katak, iha loron 10 fulan-Novembru 2020, Embaixada RDTL iha Toquio rekomenda ba Governu Timor-Leste através  MNEK atu  bele konsidera no nomeia Iwao Kitahara hanesan Konsul Jerál onoráriu  Timor-Leste bá Japaun no ikus mai aseita no aprova husi MNEK iha loron 10 fulan-Marsu 2022 no aseita husi MOFA Japaun iha loron 6 fulan-Abríl 2022.

Iha serimónia ida ne’e, reprezentante husi Governu Japaun, KANO Takehiro, Diretór Jerál bá asuntu Southwest Asian Affairs, Ministeriu Negosius Estranjeirus Japaun reafirma katak relasaun bilateral nasaun-rua nian kontinua hametin nafatin no Japaun tulun nafatin Timor-Leste inklui hamutuk ho Timor-Leste halo promosaun ba pás iha rejiaun pasífiku.

Embaixadór Elidio Ximenes da Costa, hamutuk ho antigu Embaixadór Japaun mai Timor-Leste, Iwao Kitahara hanesan Konsul Jerál onoráriu Timor-Leste nian bá Japaun, foto hamutuk ho konvidadu importante husi Gernu Japaun nian. Foto/Espesiál

Nia mós hato’o obrigadu no agradese bá Embaixadór Ilidio Ximenes da Costa no Governu Timor-Leste ne’ebé nomeia ona Iwao  Kitahara hanesan Konsul Jerál onoráriu  Timor-Leste bá Japaun ne’ebé iha kapasidade no esperiénsia barak  ne’ebé bele tulun  Timor-Leste.

Iha parte seluk, Iwao  Kitahara hato’o obrigadu wain ba senhor Embaixador no Governu Timor-Leste ne’ebé fiar no nomeia ona nia hanesan Konsul Jerál onoráriu  Timor-Leste bá Japaun.

Iwao Kitahara agradese mós bá diretór jerál bá asuntu Southwest Asian Affairs, Ministeriu Negosius Estranjeirus Japaun no Governu Japaun ne’ebé aseita nia hanesan Konjul Jeral Timor-Leste bá Japaun no sei servisu hamutuk ho Embaixada no entidades sira seluk atu tulun Timor-Leste bá oin.

Iwao Kitahara sei estabelese nia eskritóriu ofisiál  iha loron 20 fulan-Maiu 2022  no hahú halo funsaun hanesan  Konsul Jerál onoráriu  Timor-Leste bá Japaun durante tinan tolu (3) nia laran.

Jornalista : Elio dos Santos da Costa