Hatutan.com (11 Maiu 2022), Díli—Mákina ne’ebé utiliza hodi prodús Billete Identidade (BI) iha Diresaun Servisu Rejistu Notariadu Munisípiu Lautém, Viqueque, Manatuto, Liquiça, Bobonaro no Ermera kontinua a’at desde tinan 2021 to’o oras ne’e tanba Governu seidauk hadi’a.

Situasaun ne’e difikulta prosesu produsaun BI orijinál ba komunidade ne’ebé presiza, tanba durante ne’e utiliza de’it BI iha surat-tahan mutin no bainhira presiza orijinál tenki mai to’o Díli.

Lee Mós: Mákina Imprimi BI iha Munisípiu Tolu Kontinua Avaria

“Surat-tahan mutin ne’ebé daudaun sira uza hanesan BI ne’e válidu hanesan de’it no diferensa maka ida uza surat-tahan mutin no ida seluk orijinál. Maibé, seidadaun barak mak hakarak BI tenki orijinál tanba situasaun mak la permiti duni. Ba sira ne’ebé hakarak hetan BI orijinál tenki iha karta hosi Diretór konservatóriu Munisipál Notariadu nune’e bele trata BI orijinál iha nasionál,” Diretór Jerál Diresaun Nasionál Servisu no Rejistu Notariadu (DNRN), Crisogno da Costa Neto hateten ba jornlista sira iha ninia knar fatin Mandarin (11/05/2022).

Antes ne’e, iha tinan 2021 iha kompañia Timoroan ida mak halo manutensaun ba mákina vargo, maibé la konsege tanba laiha osan no prazu ezekusaun Orsamentu Jerál Estadu (OJE) 2021 taka iha loron 23 de Dezembru.

Tanba ne’e, kompañia fo fila mákina ne’e hodi rezeita lakohi manutensaun, tanba ne’e daudaun depende ba Diresaun aprovizionamentu atu kontinua estende ka loke fali konkursu foun liu hosi alokasaun OJE 2022.

Tuir dadus DNRN no rejistu sivíl iha tinan 2021 konsege atribui ona BI ba ema hamutuk 40.604, Pasaporte ba ema hamutuk 10.721 kompostu hosi sidadaun estranjeiru no Timoroan no konsege hatama ona reseitas ba Estadu ho montante $705.800.

Hosi parte rejistu sivíl konsege atribui ona sertidaun moris ba ema hamutuk 9.086 sertidaun kazamentu 423, sertidaun gia óbitu ba ema 908, rejistu kriminál ba ema 25.410, renovasaun rejistu kriminál ema 546, bulletin rejistu kriminál ema 162 ho atendimentu gratuita.

Jornalista: Carmelita Isaac