Hatutan.com, (11 Maiu 2022), Díli-Polísia Nasionál Timor-Leste (PNTL) Munisípiu Dili liuhusi operasaun Tersa kalan (10/05/2022), tuku 20:00 to’o tuku 22:00 Otl, konsege halo apreensaun ba motorizada hamutuk 101 ne’ebé lei seguransa rodoviariu.

Lee Mós : Operasaun Kalan, PNTL Prende Motór 51

PNTL halo epreensaun bá mótor sira ne’ebé viola Lei Seguransa Rodoviaria. Foto/Hatutan.com

Komandante PNTL Munisípiu Díli, Superintendente Xefe Henrique da Costa, informa  operasaun sira iha kada kalan ne’e, bazeia ba iha orden komandu jerál nian ne’ebé mak fó sai katak, hahú hosi loron 01 to’o loron 21 fulan-Maiu ne’e, tenke hala’o operasaun, nune’e bele asegura festa nasionál restaurasaun independénsia bá dala-20, no serimónia pose bá Prezidente Repúblika eleitu.

Tipu operasaun ne’e mak hanesan halo patrulla la’o ain, membru balu ho karreta, no halo mós atividade pasa revista bá iha sasán kro’at, inklui bá iha dokumentu sira transporte nian.

“Operasaun involve eskuadra haat, no mós tránzitu, sira halo pasa revista ba iha asesória transporte, liu-liu bá iha motorizada, hanesan espellu, xapa matrikula, dokumentu transporte nian, ho mós kapasete, no dokumentu motor ninia,” Superintendente Xefe Henrique da Costa hateten ba jornalista sira iha kna’ar fatin Komandu PNTL Díli, Kuarta (11/05/2022).

Iha pasa revista ne’e, PNTL la konsege deteta ema ruma mak la’o lori sasán kro’at, maibé maioria hosi motorizada sira ne’ebé prende, barak mak laiha asesória sira hanesan espellu, xapa matrikula mak la kompletu, no balu laiha dokumentu motór.

Hafoin halo apreensaun bá evidénsia motorizada sira ne’e, iha kalan ne’e, ekipa sira lalin kedan bá asegura iha komandu Munisípiu Díli, atu nune’e tránzitu bele pasa billete infrasaun  nian no sira bele bá selu koima iha banku.

Membru PNTL Na’in-150 Preparadu Asegura Festa Restaurasaun Independénsia

Komandante Henrique informa tán, dadaun ne’e, Komandu Munisípiu Díli prepara ona nia membru hamutuk na’in-150, atu asegura seguransa bá festa nasionál Restaurasaun Independénsia RDTL ba dala-20, iha Tasi-tolu, Dili.

“Agora, ita prepara efetivu hamutuk 150, ne’e munisipiu Dili de’it. Maibé, posibilidade para atu nune’e bele liu, no ita prepara hotu ne’ebé mak ita iha para atu nune’e mós atividade preventiva sira, nune’e bele evita problema,” informa komandante Henrique.

Jornalista: Rogério Pereira Cárceres