Hatutan.com (18 Maiu 2022), Díli—Tribunál Distritál Díli (TDD) iha Kuarta 18 fulan ne’e hala’o primeiru julgamentu ba krime burla agravadu ho nu. kriminál 0446/17.PDDIL ne’ebé deskonfia involve empregada hosi restaurante pizza tiger fuel arguida RCdS, tanba privatiza nota falsa sosa na’an hodi halo aumentu ba presu na’an ne’ebé fó prezuizu ba na’in ba restaurante pizza tiger fuel lezadu Robert Reginald.

Tuir ajenda TDD nian katak, iha tuku 11:00 sei rona arguida, lezadu inklui sasin sira, maibé Tribunál la konsege rona ho razaun juiz Argentino Nunes la marka prezensa tanba nia oan moras.

Ho razaun ne’e, Tribunál adi’a hikas julgamentu ba loron seluk, hodi kontinua rona arguida no lezada.

Antes ne’e, tuir akuzasaun hosi MP katak iha loron 23 fulan Novembru-tinan 2017, lezadu tama ba iha nia gabinete haree resibu ida foin halo ho valór osan $200, maibé resibu refere la-tau naran hosi kompaña ne’ebé arguida ba sosa na’an.

Tanba ne’e, lezadu suspira katak sasan hirak ne’e sosa hosi kompañia ne’ebé ho nune’e lezadu haruka nia empregadu ida ba supermerkadu Lita Store hodi halo konfirmasaun ba na’an ne’ebé sosa hosi loja refere no fó tán osan hodi sosa na’an atu halo komparasaun ba sasan folin ne’ebé arguida ba sosa.

Hafoin sosa maka lezadu foin hatene katak, resibu ne’ebé arguida ba sosa na’an ho folin $200 diferente ho empregadu seluk ne’ebé ba sosa ho presu $120.

Iha loron 04 fulan Fevereiru tinan 2017 to’o iha loron 22 fulan Novembru-tinan 2017, foin nota katak resibu kustu na’an ne’ebé arguida sosa diferente ho kustu loloos hosi supermerkadu Lita Store.

Tanba ne’e, lezadu suspende arguida hosi nia servisu nu’udár empregada durante loron hitu hodi bolu ema independente halo auditoria iha lezadu nia restaurante pizza tiger fuel no rezultadu hatudu katak, durante ne’e resibu ne’ebé arguida hato’o ba lezadu konsidera falsu hotu hahú hosi tinan 2015, lezadu hetan prejuizu $16.807.20, tinan 2016  $18.23 1.90 no iha tinan 2017 lezadu hetan prejuizu hamutuk $13.828.25.

Tanba ne’e, MP akuza arguida ba prátika krime burla agravadu ne’ebé previstu iha artigu 267 hosi kódigu penál TL.

Audiénsia julgamentu prezide hosi juiz kolektivu Argentino Luisa Nunes, José Gonçalves, Alvaro Freitas, MP reprezenta hosi Prokuradór Jacinto Babo no arguida hetan asisténsia legál hosi Advogada Privada Adelina Lobo.

Jornalista: Carmelita Isaac