Hatutan.com, (17 Maiu 2022), Díli—Comissão Anti-Corrupção (CAC) liu hosi Diresaun Prevensaun no Sensibilizasaun (DPS) lideradu Komisáriu Adjuntu Luis de Oliveira Sampaio hamutuk ho Xefe Unidade Avaliasaun, Estudu no Rísku (UAER) no Xefe Unidade Promosaun, Valór no Integridade (UPVI) hala’o sorumutu akonsellamentu ho responsavél Sekretariadu Tékniku Programa Cesta Bázika, MTCI Hernani Soares ho nia ekipa iha edifisiu CAC Vila-Verde, Dili, Tersa-Feira (17/05).

Komisáriu Adjuntu Prevensaun no Sensibilizasaun, Luis de Oliveira Sampaio. Foto/Média CAC.

Objetivu hosi sorumutu ne’e Ekipa Sekretariadu Tékniku, MTCI ninian ho inisiativa koordena besik mai CAC hodi rona pontu rekomendasaun sira, buka asertasaun no partilla informasaun hamutuk hodi asegura prosesu implementasaun programa CB faze daruak tuir lei no prevene krime korrupsaun iha faze implementasaun iha terenu.

Lee Mós: CAC-PDHJ Sei Involve Perseiru Sira ba Monitorizasaun Programa Cesta-Bázika Faze Daruak

Diskusaun ne’e, ekipa CAC partilla esperiénsia monitorizasaun programa Cesta Bázika faze primeiru nian ne’ebé identifika indikasaun forte ba irregularidade oioin ne’ebé poténsia ba rísku korrupsaun.

CAC mós partilla no rekomenda pontus konsiderasaun sira ne’ebé hatuur iha dekretu lei nú. 10/2022 kona-bá Medida Reforsu Distribuisaun Cesta-Bázika iha artigu 18 aliñea 1 define katak, kompeténsia Sekretariadu Tékniku sei dezenvolve prosedimentu administrativu no tékniku ba apóiu distribuisaun Cesta-bázika no garante uniformizasaun ba prosedimentu no prepara lista finál benefisiariu Cesta-bázika.

Ekipa CAC mós fó hanoin responsavel Sekretariadu Tékniku MTCI ho nia ekipa atu asegura kualidade produtu ne’ebé nutritivu, kompaña distributor sira tenke kualidade, garante produtu tuir presu merkadu, tékniku sira hosi operador programa ne’e tenke komprende didi’ak lei no prosediemntu sira, inklui halo sosializasaun matadalan no direitu benefisiariu sira nian ba públiku antes implementa.

Alende diskusaun tékniku ohin, antes ne’e, Ekipa Tékniku CAC lideradu Komisariu Adjuntu Prevensaun no Sensibilizasaun, Luis de Oliveira Sampaio envia ona karta akonsellamentu ida ba Kordenadora Jerál Programa Cesta-Bázika nian no kopia ba Minisitru MTCI ho nia Vice no kargu Diretór sira, inklui Ministru MKAE no SEKOOP hodi husu asegura funsionamentu Sekretariadu Tékniku (ST) ho nia kompeténsia no prosedimentu relevante sira aplikavel antes implementa programa ne’e.

Liu hosi karta akonsellamentu ne’ebé envia ba Koordenadór Jerál ST iha loron 03 Fulan Maiu tinan 2022 liu-bá, Komisáriu Adjuntu Sampaio hateten, durasaun ba implementasaun programa ne’e (programa Cesta-bázika) durante tinan 2022, tanba ne’e, CAC akonsella operadór implementasaun CB faze daruak nian hodi asegura prosesu ne’e la’o tuir rekezitu sira ne’ebé lei define, nune’e prevene rísku korrupsaun no prevene prezuizu ba Estadu.

Ba interese integradu servisu prevensaun nian, CAC interesadu atu hatene membru hosi ekipa tékniku sira atu halo reuniaun no koordenasaun servisu, atu asegura katak, Sekretariadu Tékniku (ST) ho nia kompeténsia sira funsiona tuir lei haruka.

“Iha kazu kontráriu, bainhira Sekretariadu Tékniku (ST) ho prosedimentu obrigatóriu relevante sira mak seidauk estabelese no introdús, maibé programa ne’e hahú implementa, hafoin iha terenu mak ekipa monitorizasaun sira deskobre irregularidade ne’ebé rezulta lori prezuizu ba Estadu, maka CAC sei ezerse ninia papel atu loke prosesu investigasaun ba responsavel sira ne’ebé involve iha programa ne’e,” Hatutan.com sita deklrasaun Adjuntu Sampaio iha karta akonsellamentu ne’e.

Iha sorin seluk, diskusaun ba mekanizmu kontrolu programa Cesta-Bázika faze daruak nian, CAC halo ona sorumutu koordenasaun besik no ativu ho PDHJ, AIFAESA, Tane Konsumidor, FONGTIL no mós ho JSMP.

Ekipa konjunta ne’e hamutuk ona iha forsa koletiva ida ne’ebé bem preparadu ona atu halo monitorizasaun iha terrenu.

Jornalista: Carmelita Isaac