Hatutan.com, (20 Maiu 2022), Díli-Iha aniversáriu transformasaun Asosiasaun Sosiál Demokrátika Timorense (ASDT) bá FRETILIN bá dala-48, (20 fulan-Maiu 1974-2022), Sesta (20/05/2022), iha ajenda importante tolu mak sai alvu no mensajen importante iha serimónia ne’e.

Lee Mós : CCF Rekoñese Lere no Atribui Kartaun Militante

Prezidente Partidu FRETILIN, Francisco Guterres “Lú Olo”. Foto/Hatutan.com

Ajenda prinsipál liu mak serimónia “hanoin hikas” istória transformasaun partidu ASD bá partidu FRETILIN ajenda seluk fali mak  membru Komité Sentrál FRETILIN (CCF) hotu ne’ebé lidera husi Sekretáriu Jerál FRETILIN, Mari Bin Amude Alkatiri, simu hikas sira-nia kamarada Francisco Guterres “Lú Olo” nu’udár prezidente partidu FRETILIN.

Durante tinan-lima husi tinan 2017-2022, Francisco Guterres “Lú Olo” asume knar todan hanesan Prezidente Repúblika, nune’e nia foku bá iha servisu Estadu nian hanesan mós Xefe Estadu no Komandante Suprmu Forsa Armada nian. No tanba inkompatibilidade kargu Prezidente Repúblika, Lú Olo husi hela nia knar hanesan prezidente partidu FRETILIN to’o nia mandatu nu’udár Xefe Estadu termina iha kalan fahe-rua, 19 Maiu 2022.    

Durante asume kargu Prezidente Repúblika, Lú Olo la besik partidu FRETILIN no la hakat bá CCF. Ho nune’e, kompeténsia tomak prezidente FRETILIN nian asume direta husi Sekretáriu Jerál FRETILIN, Mari Alkatiri.

Ajenda seluk, maka simu fali ka fó rekoñesimentu bá Tenente Jenerál reformadu, Lere Anan Timur hanesan segundu jerasaun CCF no atribui mós kartaun militante FRETILIN nian.

Aproveita serimónia ne’e, parte sira mós hametin ka konsolida forsa partidu FRETILIN nian hodi prepara senáriu tuir mai bá eleisaun jerál 2023 no kontinua fó mensajen bá militante ho simpatizante sira atu servisu maka’as no servisu bá vitoria FRETILIN nian iha eleisaun sira tuir mai.  

Iha nia diskursu, Francisco Guterres “Lú Olo” afirma  FRETILIN tenke fila-fali ba ukun.

Ezisténsia FRETILIN nian dala-48, ne’ebé pasajen hosi ASDT ne’e, laiha istória ida para atu konta, maibé ne’e mós iha esperiénsia para atu bele aprende hosi hamriik, no atu la’o ba oin.

Lú Olo dehan, sé FRETILIN laiha esperiénsia ida, ka nia la hasai misaun hosi ninia esperiénsia, ohin loron, sira labele hamriik hamutuk iha CCF. FRETILIN la hatene tiha, hanesan ema hateten, karik tau tiha ona ba iha muzeu para hodi bele konta istória.

“Ha’u la konta istória barak, maibé foin kamarada Lere Anan Timur konta tiha ona istória sira ne’e, hatete loos. Saida mak FRETILIN hosi ne’ebé mak mai no to’o ohin. Ne’e importante tebes, para ita hotu bele hatene, ita hotu atu bele la’o tuir para ita hotu bele lori ita-nia partidu bá vitória hodi bele fila-fali bá kaer ukun,” Lú Olo afirma tán.

Nia fó hanoin katak, importante ida-ne’e, bainhira konta de’it istória, no la eskuadra partidu bá iha sistema multipartidáriu ne’ebé mak agora daudaun iha, depois funu ne’e hotu, maka FRETILIN sei sai nafatin de’it iha opozisaun.

“Sé ita la hametin ita nia aan, entaun ita bele sai beibeik de’it opozisaun. Maibé la’ós ida ne’e mak ita hakarak, ita hakarak, FRETILIN atu fila-fali bá ukun para tau ninia diáriu polítiku ida ne’e bá oin, para atu bele lori ukun povu ida-ne’e atu liberta duni povu ida-ne’e hosi mukit ho kiak. Ida ne’e mak FRETILIN hakarak,” Francisco Lú Olo hateten.      

Hafoin hakotu mandatu nu’udár Xefe Estadu ba povu Timor-Leste tomak, durante tinan- Lú Olo fila hikas ona ba ninia uma-knua FRETILIN.

Akompaña husi nia espoza Cidália Nobre Mousinho Lopes Guterres, Lú Olo to’o iha CCF, Comoro, Dili, tuku 17:41 Otl no simu direta hosi Sekretáriu Jerál FRETILIN, Mari Bin Amude Alkatiri, iha odamatan-boot CCF nian.

Prezidente FRETILIN, Francisco Guterres “Lú Olo” hateten katak, iha tinan-lima bá kotuk, nia sai hosi uma ida-ne’e (CCF) hodi ba kumpre misaun boot ida. Liu tiha tinan lima, ohin, nia fila-fali mai iha uma ida-ne’e.

Lú Olo hateten ida ne’e, hodi FRETILIN tomak bele intendente, bele komprende loloos, saida maka kna’ar Prezidente Repúblika no saida maka prezidente partidu nian.

“Bainhira ha’u sai hosi uma ida-ne’e, iha deskonfiansa barak tebes, la’ós hosi ita. Hosi ema seluk, tanba dehan katak, nia FRETILIN nian sai bá Prezidente Repúblika. Nia sei halo de’it maka FRETILIN nia servisu no FRETILIN nia orientasaun,” Lú Olo haktuir.

“Bainhira nia husu dehan katak, tenke sai hosi FRETILIN, para atu labele halo atividade FRETILIN nian. Maibé, ha’u hatán ba nia, antes ha’u mai sai prezidente da repúblika, ha’u prezidente  partidu tiha ona mak ha’u mai. Sé ha’u la sai prezidente  partidu, oinsá mak ha’u bele kandidatu bá Prezidente Repúblika,” Lú Olo argumenta.

Lú Olo dehan, buat ne’ebé inkompativel entre Prezidente Repúblika ho Prezidente Partidu nian maka funsaun. Tanba ne’e, funsaun mak inkompativel bá malu, la’ós kargu ne’ebé mak hetan.

“Señór doutór Ramos-Horta laiha argumentu, para hodi bele debate. Simplesmente, purke, sira halo konfuzaun de konseitu jurídiku iha sira-nia pensamentu,” dehan Lú Olo.

Partidu polítiku nu’udár organizasaun ida ne’ebé hodi bele mobiliza ninia ema no ho povu tomak, para atu bele partisipa iha vida polítika. Partidu nu’udár instituisaun polítika ida ne’ebé mak iha ninia organizasaun ida ho estrutura rasik.

Prezidente partidu FRETILIN ne’e dehan, durante tempu iha mandatu, nia nunka tau ain iha fatin iha CCF hodi halo atividade sira partidu polítika nian ka partidu FRETILIN nian.

“Ha’u halo loos de’it maka servisu ka funsaun Prezidente Repúblika nian to’o ha’u nia mandatu termina,” Lú Olo hateten tán.

Jornalista: Rogério Pereira Cárceres