Hatutan.com (23 Maiu 2022), Díli—Tribunál Distritál Díli (TDD) kontinua hala’o julgamentu ba krime omisídiu agravadu ne’ebé deskonfia involve arguidu na’in-18, tanba oho no so’e vítima Hendrique Soares iha aredór edifísiu Universidade da Paz (UNPAZ).

Lee Mós : Arguidu Na’in 13 ba Kazu Omesídiu UNPAZ Submete ba Julgamentu Dahuluk

Tribunál Distritál Díli (TDD). Foto/Hatutan.com

Arguidu na’in-18 ho inisiál hanesan,  FP, FT, DC, FC, QB, SP, JC, JP, AV, LS, JS, JdS, DP, LS, ZC, GP, NI ho JaC.

Iha julgamentu kontinuasaun, Segunda (23/05/2022), arguidu AV nega katak nia parte la kaer katana, la oho, la subar, la ko’us vítima no la’ós vítima nia ran maka kona arguidu nia faru, maibé Manuel Soares nia ran maka kona bainhira baku malu ho estudante UNPAZ hafoin husu paradeiru vítima nian.

Advertisement

Arguidu mós nega katak la’ós nia maka hetan uluk mate isin vítima nian, maibé arguidu JC maka hetan uluk, maske antes ne’e arguidu inklui JaC maka sa’e motór hamutuk ho vítima bá UNPAZ.

“Momentu ne’ebá ha’u la kaer katana ida, tanba ha’u bá UNPAZ iha tuku 12:30 madrugada no la’ós ha’u maka hetan uluk mate isin, maibé Hermenegildo maka hetan uluk hodi fila vítima nia isin lolon, nune’e ran labele sai barak,” arguidu ho inisiál AV haktuir.

Bazeia bá deklarasaun arguidu iha primeiru interrogatóriu no iha julgamentu ne’ebé diferente maka Tribunál husu arguidu atu ko’alia loloos no labele bosok, tanba iha primeiru interrogatóriu arguidu deklara katak nia maka kaer katana hodi entrega bá arguidu ida seluk  no vítima nia ran maka kona nia faru.

Tribunál esplika, iha sasin barak maka fó ona sira nia deklarasaun bá kazu ne’e hodi identifika se-se de’it maka involve direta iha omisídiu refere, tanba ne’e bainhira lakohi koopera ho Tribunál maka sei simu konsekuénsia ne’ebé todan.

Hafoin rona arguidu Tribunál adia hikas julgamentu bá loron seluk hodi kontinua rona arguidu no sasin sira seluk.

Advertisement

Ministériu Públiku (MP) akuza arguidu sira ba prátika krime omisídiu agravadu ne’ebé previstu iha artigu 139 hosi kódigu penál TL, relasiona ho kazu omisídiu ne’ebé akontese iha UNPAZ iha loron 20 fulan-Juñu 2021, ne’ebé hamate ona Hendrique Soares.

Audiénsia julgamentu, prezide hosi juis koletivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.

Jornalista: Carmelita Isaac

Advertisement