Hatutan.com, (28 Maiu 2022), Díli—Organizasaun sosiedade sivíl, liu hosi Asian Justice And Rights (AJAR), ho Lalenok ba Ema Hotu (LABEH) konsidera Ministru Asuntu Parlamentár no Komunikasaun Sosial (MAPKOMS), Francisco Martins da Costa Pereira Jerónimo la hatudu ninia kualidade lideransa ne’ebé di’ak, no komete abuzu podér tanba halo keixa “Denuncia Caluniosa” hasoru jornalista no média online Hatutan.com ba Ministériu Públiku (MP) ka Prokuradoria Jerál Repúblika.

Diretór Ezekutivu AJAR, José Luis Oliveira ho Diretór Ezekutivu Lalenok Ba Ema Hotu (LABEH), Cristhopher Henry Samson. Foto/Repro.

Diretór Ezekutivu AJAR, José Luis Oliveira sente lamentável tebes ho atitude hosi Ministru ida ne’ebé mak iha responsábilidade atu dezenvolve média tanba tuir loloos, MAPKOMS tenke hatudu ninia lideransa ida ne’ebé di’ak, atu ema seluk bele respeita liberdade imprensa no iha mós responsabilidade.

Lee Mós: PM Taur Lamenta MAPKOMS Keixa Jornalista Hatutan.com ba Ministériu Públiku

“Asuntu ida-ne’e, ita hatene no akompaña katak, Ministru ida-ne’e, komete abuzu de podér tanba involve iha prosesu projetu sira ne’ebé maka hatudu momoos iha konflitu interese. Ne’e duni, ha’u lamentável tebes ba kualidade lideransa Ministru ida-ne’e no nia la merese atu sai Ministru. Ne’e só gasta osan Estadu nian, atu selu nia, atu goza regalias nu’udár Ministru,” José Luis Oliveira hateten ba Hatutan.com via telefónika, Sesta (27/05/2022).

Diretór AJAR ne’e haree katak, maski MAPKOMS asume kargu boboot no goza regalia sira Estadu nian, maibé iha Ministru ninia lideransa ne’e la fó progresu, la fó avansu signifitivu bá dezenvolvimentu ne’ebé mak iha.

MAPKOMS nia lideransa ne’e, la konsege lori progresu no laiha avansu signifikativu, tanba nia la uza rekursu ne’ebé mak tuir lei.

Entaun, liga ho kazu ne’e, tuir loloos rekursu primeiru ne’ebé MPKOMS tenke halo maka lori kazu ne’e ba iha Conselho de Imprensa (CI), molok nia lori ba Ministériu Públiku ka Tribunál.

Diretór AJAR ne’e haktuir katak, uluk nia mós hanesan jornalista ida ne’ebé halo mós reportajen ba situasaun sira iha tempu rejime Soeharto nian, entaun nia hatene di’ak ambiente oinsá maka rejime ditadura sira kontrola média.

“Nune’e, situasaun seidauk to’o iha ne’ebá no nia lori ba Tribunál, ne’e mós nia iha direitu ida no nia mós tenke konsiente katak, bainhira nia lori ba Tribunál, maka tuir ha’u hatene, regras ida prinsipál ne’e katak, kazu prinsipál tenke julga uluk, mak foin depois deskobre krime denunsia kalunioza ne’e iha ka lae. Kazu prinisipál tenke lori uluk, korrupsaun ida ne’ebé nia komete ne’e, ne’e tenke julga uluk. Eseptu, kuandu nia lori de’it poder ba influénsia Tribunál, ida-ne’e ita haree Tribunál mós la-loos ona,” José Luis Oliveira esplika.

Maibé mós ba kazu ne’e, Luis Oliveira haree katak, saida mak agora MAPKOMS halo ne’e la hatudu ninia kualidade nu’udár lideransa ida ne’ebé maka hodi promove jornalizmu ne’ebé eziste iha nasaun ne’e.

Loloos MAPKOMS mak iha responsábilidade atu dezenvolve liberdade impénsa iha nasaun ne’e no nia tenke hatudu ezemplu ida ne’ebé mak di’ak.

“Mais ha’u, seidauk to’o iha ida ameasa Liberdade imprénsa. Ha’u seidauk haree, ha’u haree ninia kualidade lideransa ne’e mak la fó ezemplu ne’ebé mak di’ak, atu promove liberdade imprénsa ne’ebé mak responsável,” José Luis Oliveira hateten.

Iha sorin seluk, Diretór Ezekutivu Lalenok Ba Ema Hotu (LABEH), Cristhopher Henry Samson hateten, nia mós akompaña hela prosesu ida-ne’e, no sente triste tanba ukun-na’in ida ne’ebé mak tuir loloos servi ba povu no públiku, halo fali keixa hasoru jornalista no média.

Tuir loloos nu’udár ukun-na’in ida, MAPKOMS tenke buka meius hotu-hotu hodi buka hatene, informasaun ne’ebé mai hosi média liu-liu Hatutan.com ne’e loos, ka la loos.

“Labele ameasa espresaun, labele ameasa jornalista no labele ameasa ema ruma tanba nia fó sai informasaun, tuir buat ne’ebé mak nia hatene,”nia hateten.

Diretór LABEH ne’e fó hanoin katak, sé sente informasaun ne’ebé Média Hatutan.com fó-sai la loos, nia dalan maka ba hato’o iha CI, tanba problema ne’e iha relasaun ho produtu sira jornalizmu nian. Tanba  ne’e maka Estadu hari’i Konsellu Imprénsa atu rezolve problema sira ne’ebé mak iha relasaun ho jornalista, média sira ho ukun-na’in sira no ema hotu.

Maibé, MAPKOMS rasik la konsulta uluk ho CI hodi dehan katak, Hatuta.com komete ona krime, hodi lori direta ba iha MP, ida-ne’e ameasa ida ba kna’ar dalan jornalizmu ninian.

“Sé ida-ne’e mak ita husik ba bebeik, ha’u sente ne’e la loos. Tanba ukun-na’in sira tenke komprende papél importante média nian, tenke hatene média nia servisu, katak media la’ós tutuur fó-sai informasaun, parese iha duni ligasaun ho publikasaun sira ne’ebé Hatutan.com halo kona-bá kazu korrupsaun, kona-bá abuzu do podér, kona-bá sasán sira ne’ebé la la’o,” Diretór Ezekutivu LABEH hateten.

LABEH konsidera média sira hala’o kna’ar hanesan wacht dog atu hatenu, bainhira sente katak iha fatin ruma buat ruma la’o la loos. Entaun, presiza fó-hanoin atu ema hotu-hotu bele hadi’a nia an daudaun.

Maibé, la’ós atu lori fali média ba Tribunál, tanba de’it sasán ne’ebé média fó-sai. Ida-ne’e, la’ós ninia dalan. Dalan ne’ebé loos maka utiliza kanál ne’ebé di’ak hodi buka solusaun.

Cristhopher fó hanoin katak, MAPKOMS bele lori kazu ne’e Tribunál, bainhira iha krime ida boot no nia laiha órgaun seluk ne’ebé bele halo intervensaun iha prosesu ida-ne’e.

Bainhira MAPKOMS ladún hatene katak dalan ne’ebé loos maka Konsellu Imprénsa, bele husu ba média relevante atu públika faktus no MAPKOMS mós tenke fó fila-fali informasaun ida ne’ebé loos nian, nu’udár direitu ba resposta.

“Tenke iha média ida ne’ebé krítiku duni ne’ebé halo investigative journalist, ne’ebé bele fó sai informasaun atu ema bele hadi’a nia an. Devia ita haree informasaun ne’e, oinsá ita halo resposta ne’ebé loos, resposta ne’ebé di’ak ba informasaun ne’e, ita lori fali média ba Tribunal, kona-bá saida nian,” Cristhopher dehan.

Iha Segunda 23 Maiu 2022, Jornalista nu’udár mós Xefe Redasaun Hatutan.com, Francisco Belo Simões da Costa, presta ona deklarasaun iha Ministériu Públiku (MP) ka Prokuradoria Distritál Díli, kona-bá keixa balun ne’ebé hatama hosi Francisco Martins da Costa Pereira Jerónimo, atuál Ministru Asuntu Parlamentár no Komunikasaun Sosiál (MAPKOMS).

Iha Kinta (26/05/2022) Primeiru Ministru (PM), Taur Matan Ruak, lamenta tebes no la konkorda ho membru VIII Governu Konstitusionál, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé halo keixa “Denúncia Caluniosa” ba Ministériu Públiku (MP) hasoru jornalista no Xefe Redasaun Hatutan.com Francisco Belo Simões da Costa.

Antes ne’e mós Assosiasaun Jornalista, Timor-Leste Press Union (TLPU) husu Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo atu rejigna-an hosi kargu nu’udár Ministru, tanba laiha sensibilidade no responsabilidade morál ba Liberdade Imprensa iha Timor-Leste.

Lee Mós: “Denúncia Caluniosa”, SEKOMS Enkoraza Jornalista Kontinua Luta Ba Lia Loos

MAPKOMS Halo Keixa “Denúncia caluniosa” Hasoru Xefe Redasaun Hatutan.com

Deskonfia, MAPKOMS Nu’udar Prezidente FFTL Fó Projetu iha RTTL,E.P Ba Sekretaria FFTL

“Denúncia Caluniosa”, TLPU Husu MAPKOMS Rejigna-an

Jornalista: Rogério Pereira Cárceres