Hatutan.com, (30 Maiu 2022), Díli—Ministru Assuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo konsidera “Denúncia Caluniosa”, la ameasa Liberdade imprensa iha Timor-Leste (TL).

Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo.

Tanba ne’e Ministru ne’e mantein keixa hasoru jornalista, editór no Xefe Redasaun Hatutan.com bazeia ba kódigu penál 285.

Lee Mós: MAPKOMS Halo Keixa “Denúncia caluniosa” Hasoru Xefe Redasaun Hatutan.com

“Laiha ameasa ba Liberdade Imprensa no ema ida. Ha’u seidauk ameasa ema ida. Laiha ema ida mak impede ema ida nia Liberdade atu espresa maibé nia sempre dehan espresaun ne’ebé hato’o tenke ho responsabilidade, ida ne’e deit. Agora iha ona Tribunál tanba ne’e hosik ba Tribunál hala’o nia servisu. Ha’u halo ha’u nia servisu no jornalista sira hala’o sira nia servisu,” Francisco Jerónimo hateten ba jornalista sira, hafoin hasoru malu ho Primeiru Ministru (PM) Taur Matan Ruak, iha rezidénsia Faról, Segunda (30/05/2022).

Governante ne’e mantein pozisaun katak, maski iha entidade lubuk ida mak halo ona komentáriu no konsidera ema ka sidadaun ida-idak iha nia opiniaun, maibé nia haruka atu hotu-hotu ba lee fila-fali lei komunikasaun sosiál ho didi’ak, ida por ida, artigu ida ba ida to’o remata no haree halo didi’ak saida mak hateten iha Lei Komunikasaun Sosiál ne’e.

Jornalista husu kona-bá bainhira iha mediasaun ruma no hosi parte balun husu atu dada hikas keixa ne’e, maibé governante ne’e dehan lalikan ko’alia fila ba fila mai, tanba nia lakohi buat ida konflitu de interese ne’e iha laran.

“Tanba saida mak CAC no MP halo ona sira nia servisu, ita boot sira mós tenke kontinua nafatin, tanba saida mak sira halo sira nia servisu ita boot sira mós sei kontinua ba buka tun sa’e iha fatin-fatin sira ne’e, ne’e objetivu saida. Ha’u la haree ida-ne’e maibé kuandu ko’alia buat ne’ebé afeta ba dignidade tenke haree. Ne’e mak ko’alia klaru iha lei komunikasaun sosiál, ne’ebé ha’u nian mak ne’e hosik ba órgaun ida-idak halo nia servisu. Ita boot sira halo imi nia servisu, ha’u halo ha’u nian no MP halo ninian, to’o iha ne’ebé mak ita haree rezultadu saida no lia loos ne’e iha ne’ebé,” nia argumenta.

CAC Konklui Verifikasaun Objetu Krime Hosi Munisípiu Rua

Atu fó hanoin katak, Depois de Comissão Anti Corrupção (CAC) rona ona depoitmentu hosi sasin hamutuk na’in 12 kona-bá projetu instalasaun Set-top Box/dexodificador Rádiu Televizaun Timor Leste, Empreza Públika (RTTL,E.P), CAC mós halo verifikasaun ba objetu krime ne’ebé daudaun konklui ona verifikasaun objetu krime hosi Munisípiu rua, hanesan Liquiça no Maliana hodi rona mós benefisiáriu sira, tanba sira sai hanesan sasin ba kazu ne’e.

Daudaun ne’e, CAC foku liu ba verifikasaun objetu krime iha Munisípiu Díli, hodi hatene loloos prezuizu ba Estadu ho ninia montante no bainhira sufisiente ona maka sei konstitui arguidu sira.

“To’o agora investigasaun sei kontinua la’o, maibé ami konklui ona verifikasaun ba objetu krime hosi Munisípiu rua nian hanesan Liquiça no Maliana. Agora foka iha Díli no bainhira rezultadu hosi Munisípiu tolu ne’e sufisiente ona maka sei konstitui kedan arguidu,” Diretór Jerál Investigasaun CAC, José Verdial hateten ba Hatutan.com via telefónika, Segunda (23/05/2022).

Bainhira rezultadu sufisiente no karik iha risku ba arguidu sira atu halai ses hosi prosesu ne’e, maka CAC iha ona hanoin hodi hato’o pedidu ba Ministériu Públiku (MP) atu husu ba Tribunál halo mandadu detensaun, buska no aprensaun ba arguidu sira, tanba Tribunál Distritál Díli (TDD) maka iha kompeténsia hodi deside no hasai mandadu detensaun, buska no aprensaun ba arguidu.

Tuir delegasaun kompeténsia ne’ebé Ministériu Públiku (MP) fó ba CAC loron 45 ne’ebé sei termina iha Segunda loron 25 fulan ne’e, maibé hosi parte CAC hatama ona pedidu ba MP hodi husu prolongasaun tempu atu fó tán loron 70 ba CAC atu finaliza ninia investigasaun.

Ministériu Públiku delega kompeténsia ba CAC hodi hahú arrola sasin sira atu ba presta deklarasaun iha CAC, kona-bá indísiu krime ne’ebé iha relasaun ho projetu  instalasaun Set-top box/dexodificador RTTL,E.P.

Projetu instalasaun Set-top Box/dexodificador RTTL,E.P ne’e ho nia kustu $900,000.00, deskonfia Ministru Asuntu Parlamentár no Komunikasaun Sosiál (MAPKOMS), Francisco Martins da Costa  Pereira Jerónimo, nu’udár mós Prezidente Federasaun Futeból Timor Leste (FFTL) estabelese kontratu ho empreza DILI ETERNAL INNOVATION INFORMATION, Lda nu’udár sósiu hosi Melánia da Silva Fernandes Capela nu’udár Sekretária iha Gabinete Prezidente FFTL.

Iha Segunda 23 Maiu 2022, Jornalista nu’udár mós Xefe Redasaun Hatutan.com, Francisco Belo Simões da Costa, presta ona deklarasaun iha Ministériu Públiku (MP) ka Prokuradoria Distritál Díli, kona-bá keixa balun ne’ebé hatama hosi Francisco Martins da Costa Pereira Jerónimo, atuál Ministru Asuntu Parlamentár no Komunikasaun Sosiál (MAPKOMS).

Iha Kinta (26/05/2022) Primeiru Ministru (PM), Taur Matan Ruak, lamenta tebes no la konkorda ho membru VIII Governu Konstitusionál, Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, ne’ebé halo keixa “Denúncia Caluniosa” ba Ministériu Públiku (MP) hasoru jornalista no Xefe Redasaun Hatutan.com Francisco Belo Simões da Costa.

Antes ne’e mós Assosiasaun Jornalista, Timor-Leste Press Union (TLPU) husu Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo atu rejigna-an hosi kargu nu’udár Ministru, tanba laiha sensibilidade no responsabilidade morál ba Liberdade Imprensa iha Timor-Leste.

Organizasaun sosiedade sivíl sira liu hosi Asian Justice And Rights (AJAR) ho Lalenok ba Ema Hotu (LABEH) antes ne’e konsidera Ministru Asuntu Parlamentár no Komunikasaun Sosial (MAPKOMS), Francisco Martins da Costa Pereira Jerónimo la hatudu ninia kualidade lideransa ne’ebé di’ak, no komete abuzu podér tanba halo keixa “Denuncia Caluniosa” hasoru jornalista no média online Hatutan.com ba Ministériu Públiku (MP) ka Prokuradoria Jerál Repúblika.

Lee Mós: “Denúncia Caluniosa”, AJAR ho LABEH Konsidera MAPKOMS Komete Abuzu Podér

“Denúncia Caluniosa”, SEKOMS Enkoraza Jornalista Kontinua Luta Ba Lia Loos

“Denúncia Caluniosa”, TLPU Husu MAPKOMS Rejigna-an

“Denúncia Caluniosa” Hasoru Jornalista Hatutan.com Hanesan Notísia Triste ba Liberdade Imprensa TL

PM Taur Lamenta MAPKOMS Keixa Jornalista Hatutan.com ba Ministériu Públiku

Jornalista: Vito Salvadór/Carmelita Isaac