Hatutan.com (03 Juñu 2022), Díli—Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio hala’o sensibilizasaun matéria krime Korrupsaun ba Funsionáriu públiku sira iha workshop loron ida ne’ebé organiza hosi ekipa Quadrilaterál CAC, PDHJ, CFP no IGE iha Salaun Administrasaun Munisipiu Manatuto, Kinta-Feira (02/06).

Komisáriu Adjuntu Comissão Anti-Corrupção (CAC) ba Asuntu Prevensaun no Sensibilizasaun, Luis de Oliveira Sampaio hala’o sensibilizasaun matéria krime Korrupsaun ba Funsionáriu públiku sira iha workshop loron ida ne’ebé organiza hosi ekipa Quadrilaterál CAC, PDHJ, CFP no IGE iha Salaun Administrasaun Munisipiu Manatuto, Kinta-Feira (02/06). Foto/CAC.

Workshop loron ida ne’e ho tema “Prevene no Kombate Korrupsaun Hodi Promove Governasaun Di’ak no Proteje Direitus Humanus iha Servisu Administrasaun Públika”.

Lee Mós: CAC Rejista Ona Deklarante Rendimentu, Bens no Interese Na’in 5.053

Komisáriu Adjuntu Sampaio hateten, programa sensibilizasaun ba funsionáriu públiku sira nu’udár atividade interaksaun regulár ida entre CAC no ajente públiku sira iha Munisípiu atu kadi nafatin funsionáriu Administrasaun Munisipál sira nia hanoin no fanu sira nia konsiénsia kona-bá tentasaun aat prátika tipu krime korrupsaun ne’ebé hatuur iha lei Kódigu Penál no Lei Medida Prevenção no Combate Corrupção (MPCC).

Advertisement

CAC iha misaun atu halo prevensaun, sensibilizasaun no investigasaun. Servisu Prevensaun no Sensibilizasaun nian, CAC sempre hakbesik ho Funsionáriu Públiku sira atu fó-hanoin, hatudu dalan loos hodi la halo korrupsaun.

“CAC ne’e la’ós ita boot sira nia inimigu. CAC ne’e instituisaun Estadu, parseiru ita boot sira nian atu ajuda ita boot sira hodi fó-hanoin, motiva no rekomenda ita boot sira atu la monu ba tentasaun aat sira kona-bá krime korrupsaun. CAC hakbesik ho ita boot sira atu fó-hanoin oinsá promove governasaun ida di’ak, hahoris no haboot ita boot sira nia integridade no fó-hanoin ita boot sira atu halo tuir kompeténsia sira tuir de’it lei,” Adjuntu Sampaio.

Programa sensibilizasaun Comissão Anti-Corrupção ba funsionáriu públiku sira iha Munisípiu nu’udár dever Comissão Anti Corrupção ninian, hodi loke servidór públiku sira nia orizonte atu jere administrasaun públiku ida moos, efikás no efisiente.

Nune’e mós halu’an funsionáriu públiku sira nia neon no konviksaun ida forte ba prevene-an monu ba krime sira korrupsaun ninian.

Komisáriu Adjuntu Sampaio foku esplika ba partisipante sira kona-bá konseitu bázika korrupsaun no tipu sira korrupsaun ninian, liu-liu krime tuan sira ne’ebé altera ona hosi lei kódigu penál no krime foun sira iha lei Medida Prevenção no Combate Corrupção (MPCC) hanesan; Abuzu Poder, Partisipasaun Ekonomia iha Negósiu, Pekulatu Uzu, Subornu, Konflitu Interese, Brankeamentu Kapitál, Fraude Konstrusaun, pekulatu iha setór privadu, Pose Rikeza Injustifikada, no tipu krime korrupsaun Fraude Fiskál.

Advertisement

Jornalista: Carmelita Isaac