Hatutan.com, (6 Juñu 2022), Díli– Prezidente Repúblika (PR), José Manuel Ramos-Horta, hateten papél Ministériu Públiku (MP) nu’udár pilar importante bá justisa no demokrasia iha Timor-Leste no assume responsabilidade bá defende valor fundamental Estadu direitu nian, ne’ebé fó abut iha sosiedade, iha reprezentasaun Estadu nian iha Tribunál sira no ezersísiu asaun penal iha defeza bá menór, auzente no inkapazes iha defeza ba legalidade demokrátika no promosaun kona-bá kumprimentu bá lei.

Lee Mós : PR Ramos-Horta Husu MAPKOMS Dada-Hikas Keixa Hasoru Jornalista Hatutan.com

PR Ramos-Horta ho Ministru Justisa, Tiago Amaral Sarmento, akompaña husi autór justisa sira selebra aniversáriu MP bá dala-XX iha salaun MNEK, Díli, 06 fulan-Juñu 2022. Foto/Hatutan.com

Prezidente Repúblika José Ramos-Horta iha nia diskursu iha ámbitu aniversáriu MP bá dala-XX  iha Salaun Ministériu Negósiu Estranjeiru no Kooperasaun (MNEK), Segunda (06/06/2022),  afirma Prokuradór Jerál no Magistradus sira hatudu ona iha sira-nia knar ne’ebé demonstra iha ezersísiu husi sira nia funsaun, hodi buka atu kumpre de’it rekizitu legalidade, objetividade, insensaun no obediénsia ba orden sira ne’ebé prevee iha lei ne’ebé sira sujeita.

Iha senáriu sira ne’ebé infelizmente difisil atu atua no iha ne’ebé sira hasoru difikuldade ne’ebé iha ema ua’in nia matan sai obstákulu ne’ebé impede sira atu kontinua sira nia misaun.

Advertisement

Ramos-Horta afirma ho kondisaun difisil hotu ne’ebé sira hasoru, autór justisa sira iha loron bá loron hanesan falta kondisaun material, númeru juis ne’ebé menus, prokuradór no Defensor públiku, maibé ho limitasaun sira ne’e, sira sei bele responde ba dezafiu sira ne’ebé sira hasoru.

“Estadu iha kompeténsia atu halo buat barak liután Estadu tenke hatán bá ita-boot sira-nia nesesidade no kria kondisaun hirak ne’ebé presiza atu ita-boot sira bele hala’o ita-boot sira-nia knaar ho di’ak liután,” José Ramos-Horta  hateten.

Tuir nia, Governu iha responsabilidade atu promove no kria kondisaun material no umanu ne’ebé di’ak liu, atu nune’e, bele alkansa objetivu, ne’ebé, atu servi nesesidade sidadaun sira-nian.

Iha tinan 2020, prokuradór 37 ne’ebé servisu integral ka full-time, na’in-6 de’it mak feto. Iha Defensoria publika, husi defensór públiku na’in-35 ne’ebé servisu integral ka full-time, feto nain lima (5) de’it, realidade ne’e tenke muda.

Liu ona tinan 20 institusionalizasaun Ministériu públiku nian, klaru katak, maske iha dezafiu barak ne’ebé Ministériu públiku hasoru, instituisaun ida-ne’e bele orgullu ho susesu ne’ebé alkansa ona iha ezekusaun mandatu Konstitusionál.

Advertisement

 Jornalista: Vito Salvador