Hatutan.com, (13 Juñu 2022), Manatuto- Prezidente Repúblika (PR), José Manuel Ramos-Horta hateten, inkulturasaun iha selebrasaun festa padroeira parókia Santu António Manatuto iha nia sentidu relijiozu no kulturál ne’ebé hatudu valor husi turizmu relijiozu Timor-Leste nian.

Lee Mós : Santu António Modelu ba Sarani Sira Atu Sai Masin-Naroman Mundu Nian

Morador sira ho kuda iha selebrasaun festa padrueira Santu António Manatuto, 13 Juñu 2022. Foto/Hatutan.com

Ramos-Horta bá jornalista sira iha resintu Igreja Parókia St. António Manatuto hateten selebrasaun ida-ne’e la’ós festa relijiozu nian de’it, maibé mós ho festa kulturál ne’ebé sarani sira hala’o durante loron 30 kedas.

Selebrasaun boot inkulturasaun iha Munisípiu Manatuto ne’e iha atrasaun kulturál relijiozu ne’ebé kavaleiru sira ho kuda tuda sanan-rai, osan iha laran sira iha kraik bee hanaran povu hadau malu osan ne’ebé iha atu bele rai bá sira no utiliza bá sosa buat ruma ne’ebé sira presiza.

Horta afirma, tinan ne’e iha selebrasaun padroeira parókia St. António Manatuto iha doadór oin-oin, inkluindu prezidénsia da repúblika atu motiva komunidade sira hametin no haboot nafatin serimónia inkulturasaun ne’e hodi hametin valor turizmu relijiozu nian iha parókia Manatuto atu bele dada turista sira kada tinan vizita Timor-Leste.

“Festa boot kada tinan, timoroan mai iha ne’e husi Munisípiu Manatuto rasik, Díli inklui mós hosi fatin sira seluk mai selebra festa Koronél St. António. Festa relijiozu no kultura ne’ebé se ita dezenvolve halo di’ak sei sai turizmu relijiozu atrativu,”  José Ramos-Horta hatete.

Xefe Estadu ne’e hatutan, úniku iha Timor-Leste mak Santu ida hetan títulu Koronél do Ezérsitu ho nune’e nia tau matan ba povu iha Manatuto inklui povu Timor-Leste tomak.

Iha Fatin hanesan Padre Administradór Parókia St. António Manatuto Pe. Nelson da Costa Freitas, hateten, ohin loron 13 fulan-Juñu, Santu António nia loron, Prezidente Repúblika mak vizita Manatuto iha ne’e, autoridade, sivíl militár, sarani sira, tamba Santu António iha sarani Manatuto tomak ninia vida.

Atividade kultural iha festa padrueira Parokia Santu António Manatuto, 13 Juñu 2022. Foto/Hatutan.com

Santu António leno naroman, leno dalan Lalehan bá timoroan, ne’e duni festa ne’e la’ós foin, maibé kleur ona husi bei’ala sira too ohin loron kontinua nafatin atu labele lakon.

“Se imi katuas, ferik sira la hanorin, imi nia oan sira agora modernu tik tok la hatene ona saida mak Santu António, la hatene ita-nia kultura, tanba nia sira modernu. Ita haluha tiha aspetu kultura ne’ebé povu ka sarani Manatuto konserva,” Pe. Nelson da Costa Freitas hateten.

Iha parte seluk prezidente Autoridade Munisípiu Manatuto Bernardo Lopes, hateten liu husi festa ida-ne’e bele halibur Manatuto oan sira ne’ebé hela iha rai-li’ur no rai-laran, bá sira ne’ebé hela iha Díli no foho bele iha oportunidade atu hasoru malu hodi partilla informasaun moris loroloron nian bá malu liu husi sorumutuk sira hanesan ne’e.

Hanesan autoridade munisípiu suporta tebes atividade kulturál ne’ebé sarani parókia St. António Manatuto halo no ida-ne’e hatudu valor loloos husi ema-nia identidade ne’ebé bele mós nakfilak ba turizmu relijiozu.

Jornalista: Vito Salvador