Hatutan.com,(16 Juñu 2022), Díli- Arsebispu Arkidioseze Metropolitana Díli, Dom Virgílio do Carmo da Silva, SDB, husu bá sarani sira hakle’an domin bá eukaristia no ekolojia nu’udár revelasaun lolos Maromak Nia domin.

Sarani sira Arkidioseze Metropolitana Díli selebra loron Corpo de Deus, 16 Juñu 2022

Arsebispu Arkidioseze Metropolitana Díli, Dom Virgílio do Carmo da Silva, SDB, iha nia omilia bá selebrasaun loron  Corpo de Deus, iha Lecidere, Díli, Kinta (16/06/2022,  haktuir dokumentu Papa Francisco nian kona-bá Laudato Si fó hanoin hikas kona-bá relasaun furak entre eukaristia no ekolojia.

Iha eukaristia mak buat hotu ne’ebé Maromak hakiak tiha ona hetan Nia ezatasaun ne’ebé ás liu hotu. Grasa ne’ebé tenta atu manifesta Nia-an tanjivel uainhira Maromak rasik halo an bá ema no oferese Nia-an hanesan paun ai-han bá Nia kriatura sira.

Dom Virgílio esplika katak Jesus Kristu iha mistériu enkarnasaun hili atu tama kle’an bá ema nia laran liu husi matéria paun, trigu no husi ne’e mak nakfilak bá Kristu Nia futar-isin iha altar. Kristu la mai husi leten, maibé Nia mai husi laran atu ema bele deskobre no hetan Nia iha moris.

Advertisement

Iha eukaristia ema hetan Nia plenitude. Jesus mak sentru universu nakonu ho domin ne’ebé naresin ho moris ne’ebé sei la nahas. Eukaristia mak liga Lalehan no rai, eukaristia hakuak no penetra iha kriatura hotu-hotu mundu ida ne’ebé mai husi Maromak Nia liman rasik no ema fó hikas bá Nia halo Santu, halo ho orasaun iha paun eukarístiku.

“Kriasaun mak projeta bá divinasaun bá unifikasaun kriator rasik, nune’e eukaristia mós hun Maromak Nia rasik no motivasaun bá ema atu tau matan bá ambiente no lori ema bá hatene kuida kriatura hotu. Jesus iha eukaristia konvida sarani hotu atu hakle’an Nia reflesaun no kontempla Nia prezensa iha kriatura Maromak nian ne’ebé haleu ema,” Dom Virgílio do Carmo da Silva hateten.

Sarani sira Arkidioseze Metropolitana Díli selebra loron Corpo de Deus, 16 Juñu 2022

Ho ema nia ambisaun obriga ema sobu beleza no furak kriatura Maromak nian ne’ebé iha tiha ona no uainhira ema la halo didi’ak kontribui bá lori dezastre bá komunidade tamba ema la kuida didi’ak natureza.

Nia afirma tan, husi loron ba loron ema sai sasin bá mudansa ne’ebé lais refleta ema nia moris hanesan buat ne’ebé ema haree iha mundu, nune’e mós saida mak akontese no la’o daudaun iha Timor-Leste. Dezenvolvimentu no aumenta infraestrutura sira hanesan uma, estrada no seluk tan iha sidade laran no buat hotu hale’u sidade furak no kapas, maibé uainhira udan sidade Díli laran nakonu ho mota tamba ezgotu sira nakonu ho fo’er no tasi nakonu ho plástiku ne’ebé ema rasik mak soe arbiru.

“Hahalok sira ne’e, hahalok ne’ebé hanoin an de’it no la preokupa ho ema seluk no futuru rai ida ne’e nian,” Dom Virgílio tenik.

Ikus liu Arsebispu husu atu foin-sa’e, estudante no edukadór sira hamutuk ho inan-aman no sarani tomak atu hola iha konsiderasaun importánsia husi eukaristia no ekolojia hodi kontribui bá relasaun di’ak entre ema ho natureza, ema ho ema no liuliu ema ho Maromak.

Advertisement

Jornalista: Vito Salvador