Hatutan.com (20 Juñu 2022), Díli-Sidadaun sira ne’ebé trata pasaporte ho kategoria emerjénsia tenke hein loron rua ka loron tolu maka foin bele foti pasaporte tanba daudaun ne’e server iha Direção Geral dos Serviços de Registo e Notariado (DGSRN) falla ka avaria hela.

Lee Mós : MJ Promete Sosa Fasilidade ba Konservatóriu Munisípiu Díli

Sidadaun sira nakonu iha Direção Geral dos Serviços de Registo e Notariado (DGSRN) Dili hodi trata sira-nia pasaporte, 20 Juñu 2022. Foto/Hatutan.com

Ivanio da Silva Maia, nu’udár sidadaun timoroan ne’ebé forma iha edifísiu DGSRN, Díli, Segunda (20/06/2022), hateten nia ho sidadaun lubun  lamentavel ho atendimentu trata pasaporte tanba sira ona $50.00 bá kategoria semana rua nian, maibé liu semana rua ona pasaporte seidauk sai no parte DGSRN extende tan fali bá loron rua tuir mai.

Sidadaun balun ne’ebé selu tiha ona administrasaun trata pasaporte nian ho kategoria urjente $100 bá loron ida (oras 24 nia laran). Mas, realidade tenke aguenta to’o fali loron tolu ka haat mak foin bele foti pasaporte.

Relasiona ho difikuldade no atrazu hirak-ne’e,  Ivonio da Silva Maia ho sidadaun sira ne’ebé iha interese bá trata pasaporte husu bá DGSRN atu rezolve situasaun ne’e.

Diretór DGSRN, Crisogno da Costa Neto rekoñese prosesu atendimentu bá pasaporte lentu tanba sistema ka  server falla impaktu husi eletrisidade mate-lakan  no seluk fali maka atendimentu bá kliente tenke limita tanba dadus ka istória sei nakonu hela iha Server tanba ne’e atu halais prosesu tenke sosa Server foun.

Server maka sistema komputadór ne’ebé iha atendimentu espesiál atu rai dokumentu  ka data. Server importante atu haruka no simu data ho informasaun pertinente sira.

“Primeiru iha fulan-Maiu nia laran, kliente ne’ebé halo pasaporte liu tiha kapasidade atendimentu tanba bele atinje ema 200 bá leten. Segundu, eletrisidade ne’ebé mate-lakan provoka fó estragu bá mákina prodús pasaporte, inklui mós sistema ka Server tanba bainhira ahi-mate Server mós mate no tenke renova fali dadus ne’ebé iha. Terseiru, istória kliente ne’ebe sei nakonu iha Server presiza hamoos maibé atu halais maka tenke sosa fali Server foun atu bele hamamuk  dadus ne’ebé  antes ne’e iha ona,” Crisogno da Costa Neto hateten.

Daudaun ne’e iha ona solusaun bá problema ne’e, tanba primeiru tékniku konsege hadi’a ona sistema ka Server ne’ebé falla inklui mákina prodús pasaporte, maibé ho kondisaun ida katak tenke iha limitasaun ema.

DGSRN orienta ona bá funsionáriu atu kontinua fó atendimentu iha oras deskansa nune’e bele ajuda lalais kliente ne’ebé presiza pasaporte urjente.

Jornalista   : Carmelita Isaac