Hatutan.com, (21 Juñu 2022), Díli- Órgaun Liga Futebol Timor Leste (LFTL) prontu ezekuta ordem husi órgaun reguladora Futebol Timor Leste hanesan Federasaun Futebol Timor Leste (FFTL) no Governu liu husi Sekretáriu Estadu Juventude no Desportu (SEJD) hodi organiza liga Timorense époka 2022-2023.

Lee mós : LFTL Prolonga Tempu Rejistrasaun Jogadór ba Klube Primeira-Segunda Divizaun

Diretór Relasaun Publika LFTL, Diogo Neto Fraga . Foto/Hatutan.com

Tuir kalendáriu Ofisiál Federasaun Internasionál Futebol (FIFA) no Federasaun Futebol Aziátiku (AFC) nasaun membru sira ne’ebé afilia no opta sistema futebol mundial iha organizasaun mundial futebol nian tenke hakaruk ba ordem no rekizitu ne’ebé iha hodi organiza liga futebol iha kada nasaun tuir padraun FIFA no AFC nian, atu nune’e, labele iha la kuna ruma ne’ebé ikus mai hamosu sansaun ruma bá Federasaun no selesaun nasionál nia partisipasaun iha eventu Rejionál  no internasionál ne’ebé federasaun futebol internasionál sira organiza.

Diretór Relasaun Publika LFTL, Diogo Neto Fraga bá jornalista sira iha nia knaar fatin, sede LFTL, estádiu Munisipál Díli, Tersa (21/06/2022), hateten Liga Futebol iha Timor Leste iha órgaun regulador mak FFTL nune’e LFTL no Klube sira hamutuk ho ajente futebol Timor Leste hein hela para FFTL bele pronunsia buat ruma relasiona ho liga époka 2022-2023.

Advertisement

Nia afirma, LFTL durante ne’e preparadu hela atu enfrenta liga époka ne’e, hahú husi preparasaun tékniku, maibé FFTL no Governu mak sei iha lakuna balun nune’e dada liga ne’e hodi apar ho kalendáriu FIFA no AFC nian nune’e LFTL nafatin hein ordem husi parte FFTL no Governu liu husi SEJD atu bele ezekuta liga futebol époka ne’e.

“Loloos ne’e LFTL ho FFTL iha ona reuniaun maibé kanseladu nune’e LFTL nafatin hein parte FFTL nian atu nune’e LFTL bele aprezenta kestaun tékniku no preparasaun sira ne’ebé durante ne’e halo ona.”  Diogo Neto Fraga hateten.

Haree bá kestaun ne’e prezidente FFTL Francisco Martins da Costa Pereira Jerónimo bá jornalista sira hateten ,FFTL ho SEJD sei realiza enkontru triparti ho órgaun liga atu haree oinsá bele organiza liga époka ne’e.

Nia subliña molok hakat bá enkontru ho parte sura seluk FFTL sei halo uluk lai enkontru entre ezekutivu sira atu iha desizaun id definitivu molok halo enkontru ho governu no órgaun liga.

“Antes ne’e, LFTL manda ona karta atu hasoru malu hodi LFTL bele aprezenta planu orsamentu mo programa sira époka 2022-2023 nian, maibé ha’u bá tiha Vietnam nune’e seidauk realiza.” Francisco Martins da Costa Pereira Jerónimo hateten.

Advertisement

Francisco Jerónimo halo ona despaxu bá sekretáriu jerál FFTL no adjuntu nune’e kleur ka lais enkontru ho órgaun liga sei akontese atu bele haree dezenvolvimentu futebol bá oin.

Jornalista: Vito Salvador

Advertisement