Hatutan.com, (27 Juñu 2022), Díli-Sekretária Estadu Formasaun Profisionál no Empregu (SEFOPE), liuhosi diretór jerál, Paulo Alves, husu bá traballadór timoroan na’in-77 ne’ebé atu bá servisu iha Austrália, liuhosi Seasonal Worker Programe (SMP), atu labele hatudu ka prátika atividade grupu Arte-Marsiál (GAM) nian iha ema nia nasaun.

Lee Mós : Falsifika Asinatura, Funsionáriu SEFOPE Na’in-10 Simu Pena Suspensaun

Traballadór Timoroan sira ne’ebé atu bá servisu iha Austrália. Foto/Hatutan.com

“Ha’u atu husu bá ita-boot sira, arte-marsiál importante tebetebes. Ita boot sira, ha’u husu bá alin sira, bá inan-aman sira, SEFOPE nia programa dezde inísiu to’o agora, seidauk akontese arte-marsiál baku malu iha ema nia-rain. Ha’u afirma ida ne’e bá ita boot sira. Ida ne’e mak akontese, ami sei haruka fila,” Diretór jerál SEFOPE, Paulo Alves, hateten durante serimónia asinatura deklarasaun aseitasaun ho família hosi traballadór sira, iha Otél Tower Bar, iha Fatuhada, Díli, Segunda (27/06/2022).

Paulo Alves konta mós kona-bá ninia envolvimentu iha grupu arte-marsiál katak, bainhira sei tempu okupasaun Indonézia iha TL, nia mós involve aan iha atividade sira arte-marsiál nian hanesan treinamentu iha grupu balu iha ema nia rain.

“Mais bainhira ha’u fila mai Timor, ha’u preokupa ho hahán, ha’u han saida. Ha’u labele hatudu ha’u nia baruk-teen. Mais kuandu ha’u preokupa ho aban han saida, imi preokupa ho imi nia moris, imi preokupa ho imi nia oan nia  moris, imi preokupa ho imi nia ferik oan nia vida moris, imi preokupa ho imi nia uma-laran nia moris,” hateten Paulo Alves.

Tuir diretór jerál SEFOPE esklarese katak involve aan iha grupu sira arte-marsiál ne’e, direitu fundamentál ema ida-idak nian, maibé tenke utiliza hanesan ezersísiu fízika di’ak ida bá saúde umana, atu moras bele hasees aan hosi moris oioin, inklui atu salva ema seluk hosi situasaun perigu. Maibé iha TL, juventude sira uza fali hodi baku malu.

“Bá Australia, atributu sira ne’e, bele rai hotu iha Timor bá, imi ba hanesan timoroan, ida moras karik, haree malu hanesan maun-alin. Bá hanesan timoroan, fila mós tenke haree malu hanesan timoroan nafatin,” Paulo Alves fó hanoin.

Tuir kontratu, kandidatu traballadór sira ne’e sei servisu iha área Ortikultura nian iha Austrália durante fulan-sia (9). Tanba ne’e, SEFOPE husu atu labele vióla vistu iha ema nia nasaun, no bainhira kontratu remata tenke fila-fali mai Timor-Leste.

Iha fatin hanesan, Diretór Nasionál ba Empregu Exterior (DNEE), Filomino Soares, dehan, programa kontinuasaun bá rai li’ur ne’e, la’ós fásil. Maibé presija ideia hosi sidadaun sira hotu-hotu nian, liu-liu família traballadór sira nian atu bele iha kompromisu ida.

“Husu aseitasaun ida hosi família traballadór sira, tantu inan-aman, tantu mós hosi katuas-oan ou ferik-oan sira ne’ebé mak ohin prezensa iha ne’e, signifika katak ita boot sira prontu atu husik ita boot nia oan, ita boot nia katuas oan, ita boot nia ferik oan, sai hosi ita boot nia leet para bele ba servisu iha Australia,” diretór Fimomino Soares esplika.

Servisu iha Austrália, la’ós Governu mak obriga, maibé Governu kria de’it kondisaun no oportunidade sira ne’e, traballadór sira mak aproveita. Tanba ida ne’e, presiza iha aseitasaun konjunta ida, liuhosi halo asina ba deklarasaun, nune’e bainhira loron ikus mosu problema ruma, labele duun ba malu, maibé tuur hamutuk hodi buka solusaun.

Kandidatu traballadór hamutuk na’in-77 ne’e, kompostu hosi feto 21, no mane hamutuk 56.

Tuir planu iha semana oin, traballadór sira-ne’e sei viajen hosi TL bá Austrália. Ho nune’e, traballadór timoroan sira ne’ebé oras ne’e servisu iha Austrália  na’in-2000.

Jornalista: Rogério Pereira Cárceres