Hatutan.com, (30 Juñu 2022), Díli- Estadu Timor-Leste liu husi despaxu Prokuradór Jerál Distritu Díli ho NUC 0112 PNSIK deside liberta total karreta “sukata” sira ne’ebé empreza importadór sira hatama husi Austrália mai Timor-Leste.

Lee Mós : Presiza Lei Espesífiku Atu Regulariza Importasaun Karreta “Sukata”

Autoridade kompetenti sira liberta karreta “sukata” ne’ebé durante ne’e estasiona hela iha Portu Díli. Foto/Hatutan.com

Diretór Nasional Alfándega, Armindo dos Santos bá jornalista sira iha Portu Díli, Kinta (30/06/2022), informa ekipa konjunta kompostu husi Alfándega, Polísia Nasionál Servisu Investigasaun Kriminál (PNSIK) no  Servisu Nasionál Intelijénsia (SNI)  hasai ona Police line sira ne’ebé mak tau bá iha karreta “sukata” sira ne’ebé durante ne’e estasiona hela iha arredores Portu Díli hodi entrega bá karreta na’in-sira.

Ekipa konjunta tau Police line ba iha karreta “sukta” hamutuk 138 ne’e tamba iha kestaun balu ne’ebé maka importadór haruka karreta sira ne’ebé mai karreta sira ne’e barak liu mak ida ne’ebé maka soke aat tiha ona mak lori mai entaun husi parte instituisaun sira hakarak atu hadi’a oinsá para importadór sira atu haruka sasán mekadoria liuliu karreta sira ne’ebé atu mai Timor-Leste ne’e karreta sira ne’ebé prienxe rekizitu no tuir dekretu lei númeru 30/2011 ne’e tenke ho kondisaun ne’ebé mak di’ak.

Nia afirma iha prosesu ida ne’e, husi operasaun konjunta ne’ebé instituisaun relevante iha aprezenta situasaun ne’e bá iha PNSIK no PNSIK halo karta bá iha prokuradór atu atu haree situasaun ne’e hodi tetu katak karreta sira ne’e atu halo apreensaun ka atu halo oinsá para bele hetan solusaun.

Lee Mós : Kazu Karreta “Sukata” ho Importa Ai-moruk Husi Farmásia Moris Foun Submete Ona Bá MP

Liu husi karta PNSIK nian ne’e ikus mai iha despaxu ida husi prokurador jerál distritu Díli ho númeru NUC 0112 PNSIK hateten atu liberta total bá mekadoria sira ne’ebé mak oras ne’e iha portu Díli.

Total karreta ne’ebé oras ne’e iha portu Díli hamutuk 138 no husi ne’e karreta sira ne’ebé soke hamutuk 95 no karreta sira ne’ebé ho kondisaun di’ak hamutuk 43 no bazeia ba despaxu husi prokuradór ohin ekipa konjunta hasai Police line atu empreza importadór sira hahú halo ona prosesu administrativu liga ho servisu Customs nian oinsá para empreza sira halo prosesu bá tasa ho tan dokumentu sira seluk.

Diretór Operasionál Alfándega ne’e hatutan iha empreza balun ne’ebé sosa tiha ona karreta “sukata” sira iha nasaun li’ur no oras ne’e iha dalan mai Timor-Leste tamba ne’e parte Alfándega seidauk iha data serteza atu karreta hirak ne’e too Timor Leste no bazeia ba despaxu ne’ebé iha parte Alfándega sei la hapara iha portu no sei lao tuir prosesu normal.

Lee Mós : TL Atu Sai Fali Ona Fatin Lixu Bá Karreta “Sukata” Husi Austrália

Jornalista: Vito Salvador