Hatutan.com, (30 Juñu 2022), Díli– Jornalista, xefe redasaun no na’in bá mídia online  The Oecusse Post (TOP), Raimundos Oki, sai arguidu bá kazu violasaun segredu justisa relasiona ho publikasaun notísia  sira kona-bá kazu Topu Honis iha Rejiaun Administrativa Espesiál Oé-Cusse Ambeno (RAEOA).

Jornalista Raimundos Oki hamriik iha arredores Edífisiu PCIC. Foto/Hatutan.com

Ho astatu hanesan arguidu, Raimundos Oki, Kinta (30/06/2022), haleu tuku 09:00 Otl, nia bá presta ona deklarasaun iha Policia Ciêntífica e de Investigação Criminal (PCIC).

Notifikasaun bá inkéritu hosi PCIC bá jornalista Raimundo Oki ne’e, tanba simu delegasaun kompeténsia hosi Prokuradoria Jerál Repúblika (PGR-sigla Portugés) ka Ministériu Públiku (MP) ho Número Único Crime (NUC) 0054/21.PGGCC.

Jornalista The Oecusse Post (TOP), Raimundos Oki, hateten, PCIC liuhosi nia investigadór sira, kontakta bá nia katak, atu bá presta deklarasaun iha PCIC  kona-bá Criminalidade Violente e Organizada ka halo violasaun bá segredu justisa, kona-ba kazu visum obrigatóriu hasoru labarik sira iha Topo Honis, ne’ebé TOP publika.

Advertisement

“Depois mai to’o iha PCIC, saida mak sira hatete bá ha’u katak, ministériu públiku delega kompeténsia bá iha PCIC, hodi halo prosesu investigasaun bá kazu ida naran Criminalidade Violente e Organizada. Mas ohin, konforme informasaun hosi investigadora katak, kona-bá kazu krime violasaun segredu justisa. No ikus mai, investigadóra hatete bá ha’u katak, sira konstitui ha’u nu’udár arguidu bá iha kazu violasaun segredu da justisa,” Raimundos Oki, hateten bá jornalista sira, hafoin hato’o nia deklarasaun bá investigadóra iha PCIC, Caicoli.

Raimundo Oki, dehan, nia rasik mós lahatene segredu justisa ida oinsá, tanba ne’e maka, durante iha prosesu inkéritu ne’e nia uza direitu nonook.

“Ha’u dehan, sé segredu justisa liga kazu kona-bá Visum Obrigatóriu bá labarik orfanatu sira Topo Honis, ha’u hanoin, buat hotu-hotu fó sai tiha ona bá públiku. Notísia eskrita, video, buat hothotu fó sai tiha bá públiku, ne’ebé ohin ha’u uza direitu, hili dalan nonook. Depois ita sei hein prosesu tuir mai, lahatene, sé bá to’o tribunál mak ita bele esklarese ba malu,” hateten Raimundo Oki.

 “Ha’u lahatene konteúdu oinsá-oinsá, tanba ohin ha’u hili direitu nonok. Ne’ebé, aban-bainrua karik prosesa ba oin, ba prosesu julgamentu iha tribunál, depois mak ita foin hatene, violasaun segredu justisa oinsá-oinsá, mais ohin nia karta mak ne’e, konstitui ha’u nu’udár arguidu ba kazu violasaun segredu justisa,” Oki hateten tán.

Jornalista no na’in bá média online The Oecusse Post (TOP) ne’e afirma, ho notifikasaun hosi PCIC ne’e, hanesan sidadaun nia sempre koopera ho justisa.

Advertisement

“Jornalista mós sidadaun hotu ka lae, ne’ebé, ha’u nu’udár jornalista, depois nu’udár sidadaun ida, tanba ne’e mak ohin ha’u mai koopera. Horiseik, sira telefone ha’u dadeer, ohin, molok tuku 09:00, ha’u iha ne’e tiha ona, ne’e hatudu katak, ita tenke koopera para, atu haree kazu ne’e nia lala’ok ne’e oinsá,” Raimundo Oki afirma.

Prosesu inkéritu ne’e, hala’o hosi investigadóra PCIC, Romenia R. Magno, hahú hosi tuku 09:00 Otl to’o tuku 09:30, iha edifísiu PCIC, Caicoli, Dili.

Bainhira jornalista sira atu halo konfirmasaun ho autoridade sira PCIC nian kona-bá kazu ne’e, maibé parte PCIC seidauk bele fó komentariu tanba sei iha faze inkeritu.  

Jornalista: Rogério Pereira Cárceres

Advertisement