Connect with us
Pakote Ahi

Polítika

KHUNTO Moris Atu Dignifika no Luta Bá Povu Nia Moris Di’ak

Published

on

Hatutan.com, (04 Jullu 2022), Díli- Prezidente Partidu Kmanek Haburas Unidade Nasional Timor Oan (KHUNTO), Armanda Berta dos Santos, hateten KHUNTO moris atu dignifika no luta bá povu nia moris di’ak.

Sede Nasionál Partidu KHUNTO. Foto/Hatutan.com

Armanda Berta hateten lia hirak ne’e iha nia diskursu aniversáriu partidu KHUNTO nian bá dala-XI ne’ebé hala’o iha sede nasionál partidu KHUNTO   iha Manleuana, Díli, Segunda (04/07/2022). Tema sentrál bá aniversáriu KHUNTO tinan ne’e maka: “Hamutuk ita ida deit, hodi hamatak, haforsa no haburas liutan partidu KHUNTO, ba futuru ne’ebé kmanek liu, nakonu ho esperansa”.

Armanda Berta afirma, partidu KHUNTO moris ho vizaun no misaun rasik atu servi bá povu nia moris no defende interese povu nian hodi hatuur interese nasionál as liu interese sira seluk.

Partidu KHUNTO eziste iha 2011 too ohin loron tamba hakarak dignifika no luta bá povu nia moris di’ak no oinsá hasai povu husi mukit no kiak iha Timor-Leste.

Advertisement

“Ohin ita selebra partidu KHUNTO nia tinan ba dala-XI, ne’e hatudu ita-nia partidu hakat tan pasu ida bá oin no marka istória iha evolusaun polítika Timor -Leste.” Armanda Berta dos Santos hateten.

Partidu KHUNTO sei tane as interesse Estadu nian no sei garante nafatin konfiasa povu nian. Sasidik sira ne’ebé partidu enfrenta durante ukun sai hanesan lisaun atu prepara an di’ak liután hodi enfrenta dezafiu sira iha futuru.

Husi lisaun sira ne’ebé partidu KHUNTO iha, tuir Armanda Berta, sei sai lalenok ida atu iha futuru partidu bele deside nia porfie polítika no karater polítika inklui vizaun foun atu hakat bá oin nu’udár forsa polítika ida ne’ebé iha vontade no kapasidade atu servi povu no nasaun.

“Mai ita hametin unidade nasionál hahú husi baze, ho nune’e ita bele garante implementasaun polítika partidu nian ho di’ak no metin liután. Ita kaer metin prinsipiu no valores partidu KHUNTO ne’ebé mós hatuur iha estatutu polítika partidu nian katak tane o rain, o emar no o lisan ne’ebé kaer metin bá doutrina  fé, esperansa no karidade,” Armanda Berta tenik.

Dirijente másimu partidu KHUNTO nian fó pose no halo juramentu bá estrutura juventude partidu nian. Foto/Hatutan.com

Prezidente partidu KHUNTO ne’e hatutan bá kuadru, militante no simpatizante hotu iha responsabilidade bá partidu nia moris tamba ne’e hamutuk servisu lori partidu bá atinje metas ne’ebé iha tuir misaun no vizaun partidu nisn.

Iha parte seluk, konselleiru másimu  partidu KHUNTO, José dos Santos “Naimori Bucar” hateten  prinsípiu unidade nasionál ne’ebé partidu KHUNTO hanorin bá nia militante sira mak liu husi juramentu.

Advertisement

Iha juramentu mak partidu KHUNTO hanorin bá nia militante no simpatizante sira atu sai na’in bá partidu hodi  la haree ba kór, rasa no grupu.

“Mai juramentu iha partidu KHUNTO ne’e sai ona família boot ida iha partidu KHUNTO, ida ne’e mak atu hatudu katak ami unidade nasionál, ami la mai hanesan foto copy maibé mai hanesan nain bá partidu ida-ne’e,” José dos Santos “Naimori Bucar” hateten.

Lider supremu partidu KHUNTO ne’e argumenta juramentu ne’ebé partidu KHUNTO halo atu hatudu katak militante se deit mak halo ona juramentu nia sai ona nain bá partidu no liu husi juramentu atu kria estabilidade iha nasaun no ida ne’e sei kesi ema nia relasaun atu sai belun no maualin.

Prezidente juventude Partidu KHUNTO, Augosto da Silva hateten, hanesan prezidente juventude hato’o felisitasaun bá aniversáriu partidu KHUNTO no iha esperansa atu  KHUNTO sai mahon no nabilan bá timoroan tomak.

Nia afirma, hanesan prezidente juventude partidu nian ne’ebé simu posse husi lider supremu partidu nian no prezidente partidu nian kompremetidu atu servisu makas hodi halo koordenasaun di’ak ho juventude hotu  hodi banati bá prinsípiu no vizaun no misaun partidu KHUNTO  nian iha sosiedade hodi haboot liután KHUNTO ida ne’ebé kmanek liu.

Advertisement

“Ami nia parabéns ba aniversariu partidu KHUNTO nian, ami sei servisu makas atu lori susesu no progresu bá partidu hahú ohin no bá futuru,” Augosto da Silva hateten.

Jornalista: Vito Salvador

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Polítika

Presiza Konstrui Fatin Própriu Atu Fasilita Fornesimentu Kombustível iha Sentrál Elétrika Hera-Betano

Published

on

Hatutan.com, (26 Marsu 24), Díli—Deklarasaun politíka bankada KHUNTO iha Parlamentu Nasionál (PN),  rekomenda bá Governu katak, presiza duni atu investe hodi konstrui fatin própriu bá fornesimentu kombustível iha Sentrál Elétrika Hera no Betano.

(more…)

Kontinua Le'e

Polítika

Deklarasaun Polítika Bankada FRETILIN: Tanbasá TL Seidauk Bele Manan Greater Sunrise

Published

on

Hatutan.com, (25 Marsu 2024), Díli– Bankada Parlamentár FRETILIN, Segunda (25/03/2024), halo deklarasaun polítika iha plenária Parlamentu Nasionál hodi aprezenta sira-nia duvida no kestiona projetu Greater Sunrise ne’ebé to’o ohin loron seidauk iha finalidade.

(more…)

Kontinua Le'e

Polítika

20-21 Abríl, Kongresu Nasionál Partidu KHUNTO Bá Da-III

Published

on

Hatutan.com, (21 Marsu 2024), Díli- Partidu Kmanek Haburas Unidade Nasionál Timoroan (KHUNTO) iha loron 20 to’o loron 21 fulan-Abríl, tinan ne’e, sei realiza kongresu nasionál bá da-III hodi halo reestruturasaun no prepara estratéjika polítika partidu hodi enfrenta dezafiu sira iha futuru.

(more…)

Kontinua Le'e
Advertisement

Trending