Hatutan.com, (05 Jullu 2022), Díli—Parlamentu Nasionál iha loron 04 fulan jullu tinan ne’e, aprova ona Proposta Rezolusaun númeru 16/V(4ª) – Ratifica para Adesao a Conveçao sobre os direitos das pessoas com deficiência no Proposta Rezolusaun númeru 17/V(4ª) – Ratifica para o Protocolo opcional à convenção sobre os direitos das pessoas com deficiência, ho votu a favor 41, kontra 0 no abstensaun 0.

Ema ho Defisiénsia sira asiste direta diskusaun no votasaun ba Proposta Rezolusaun Rua ba Ema ho Difisiénsia iha Parlamentu Nasionál, Segunda (04/07/2022). Foto/PN.

Diskusaun no votasaun ne’e asiste direta hosi ema ho defisiénsia sira no organizasaun sira ba asuntu defisiénsia iha Timor-Leste.

Lee Mós: Estadu Presiza Aselera Ratifikasaun Konvensaun Internasionál Direitu Bá Ema ho Defisiénsia

“Hafoin aprovasaun, Prezidente Parlamentu Nasionál, Aniceto Longuinhos Guterres Lopes, hateten Parlamentu Nasionál sei envia rezolusaun ne’e hodi hetan promulgasaun hosi Prezidente Repúblika,” Hatutan.com sita komunikadu.

Iha sesaun plenária ne’e mós aprova Proposta Rezolusaun númeru 14/V(4ª) – aprova a Convenção entre a República Portuguesa e a República Democrática de Timor-Leste para evitar a dupla tributação e prevenir a evasão fiscal em matéria de impostos sobre o rendimento, assinada em Liboa, em 27 de setembro de 2021.

Prezidente Parlamentu Nasionál mós lee mensajen Prezidente Repúblika nian ba povu Timor-Leste relasiona ho vetu lei responsabilidade ba Prezidente Repúblika.

Jornalista: Vito Salvadór