Hatutan.com, (06 Jullu 2022), Díli-Prezidente Repúblika (PR), José Ramos-Horta, Kuarta (06/07/2022),  iha Palásiu Prezidensiál, hasoru malu ho Klibur Musulmana Timor Leste (KMTL) hodi ko’alia bá malu no introdús promosaun fraternidade umana.  

Lee Mós : Fraternidade Umana Konfirma Vokasaun TL ba Rekonsiliasaun

Klibur Musulmana Timor Leste (KMTL). Foto/Hatutan.com

Santu Padre Papa Francisco ho Grand Imán hosi Meskita Al-Azhar, Kairu, halo  ona akordu asina dokumentu Fraternidade Umana iha Abudabi iha tinan 2019 no Parlamentu Nasionál Timor aseita ida-ne’e nu’udár dokumentu ida ne’ebé obriga Estadu ho relijiaun hotu-hotu sei halo tuir ida-ne’e “Promosaun Fraternidade Umana”.

Sekretária Klibur Musulmana Timor-Leste, Ida Hadia Sagran,  hateten Timor-Leste nu’udár nasaun ida ne’ebé nia toleránsia relijiozu sira  sai ezemplu bá umanidade hotu iha mundu.

Advertisement

“Ami agradese tebes tanba to’o ohin loron ami servisu hamutuk ho maluk timoroan sira seluk iha munisípiu maske relijiaun la hanesan, ami laiha diskriminasaun, ami servisu hamutuk ho di’ak, la’o ho di’ak no ami fó valor as ba amizade, fraternidade no toleránsia,” Ida Hadia Sagran hateten hafoin hasoru malu ho Prezidente Repúblika (PR), José Ramos-Horta.

KMTL eziste dezde 2002 iha fundasaun ANU’UR nia mahan  ho nia knaar mak servisu hamutuk ho entidade no relijioza sira seluk hodi halo servisu bá atividade ne’ebé liga  ho valor  kultura, umanizmu, toleránsia, amizade no fraternidade.

“Too ohin loron ami servisu indivíduu, Governu seidauk fó apoiu finanseiru ruma bá KMTL hanesan imi haree iha Kampun Alor fa’an nasi-kuning sira ne’e mak fó suporta no suporta ami tau netik oituan-oituan hodi ami bele hala’o ami nia atividade,” Ida Hadia Sagran hateten.

Asesór Prezidente Repúblika, Martinho Germano Gusmão hateten, asuntu ida seluk ne’ebé ohin aborda nu’udár sentru bá enkontru ida ne’e kona-ba promosaun fraternidade umana.

KMTL nia vizita parte kampaña fraternidade umana ne’e duni liu husi fraternidade umana ne’e Igreja Katólika hasoru ona Kardeál, padre lubuk ida no komunidade protestante nia mós hasoru ona agora musulmana sira mai hasoru Xefe Estadu, asuntu ida nu’udar kooperasaun ne’ebé Xefe Estadu husu sira atu kontribui asuntu fraternidade umana.

Advertisement

“Ita hatene sira-nia sorumutuk ho PR nu’udár parte ida atu promove no fó sira nia aseitasaun bá dokumentu Fraternidade Umana ne’ebé Timor-Leste adopta” Martino Gusmão hateten.

Prezidente Repúblika (PR), José Ramos-Horta husu KMTL servisu hamutuk ho timoroan hotu maske ho relijiaun ne’ebé la hanesan, maibé tenke servisu hamutuk lori Timor-Leste nia naran ba oin.

Jornalista: Vito Salvador

Advertisement