Hatutan.com, (08 Jullu 2022), Díli- Empreza Nasionál ETO Telco sai nu’udár manan na’in bá konkursu direitu eskluzivu ofisiál broadcasting kopa mundiál Qatar 2022 iha Timor-Leste.

Jerente sira ETO Telco halo konferénsia imprensa. Foto/Hatutan.com

Responsável programasaun ETO Telco, Jesuina Gusmão bá jornalista sira iha edifisiu ETO Telco, Fatuhada, Díli, Sesta (08/07/2022), informa bá adeptus kopa Mundiál Qatar 2022 iha teritoria Timor-Leste katak, baseia bá rezultadu konkursu kopa Mundiál Qatar 2022, Empresa ETO Telco mak hetan direitu eskluzivu ofisiál broadcasting kopa Mundial Qatar 2022 bá teritoria Timor-Leste ne’ebé sei realiza iha Qatar komesa husi loron 21 fulan-Novembru to’o loron 19 fulan-Dezembru 2022.

Nia afirma transmisaun direita kopa Mundiál Qatar 2022 ne’e ETO Telco Timor-Leste sei halo transmisaun direita bá total jogus hamutuk 64 no adeptus no telespekador sira sei asiste liu husi Kanal ETO+ kanal  ETO Sport (bá Jogu ne’ebé iha oras hanesan).

Jerente ne’e hatutan, transmisaun bá jogu Kopa Mundiál Qatar 2022 adeptu sira no amantes futebol sira sei akompanha liu husi maneira tolu bá dahuluk nian Iha transmisaun jogu direita sei  liu husi plataforma Eskluzivu hanesan, Direitu Eskluzivu Free To Air/ De borla ka la selu, liu husi kanál no frekuencia UHF ho kobertura munisípiu 12 no mós RAEOA.

Daruak nian mak amantes no adeptus bolamania sira sei asiste liu husi Direitu Eskluzivu Televizaun por asinatura/pay TV ka prepago, liu husi transmisaun Dijital tereterial ho receiver ETO Telco, espesialmente munisípiu Díli .

Datoluk liu mak Direitu Eskluzivu Internet Streamming liu husi plataforma TV Timor bá territóriu Timor-Leste.

Transmisaun direita kopa Mundiál Qatar 2022 ida-ne’e hetan mós suporta masimu husi patrosinadór prinsipál GOTA Timor-Leste, GOTA empresa bebidas ne’ebé ho kualidade di’ak iha Timor-Leste.

“Mai ita valorize no uza ita-nia kanál lokál hanesan ita-nia kanál favoritu liu husi ita-nia empresa ETO Telco,” nia hateten.

Jerente jeral GOTA, Mario Martinho da Silva hateten, nu’udár empreza nasionál bá investimentu bee GOTA ho orgullu sai nu’udár patrosinadór bá jogu kopa Mundiál Qatar 2022 tamba GOTA hakarak kontribui lori divertimentu bá sosiedade Timor-Leste liu husi kanál Eto+.

“GOTA nudar produtu bee hemu iha Timor Leste sei nafatin apoiu transmisaun direita ba aktividade despostu sira iha kanal Eto+ atu anima sosiedade,” Mario Martinho da Silva hateten.

Jerente ETO Telco, Edmundo Freitas Lopes, hateten total orsamentu ne’ebé ETO Telco iha hodi sosa no manan konkursu bá direitu eskluzivu ofisiál broadcasting kopa mundiál Qatar 2022 konfidensiál no sei la halo anúnsiu bá públiku tamba bele prejudika konkursu sira tuir mai.

Nia afirma ETO Telco tuir konkursu transmisaun kopa Mundiál Qatar 2022 bá plataforma tolu (3) mak hanesan Free to Air, TV prepagu no ida seluk mak direitu bá internet Streamming.

“Ami ETO Telco oras ne’e seidauk iha konkordansia ho TV nasionál ruma bá transmisaun kopa Mundiál Qatar 2022 no ida ne’ebé deal ona ho ami mak Internet Streamming ho TV Timor,”  Edmundo Freitas Lopes hateten.

Jerente ida husi ETO Telco ne’e mós hatutan preparasaun tékniku sira oras ne’e lao hela no sei iha tan fulan-haat (4) atu ETO Telco halo preparasaun másimu liután no kona-bá kestaun stock reciver parte empreza nian hahú halo order  ka hameno tan  atu asegura labele akontese failansu hanesan eventu sira antes ne’e.

“Tuir lei internasional bá broadcasting ETO Telco konkorre bá territóriu Timo- Leste no lolos ne’e so ETO Telco de’it mak fó sai jogu kopa Mundiál Qatar 2022 iha Timor-Leste. Infelizmente sei iha operador seluk ne’ebe tama iha Timor-Leste no ida ne’e fó prejuizu bá ETO Telco, maibé ida ne’e parte Governu nian kompetensia liu husi Autoridade Nasional Komunikasaun mak tenke tau atensaun bá ida ne’e hodi asegura no regulariza operadór sira ne’ebé halo atividade iha Timor-Leste,” Edmundo hateten.

Atu fó hanoin de’it katak ETO Group antes ne’e halo ona servisu lubuk ida hodi fornese divertimentu ba sosiedade Timor-Leste liu husi transmisaun direita ba iha kopa EURO 2016 (Direito televisaun por asinatura), kopa EURO 2020 (Direitu Eskluzivu), kopa Mundial Rusia 2018 (Direito Eskluzivu) no oras ne’e dadaun bá kopa Mundiál Qatar 2022 (Direitu Eskluzivu).

Jornalista: Vito Salvador