Hatutan.com, (15 Jullu 2022), Díli—Prezidente Komité Olímpiku Internasionál (IOC, sigla portugés), Thomas Bach, kongratula ka hato’o parabéns bá Francisco Kalbuadi Lay ne’ebé re-eleitu hanesan Prezidente Komité Olímpiku Nasional Timor Leste (CONTL) períudu 2022-2026.

Prezidente Komité Olímpiku Internasionál (IOC, sigla portugés), Thomas Bach. Foto/ IOC.

“Ami hakarak hato’o ami nia kongratulasaun ka parabéns bá ita-boot ne’ebé re-eleitu nu’udár Prezidente CONTL,” Thomas Bach hato’o liu hosi karta komunikadu ne’ebé Hatutan.com asesu, Sesta (15/07/2022).

Lee Mós: Prezidente Repúblika Kondekora Atleta ho Treinadór Sira ho Medalla Méritu

Lori IOC nia naran, Thomas Bach hato’o hosi sidade Lausanne, Suitsland bá Francisco Kalbuadi Lay  ho  esperansa boot bá buat hotu di’ak iha tinan sira mai ne’e.

Advertisement

Alende ne’e  Thomas Bach fiar katak kooperasaun ne’ebé estabelese ona sei sai forte liután bá promosaun no dezenvolvimentu olímpiku nian.

Kongratulasaun hanesan mós hato’o hosi prezidente Association of National Olympic Committees (ANOC), Robin Mitchell ho nia Sekretáriu Jerál, Gunilla Lindberg bá Francisco Kalbuadi Lay, ne’ebé re-eleitu hanesan prezidente CONTL.    

Liu hosi kongresu nasionál CONTL ne’ebé hala’o iha Salaun João Paulo II, Díli, 14 Juñu 2022, federasaun hamutuk 21 fó fiar hodi hili Francisco Kalbuadi Lay lidera CONTL  bá mandatu da-ruak  períudu 2022-2026.

“Ha’u agradese tebes bá konfiansa no hotu-hotu konkorda, katak estrutura ne’e kontinua no ha’u lidera nafatin. Husu tulun nafatin ba federasaun hotu-hotu bele tau-liman hamutuk, nune’e mós husu bá ema hotu-hotu nia apoiu liu-liu Governu ho Prezidente Repúblika,” Francisco Kalbuadi Lay hateten hafoin re-eleitu iha kongresu CONTL.

Jornalista: Vito Salvadór

Advertisement