Hatutan.com, (12 Jullu 2022), Díli- Ajénsia Internasionál Kooperasaun Korea nian (KOICA) iha Timor-Leste apoia millaun $5 bá implementasaun projetu harii rede manorin istória liu husi formasaun bá manorin sira kona-bá istória ne’ebe iha relasaun ho prosesu harii dame no rekonsiliasaun iha Timor-Leste.

Diretór Ezekutivu CNC, Hugo Fernandes akompaña MEJD Armindo Maia. Foto/CNC,I.P

Projetu ida ne’e hahú implementa iha tinan ne’e ho durasaun tempu tinan tolu, liu husi servisu hamutuk entre Ministériu Edukasaun Juventude no Desportu (MEJD), UNESCO, Centro Nacional Chega (CNC) inklui KOICA.

“Komponente prinsipál husi projetu ne’e maka oinsá estabelese rede profesór sira  istória no dame nian iha TL liu husi formasaun hodi prodús manual bá profesór sira, tanba ne’e iha komponente boot tolu iha implementasaun projetu ne’e maka primeiru hahú formasaun bá profesór sira, segundu apoiu dijitalizasaun arkiva no terseiru apoiu jestaun biblioteka ho kondisaun di’ak,” Diretór Ezekutivu CNC, Hugo Fernandes hateten bá jornalista sira hafoin lansa projetu implementasaun rede manorin istória iha Otél Novo Turizmu, Díli, Tersa (12/7/2022).

Ministru Edukasaun, Juventude no Desportu (MEJD), Armindo Maia, konsidera projetu refere importante tebes bá manorin istória sira tanba relasiona ho prosesu harii dame no rekonsiliasaun iha Timor-Leste.

“Hahú iha tinan 2000-2001 iha eskola sira hanorin ona matéria istória, maibé barak maka sei hanorin istória husi Indonézia bazeia bá kurríkulu ne’ebé iha, tanba ne’e presiza hatama mós iha ita-nia kurríkulu istória liu-liu kona-bá elementu dame no rekonsiliasaun ne’ebé sei aplika bá 3 siklu a to’o Ensinu Sekundáriu,” Ministru Armindo Maia hateten.

MEJD sei kontinua apoiu hodi enkaixa elementu dame no rekonsiliasaun iha kurríkulu MEJD nian.

Jornalista : Carmelita Isaac