Hatutan.com, (13 Jullu 2022), Díli—Polísia Nasionál Timor-Leste (PNTL) liuhosi Unidade Patrullamentu Fronteira (UPF), Kompañia Postu Mozon, asegura sasan kultura ne’ebé timor oan sira tenta halo transaksaun ilegál iha liña fronteira.

Sasan kultura ne’ebé UPF halo apreensaun iha Fronteira, Kuarta (13/07/2022). Foto/PNTL.

Komandante UPF, Superintendente Euclides Belo deklara, sasan kultura hirak ne’e UPF hetan liuhosi operasaun rutina iha fronteira terrestre Timor-Leste ho Indonézia.

Lee Mós: UPF Detein Timor-oan Na’in-Haat Hatama Gazolina Ilegál

“Ohin dader tuku 03:40, ita nia ekipa patrulla UPF Postu Mozon halo operasaun iha área Lessu Maliana no konsege asegura sasan kulturál timór nian, osan me’an, ai-moruk inklui motór tipu KLX 2 ne’ebé sidadaun sira uza no tenta halo transaksaun ilegál iha área fronteira,” Hatutan.com sita deklarasaun Komandante Euclides Belo iha komunikadu. 

Komandante ne’e dehan, sasan hirak-ne’e sei deskuñesidu hela tanba na’in halai tama fali ba área Indonézia nian no membru UPF sira la konsege kaptura.

Sasan hirak ne’e asegura ona iha kompaña Alfa Tunubibi, hafoin sei halo auto apreensaun hodi asegura iha Komandu PNTL Munisipiu Bobonaro hodi halo Prosesu kontinuasaun ba iha Ministériu Públiku.

Evidénsia ne’ebe UPF rekolla mak hanesan Belak Mean 252, Belak Mutin 94, Belak Mean Kiik 477, Belak Mutin Kiik 152, Lafa Mean 58 Lafa Mutin 24, Kaebauk 2, kelu/keke 10, Maskana 60, Morten 165, Mas Padi 19, Brinkus 124, korente mas padi 52, Mas Mean 5.

Iha mós ai-moruk balun hanesan Paramex 494, strip  supertetra 195 Strip, puyer/bintang 180, Dexanltarsen Dexa 400, Strip Inza pakote 124, Konidin pakote 2046 no objetu hirak ne’e prienxe ona auto apreensaun hodi asegura iha Kompañia.

Oras-ne’e membru UPF nafatin halo vizilánsia makas iha fronteira, kontribui ba seguransa públika nune’e bele halo prevensaun hodi garante liña fronteira sai fatin seguru ba ema hotu.

Jornalista: Rogério Pereira Cárceres