Hatutan.com, (15 Jullu 2022), Díli—Comissão Anti-Corrupção (CAC) liu hosi Komisáriu Adjuntu ba Asuntu Servisu Apóiu no Kooperasaun (SAK) Alexandre Freitas, Komisáriu Adjuntu Prevensaun no Sensibilizasaun (PS) Luis Sampaio hamutuk ho estrutura Espesialista Anti-Korrupsaun (EAK) hala’o sorumutu ho Country Representative The Asia Foundation, Héctor Salazar Salame ho nia ekipa tékniku sira iha edifisiu Asia Foundation Bebonuk Díli, Sesta (15/07/2022).

CAC liu hosi Komisáriu Adjuntu ba Asuntu Servisu Apóiu no Kooperasaun (SAK) Alexandre Freitas, Komisáriu Adjuntu Prevensaun no Sensibilizasaun (PS) Luis Sampaio hamutuk ho estrutura Espesialista Anti-Korrupsaun (EAK) hala’o sorumutu ho Country Representative The Asia Foundation, Héctor Salazar Salame ho nia ekipa tékniku sira iha edifisiu Asia Foundation Bebonuk Díli, Sesta (15/07/2022). Foto/CAC.

Objetivu hosi sorumutu ne’e, CAC ho inisiativa hakbesik aan ba The Asia Foundation iha Timor-Leste (TL), hodi rona aprezentasaun rezultadu peskiza hosi ekipa Tatoli! ne’ebé hamahan-an iha The Asia Foundation, kona-bá Levantamentu Persepsaun Públiku tinan 2022 nian iha ne’ebé konteúdu balun ko’alia mós kona-bá persepsaun públiku iha asuntu korrupsaun iha TL.

Lee Mós: Projetu PFMO Sei Fó Asisténsia ba CAC iha Área Prevensaun Korrupsaun

Sorumutu kortezia ida ne’e mós atu hakbesik ativu liu-tan ho ajénsia The Asia Foundation hodi ko’alia detallu ba malu kona-bá kooperasaun servisu ne’ebé antes ne’e ekipa rua komunika ba malu ona hodi tulun CAC halo estudu no peskiza kle’an liu-tán ba asuntu korrupsaun nian.

“Rezultadu sorumutu ohin parte rua konkorda-malu ona ho pontus prioridade ba asuntu peskiza nian ne’ebé sei hala’o uluk peskiza kona-bá persepsaun públika korrupsaun iha TL iha tinan 2022 nian no sei kontinua peskiza sira seluk iha future,” Hatutan.com sita komunikadu.

Peskiza persepsaun públika ne’e nu’udár programa Komisaun nian iha DPS Unidade Estudu Avaliasaun Rísku (URAR) nian ne’ebé hala’o kada tinan lima dala ida, hodi sukat koñesimentu públiku nian iha asuntu korrupsaun.

Estudu ida ne’e realiza ona iha tinan 2015 no kontinua realiza fila-fali iha tinan 2020, maibé ho situasaun pandemia Covid-19 nian sai dezafiu ba Komisaun labele realiza nia programa ne’e iha tinan 2020.

Nune’e, tinan ida-ne’e Komisaun halo esforsu hodi koordena hamutuk ho The Asia Foundation hodi realiza fila-fali.

Jornalista: Carmelita Isaac