Hatutan.com, (15 Jullu 2022), Díli—Tribunál Distritál Díli (TDD) liu hosi leitura sentensa ne’ebé lee hosi juiz prezidi Evangelino Belo, deside aplika pena multa ho montante $90 ba arguidu AR ba krime ezibisaun seksuál no devasa, tanba publika fotografia ninia namorada lezada AB iha média Sosiál.

Foto Ilustrasaun Google.

Razaun Tribunál aplika pena multa tanba, maski provadu katak arguidu halo edisaun ba fotografia lezada nian ne’ebé la merese atu publika, maibé TDD konsidera arguidu la’ós publika iha facebook atu ema hotu haree maibé arguidu uza de’it iha profile WhatsAap arguidu nian.

Lee Mós: JC Alegadu Prizaun Tinan Haat Tanba Halo Violasaun Seksuál Hasoru Menoridade

Tanba ne’e, TDD konsidera aktu arguidu nian la prienxe krime ezibisaun seksuál, nune’e Tribunál absolve arguidu hosi krime refere.

Maibé TDD kondena arguidu ho pena multa $90 ba krime devasa tanba publika lezada nia fotografia iha profile WhatsAap la ho autorizasaun hosi lezada.

Alende ne’e, arguidu nia telefone ne’ebé sai hanesan evidénsia sei husik ba Estadu no la devolve ba arguidu.

Tribunál esplika, bainhira arguidu la selu multa ne’e no kontinua komete tán aktu krime, maka arguidu sei ba kumpri pena prizaun fulan rua.

Antes ne’e, tuir akuzasaun hosi Ministériu Públiku (MP) ne’ebé reprezenta hosi Prokuradór Reinato Berenahak katak, iha loron 19 fulan Janeiru tinan 2021, arguidu ho lezada iha relasaun namora.

Tanba ne’e, bainhira arguidu Video Call ho lezada, arguidu husu atu haree lezada nia isin-lolon no iha momentu ne’ebá arguidu foto tiha no ikus-mai arguidu Video Call husu lezada atu halo relasaun.

Maibé, lezada lakohi tanba ne’e arguidu ameasa hodi publika lezada nia fotografia ho kondisaun isin-tanan iha profile WhatsAap arguidu nian.

Nune’e, MP akuza arguidu ba pratika krime ezibisaun seksuál no devasa ne’ebé previstu iha artigu 181 no 183 hosi kódigu penál TL nian.

Audiénsia julgamentu prezide hosi juiz singulár Evangelino Belo, MP reprezenta hosi Prokuradór Reinato Berenahak no Arguidu sira hetan asisténsia legál hosi Defensór Públiku Jonas Henrique.

Jornalista: Carmelita Isaac