Hatutan.com, (15 Jullu 2022), Díli– Governu to’o agora seidauk selu dívida Timor Telecom (TT) nian ho montante millaun $5 ne’ebé mai nanis husi primeiru Governu Konstitusionál. Nune’e, Ministru Transporte no Komunikasaun (MTK), José Agostinho da Silva, ne’ebé responsabiliza bá área telekomunikasaun nian husu bá jornalista sira atu konfirma direta de’it ho Ministériu Finansa (MF) ne’ebé responsabiliza bá finansa Estadu nian.

Lee Mós : Governu Deve Timor Telecom Millaun $5

Ministru Transporte no Komunikasaun (MTK), José Agostinho da Silva. Foto/Hatutan.com

“Ha’u hanoin, kona-bá asuntu ne’e, na’in-hira (jornalista sira) bele konfirma bá Ministériu Finansas,” Ministru Transporte no Komunikasaun (MTK), José Agostinho da Silva, hatete bá jornalista sira, hafoin sorumutuk ho Primeiru-Ministru (PM), Taur Matan Ruak, iha Palásiu Governu, Sesta (15/07/2022). 

José Agostinho afirma, MTK nia papél ida oinsá maka atu asegura konektividade sira iha área parte Aéreu, Marítima, ho Terrestre nian, bele kontinua funsiona ho hala’o nia operasaun ho di’ak.

MTK nia papal ida  seluk tan maka, atu mellora servisu sira telekomunikasaun nian, atu bele fasilita atendimentu rede internet ne’ebé di’ak bá populasaun sira ka liu-liu utilizadór média sosiál sira iha servisu públiku.

“Kestaun osan Estadu nian ka dívida Estadu nian, bá ministériu relevante maka bele pronúnsia,” José Agostinho da Silva hateten.

To’o notísia ne’e publika  seidauk iha konfirmasaun direta ho Ministru Finansa (MF), Rui Augusto Gomes, tanba sei okupadu hela servisu Governu nian seluk.

Jornalista: Rogério Pereira Cárceres