Hatutan.com, (15 Jullu 2022), Díli—Polísia Nasionál Timor-Leste (PNTL), Komandu Munisípiu Díli, liuhosi Eskuadra Dom Aleixo detein autór na’in-haat iha sela detensaun Caicoli, tanba ezíje ka husu osan ba kondutór Sebastião de Jesus Soares, iha área Tasitoli, to’o halo tán agresaun hodi hakanek vítima iha parte ibun.

Polísia Nasionál Timor-Leste (PNTL), Komandu Munisípiu Díli, liuhosi Eskuadra Dom Aleixo detein autór na’in-haat iha sela detensaun Caicoli, tanba ezíje ka husu osan ba kondutór Sebastião de Jesus Soares, iha área Tasitoli, to’o halo tán agresaun hodi hakanek vítima iha parte ibun. Foto/PNTL.

Komanddante PNTL Munisípiu Díli, Superintendente Xefe Polísia, Henrique da Costa fó-sai kronolojia katak, insidente ho tipu dano no violénsia ne’e mosu iha (09/07/2022), maizumenus tuku 20:00 kalan, ne’ebé involve suspeitu hamutuk na’in-hitu, halo agresaun fízika hasoru vítima Sebastião de Jesus Soares nu’udár kondutór.

Lee Mós: Konfrontu Becusse PNTL Detein Autór Na’in-Lima

Motivu loloos hosi kazu-ne’e, tanba suspeitu sira husu osan ba vítima Sebastião ho valór $2, nune’e bele hola sigaru. Tanba suspeitu sira ema na’in-hitu kedan, nune’e vítima mós konsege hasai osan $2 hodi fó ba sira.

Osan ne’ebé vítima fó, suspeitu sira la uza ba sosa sigaru maibé ba sosa fali tua hodi hemu. Bainhira hemu hotu tiha tua ne’e, suspeitu sira sente seidauk lanu di’ak, entaun ba husu tán iha vítima.

Maibé, tanba vítima lakohi fó, ikus-mai suspeitu sira halo agresaun fízika hasoru vítima to’o rezulta kanek iha parte ibun.

Hafoin insidente ne’e, suspeitu sira halai sees ona hosi lokál kríme no vítima ba kedan iha Eskuadra PNTL Dom Aelixo hodi hato’o keixa. Hatán ba keixa ne’e, ekipa investigasaun halo kedan medida hodi foti vítima nia deklarasaun.

Deklarasaun sira hosi vítima ne’e, parte investigasaun submete kedan ninia prosesu sira ba Ministériu Públiku (MP), hodi husu mandadu buska no detensaun ba suspeitu sira ne’ebé mak identifikadu.

“Entaun, horseik Kinta (14/07/2022), ita hetan despaixu hosi Ministériu Públiku no iha lorokraik, ita ezekuta kedan hodi kaptura suspeitu hamutuk na’in-haat, no sei falta hela na’in-rua, ne’ebé mak agora ita sei buka hela, mais seidauk hetan. Sira ne’e, ita sei detein iha ne’e oras 72, depois aprezenta ba iha MP nune’e bele halo julgamentu,” Komandante PNTL Munisipiu Dili, Superintendente Xefe Polisia, Henrique da Costa, hatete iha kna’ar fatin Komandu Dili, Sesta (15/07/2022).

Suspeitu na’in-haat ne’ebé kapturadu ho naran inisiál RDS, RPAM, JSDS, ADCF. Maibé, sei hela suspeitu na’in-rua seluk no oras-ne’e PNTL buka-tuir hela.

Tuir rezultadu investigasaun hosi autoridade polisiál nian katak, suspeitu sira ne’e involve an mós iha Grupu Arte Rituál (GAR) balun iha Timor-Leste ne’ebé mak involve iha insidente dano agravadu iha área Tasitolu.

“Iha tempu ne’ebá, sira baku vítima, nomós tuda rahun vidru karreta ida ninian. Karreta ne’e hanesan mini-bus ida ne’ebé mak buka pasajeiru iha paste oeste ninian,” Komandante Henrique hateten.

Suspeitu na’in-haat ne’ebé oras-ne’e detein hela iha sela detensaun Komandu Munisípiu Díli, bainhira kompleta ona oras 72, sei submete kedan ba prosesu primeiru interrogatóriu iha Tribunál Distritál Dili (TDD).

Jornalista: Rogério Pereira Cárceres