Hatutan.com, (18 Jullu 2022), Díli— Hafoin simu informasaun hosi Servisu Informasaun Polisia Nasionál (SIPN) ne’ebé destaka iha iha Munisipiu Bobonaro, Komandu PNTL Munisipiu Bobonaro hatun kedan diretiva ba Esquadra Bobonaro, halo pasa revista no asegura sidadaun timor oan mane na’in-rua tanba halo transaksaun ilegál ba kuda haat, iha Suku Oeleu Postu-Administrativu Bobonaro, Munisípiu Bobonaro.

Polísia prende karreta ne’ebé tula kuda haat atu ba fa’an iha Indonézia, Segunda (18/07/2022).Foto/PNTL.

Komandante Munisipiu Bobonaro, Superintendente Polísia Antonino Mauluta deklara, sidadaun ne’e asegura tanba tenta halo transaksaun ilegál iha fronteira terrestre Timor-Leste ho Indonézia.

Lee Mós:Joven Na’in-haat Hatama Mina Ilegál Ho Karreta Privadu

“Iha tuku 14.00 otl, iha Postu-Administrativu Bobonaro nian membru PNTL Esquadra Bobonaro halo pasa revista rutina konsege asegura suspeitu na’in-rua no prende kamioneta ida ho númeru matrikula 57.236, ne’ebé tula evidénsia kuda-haat liu hosi liña fronteira ba nasaun Indonézia,” Hatutan.com sita deklarasaun Komandante Mauluta iha komunikadu.

Suspeitu nain-rua ne’e ho inisiál JS tinan 52, no suspeitu ida seluk naran MS tinan 54 nu’udár eis Xefe Suku no sira na’in-rua hela iha aldeia Tas, Suku Oeleu, Munisipiu Bobonaro.

“Ita halo identifikasaun no sira hola kuda ne’e ho montante osan $1.240, no  kuda haat ne’e hola iha Munisipiu Ainaro ho nia objetivu lori ba fa’an iha Atambua-Indonézia,” nia esplika.

Horiseik to’o ohin, Komandu Munisipiu servisu koletivu kaptura ona timor-oan na’in-ualu no sei falta tán seluk ne’ebé UPF kaptura, komunidade hirak ne’e maioria halo transaksaun ilegál iha liña fronteira.

Jornalista: Rogério Pereira Cárceres