Hatutan.com, (19 Jullu 2022), Díli—Iha Sorumutuk Estraordináriu, horiseik, Konsellu Ministru (KM) aprova ona Tetu Agregadu orsamentu Administrasaun Sentrál iha Orsamentu Jerál Estadu (OJE) 2023 ho montante totál billiaun $1,8. Montante ne’e hetan redusaun 18% ka millaun $390 kompara ho OJE 2022.

Auditoria Nasionál Kay Rala Xanana Gusmão, Ministériu Finansas Aitarak Laran. Foto/Média MF.

“Tetu Agregadu billiaun $1,8 ne’e esklui Fundu Kombatentes Libertasaun Nasionál (FKLN) billiaun $1, Orsamentu Seguransa Sosiál millaun $235,7 no RAEOA millaun $120,” Hatutan.com sita komunikadu.

Lee Mós: Governu Hahú Diskute Jornada Planeamentu OJE 2023

Totál Despeza Globál ba OJE 2023 mak billiaun $3,15. Montante ne’e inklui ona orsamentu Administrasaun Sentrál, FKLN, Seguransa Sosiál no RAEOA no hanesan ho montante Despeza Globál iha Lei das Grandes Opções do Plano 2023 ne’ebé mak Prezidente Repúblika, José Ramos-Horta promulga ona iha fulan kotuk.

Advertisement

Orsamentu ne’e sei uza hodi finansia Programa 45 liuhosi medidas ka atividades prinsipál 275, organizadu iha área estratéjiku 16 ne’ebé Governu sei foku ba iha tinan oin: Agrikultura, Pekuária, Peskas no Floresta; Ekonomia no Empregu; Turizmu; Dezenvolvimentu Rural no Abitasaun; Ambiente; Petróleu no Minerál; Eletrisidade no Enerjia Renovável; Konektividade Nasionál; Bee no Saneamentu; Edukasaun no Formasaun; Saúde; Inkluzaun no protesaun Sosiál; Kultura no Patrimóniu; Reforma Estadu; Defeza no Seguransa Nasionál; Relasaun Internasionál no Polítika Esterna.

Setór Kapitál Sosiál hetan alokasaun 33%

Distribuisaun Tetu Agregadu orsamentu Administrasaun Sentrál iha OJE 2023 bazeia ba setór importante sira iha Planu Estratéjiku Dezenvolvimentu: Setór Enkuadramentu Institusionál hetan alokasaun 38% tuir kedan ho Kapitál Sosiál 33%, Dezenvolvimentu Infraestrutura 22% no Dezenvolvimentu Ekonómiku 7%.

Ho aprovasaun ne’e, Ministériu Finansas sei fó sai Sirkulár kona-ba Regras Elaborasaun OJE 2023 no Distribui Envelope Fiskál Aprovadu ba Entidades Estadu hamutuk 109 ne’ebé mak hola parte iha Perimetru Orsamentál 2023.

Kalendáriu OJE 2023 tuir Espíritu Lei Enkuadramentu Orsamentál

Advertisement

Ba oin, Konsellu Ministrus mós sei aprova alokasaun Orsamentu tuir Programa no Proposta Projetu Lei (PPL) OJE 2023 no sei konklui ho entrega PPL OJE 2023 ba Parlamentu Nasionál iha fulan-outubru atu hetan aprovasaun molok haruka ba Prezidente Repúblika atu tetu iha tinan ida-ne’e nia rohan.

Kalendáriu ne’e tuir ona espíritu Lei Foun Enkuadramentu Orsamentál ne’ebé mak promulga hosi Prezidente Repúblika Francisco Guterres Lu Olo iha fulan-fevereiru liubá.

Lei estruturante ne’e sai nu’udár baze ida ba Reforma Jestaun Finanseira Públikas iha país ida-ne’e – konkista importante ida ne’ebé mak Oitavu Governu Konstitusionál lideradu hosi Primeiru-Ministru, Jenerál Taur Matan Ruak halo durante nia mandatu.

Jornalista: Rogério Pereira Cárceres

Advertisement