Hatutan.com, (19 Jullu 2022), Díli—Governu liuhosi Sekretária Estadu Peska (SEP), to’o oras ne’e hein hela proposta kona-bá apoiu fini, hosi grupu komunitáriu sira ne’ebé mak durante ne’e haki’ak ikan iha territóriu Timor-Leste.

Sekretária Estadu Peska (SEP), Elídio de Aráujo.

Sekretária Estadu Peska (SEP), Elídio de Aráujo hateten, objetivu sira Oitavu Governu Konstitusionál nian katak, iha 2023 ema hotu-hotu tenke konsumu ikan.

Lee Mós: Jacó Husu MAP Apoia Formasaun ba Produsaun Hahán Ikan-Manurade

Tanba ne’e maka Sekretária Estadu Peska tenke halo asaun no asaun ida ne’e maka iha parte tasi nian, koko tau osan atu bele hola bero, nune’e bele distribui ba grupu peskadór sira.

Advertisement

Iha parte rai-maran, sira koko atu bele dezenvolve ikan ne’ebé mak komunidade sira haki’ak iha bee-midar iha munisipiu sira.

“Governu nia intervensaun maka ne’e, bainhira komunidade halo proposta mai, ita sempre atende sira, ita sempre fó fini ikan ba ita nia komunidade sira. Iha parte seluk mós, hodi diresaun jerál peskas, ajuda sira oinsá mak bele halo hahán ikan, nune’e sira bele prodús rasik hahán ikan, atu fó hán ba ikan ne’ebé mak sira haki’ak,” SEP, Elídio de Aráujo hateten ba Hatutan.com, hafoin partisipa serimónia inísiu konstrusaun edifísiu Biblioteka nasionál iha Hudi-laran, Dili, Tersa (19/07/2022).

Komunidade iha Rai-mate, Suku Asulau-Sare, Postu Administrativu Hatutlia, Munisípiu Ermera ne’ebé haki’ak ikan bee-midar. Foto/Hatutan.com.

Ida ne’e mak SEP halo dadaun, atu bele atínje metas oitavu Governu nian katak, iha 2023 ema hotu-hotu bele konsume kg 10 kada tinan.

Tanba hahán ikan ne’e karun, iha loja ne’e $2 kada kilograma. Entaun, SEP hanorin grupu sira, oinsá bele halo rasik hahán ikan, atu fó ba ikan sira ne’ebé mak sira haki’ak.

Hatán dadus kona-bá grupu komunitáriu hira mak haki’ak ikan iha TL, Elídio ladun fiksa dadus, maibé maioria populasaun iha munisipiu hotu-hotu haki’ak ikan iha bee-midar.

Ezemplu, iha foho Matebian, Cablaque no Ramelau nia hun, ikan bee-midar toman ona iha área ne’ebá.

Advertisement

“Signifika, ikan bee-midár, ita distribui ona ba komunidade sira to’o iha área rurál sira, fó hotu ona,” Elídio de Araújo haktuir.

Molok ne’e, iha orsamentu fundu Covid-19 nian, SEP sosa ona ekipamentu sira peska nian hanesan rede, hodi distribui ba grupu haki’ak ikan sira hamutuk 1.300 no hotu-hotu simu apoiu ne’e.

Tuir planu, Governu liuhosi Sekretária Estadu Peska, sei fahe tán bero hamutuk unidade 110 ba grupu peskadór sira.

Enkuantu iha Orsamentu Jerál Estadu 2021, distribui uluk ona bero hamutuk 38 ba grupu peskadór sira iha parte tasi.

Jornalista: Rogério Pereira Cárceres

Advertisement