Hatutan.com, (20 Jullu 2022), Díli—Governu liu hosi Vise-Ministru Interiór (MI), António Armindo rekoñese katak, problema kona-bá transaksaun ba sasán illegál kontinua buras iha liña fronteira terrestre entre Timor-Leste (TL) ho Repúblika Indonézia (RI), tanba instituisaun Polisia Nasionál Timor-Leste (PNTL) sei menus rekuru umanu.

“Sasán ilegál sira tama ne’e, ida, seguransa ne’ebé mak koloka iha fronteira naturalmente ita nia membru ne’e la to’o. Iha tinan ida ne’e, aumenta tán postu seguransa hanesan daudaun ita inagura ona. Maibé, ita presiza membru ne’ebé sufisiente atu bele koloka ba ne’ebá,” António Armindo hateten hafoin partisipa reuniaun Konsellu Ministru, iha Palásiu Governu, Dili, Kuarta (20/07/2022).

Lee Mós:PNTL Detein Eis Xefe Suku Ida Tanba Fa’an Kuda Ilegál

La’ós ne’e de’it, iha kazu kona-bá sidadaun sira kontinua hatama sasán ilegál ba mai TL ho RI ne’e, tanba nesesidade.

Bainhira komunidade haree katak, iha postu seguransa ne’ebá mak laiha autoridade seguransa ruma, sira sempre abitua ho dalan ne’ebé ilegál.

“Ida ne’e toman ida ne’ebé mak ita nia sidadaun sira halo iha fronteira. Maibé, alende haree ba sira ne’e, ita mós haruka ona ekipa ida destaka ba iha fronteira, atu haree, keta halo ba autoridade seguransa balun mak apoia atividade sira ne’e tama ilegál,” António Armindo hateten.

Maske nune’e, to’o oras ne’e, António Armindo seidauk simu relatóriu ruma hosi autoridade sira mak destakadu iha lutu fronteira, kona-bá saida mak halo ema kontinua hatama sasán ho ilegalmente iha fronteira.

“Ita espera iha tempu badak sei iha relatóriu, atu haree oinsá halo di’ak liután. Mais naturalmente, buat ida ilegál iha ne’ebá, halai liu bá nesesidade komérsiu tanba sidadaun sira ne’ebé hela iha fronteira, moris depende liu bá sasán iha sorin ne’ebé barratu, sira sosa mina mai fa’an fali iha sorin karun oitoan atu bele hetan osan,” nia haktuir.

Preokupa ho Prosesu Legál ba Sidadaun Sira

Vise MI, António Armindo sente preukupa mós ho posesu legál ba sidadaun sira ne’ebé mak durante ne’e komete kazu sira hanessan transaksaun sasán ilegál iha fronteira.

Dala-ruma PNTL-UPF halo tiha kapturasaun, no investiga sidadaun sira, depois submete kedan prosesu ba Ministériu Públiku (MP). Maibé to’o iha ne’ebá, ‘laiha informasaun’ kona-bá finalidade hosi prosesu sira ne’e.

“Ida-ne’e mak mak ami nia preokupasaun hotu. Maibé, ne’e la’ós kompeténsia Ministériu Interior nian, la’ós Polisia nian, la’ós migrasaun nian. Mais ne’e kompeténsia ona iha MP ba Tribunál. Naturalmente, kuandu ita kaptura, polisia halo investigasaun, depois submete ba MP, kuandu ba ida-ne’e, la’ós ami nia kompeténsia ona. Baibain ami ba husu de’it prosesu ne’e to’o ona iha ne’ebé,” nia esplika.

Nia husu ba ministériu relevante sira seluk hanesan Ministériu Koordenadór ba Asuntu Ekonómiku (MKAE), MinistériuTurizmu Komérsiu no Indústria (MTKI) ho Sekretáriu Estadu Kooperativa (SEKOOP), atu buka meiu kooperasaun ida di’ak ho governu RI, nune’e bele estabelese merkadu ruma iha fronteira, hodi fasilita sidadaun sira bele fa’an sasán.

Antes ne’e Komandante Unidade Patrullamentu Fronteira (UPF) Superintendente Polísia, Euclides da Costa Belo hateten, membru UPF destakadu iha fronteira hamutuk 300-resin. 

Jornalista: Rogério Pereira Cárceres