Hatutan.com (21 Jullu 2022) Díli—Tribunál Distritál Díli (TDD), iha Kinta 21 fulan ne’e liu hosi primeiru interrogatóriu ne’ebé prezide hosi juiza singulár Maria Solana, deside aplika medida koasaun aprezentasaun periódika diariamente ba arguidu ho inisiál MP tanba utiliza katana no baku nia feen lezada MS to’o isin bubu, metan no aleza.

Violensia ba Feto. Foto Ilustarasaun Google.

Tribunál esplika arguidu halo aprezentasaun periódika loron-loron iha postu polisia ne’ebé besik ho durasaun tempu másimu fulan ne’e, hodi hein prosesu investigasaun.

Razaun TDD aplika medida koasaun ne’e, tanba iha indisius forte arguidu pratika no involve direta iha krime tolu mak hanesan Sekestru (penculikan), maus tratus no arma branka hasoru nia feen, ho konsekuénsia direta ba lezada sofre kanek, bubu iha isin lolon no hetan tratamentu iha ospitál.

Iha primeiru interrogatóriu ne’e, Ministériu Públiku (MP) ne’ebé reprezenta hosi Prokuradór Hernani Rangel akuza arguidu ba pratika krime Sekestru, Maus Tratus ne’ebé previstu iha artigu 160, 153 hosi kódigu penál no lei arma branka númeru 5/2007.

Antes ne’e, tuir kronolojia ne’ebé iha katak, iha loron 17 fulan ne’e arguidu deskonfia nia feen lezada iha relasaun ho trabalhadór ida iha Korea, tanba lezada sempre simu kontaktu no ko’alia ho ema ne’e ho nune’e arguidu nervozu hodi tebe, tuku no sama lezada ba rai no ikus mai rezulta lezada nia isin lolon hetan kanek, bubu no metan.

Audiénsia julgamentu ba primeiru interrogatóriu ne’e, prezide hosi juiza singulár Maria Solana, MP reprezenta hosi Prokuradór Hernani Rangel no arguidu hetan asisténsia hosi Defensór Públiku (DP) Sérgio Quintas.

Jornalista: Carmelita Isaac