Hatutan.com, (24 Jullu 2022), Díli—Polísia Nasionál Servisu Investigasaun Kriminál (PNSIK), Sábadu (23/07/2022), kumpre mandadu detensaun husi Tribunál hodi detein eis vise-prezidente partidu FRENTI MUDANÇA (P-FM), Egídio de Jesus iha nia rezidénsia iha Taibesi, Díli.

Lee Mós : Horta Husu Frenti-Mudança Kontribui Bá Dezenvolvimentu Nasionál

PNSIK kumpre mandadu detensaun husi Tribunál hodi detein eis vise-prezidente partidu FRENTI MUDANÇA (P-FM), Egídio de Jesus iha nia rezidénsia iha Taibesi, Díli, Sábadu (23/07/2022). Foto/Espesiál

PNSIK halo detensaun bá antigu Sekretáriu Estadu Eletrisidade iha primeiru Governu Konstitusionál ne’e  relasiona ho kazu deskonfiansa abuzu podér, korrupsaun no má-jestaun bá fundu subvensaun partidu nian.   

P-FM rasik iha osan subvensaun husi Estadu purvolta $90,000-liu, maibé osan ne’ebé durante ne’e balun deskonfia  iha má-gastu liu $52,600. Nune’e, kuadru potensiál sira iha P-FM laran halo keixa kontra malu hodi obriga eis Embaixadór Timor-Leste bá Kuba, Egídio de Jesus nia responsabilidade bá gastu ne’ebé la pertense bá partidu nia interese ka partidu nia programa.

Konselleiru P-FM, Cesar Vital Moreira, ne’ebé Hatutan.com, konfirma via telefone, Domingu (24/07/2022), hateten,  keixa hasoru eis Vise Prezidente P-FM ne’e hato’o duni husi internal partidu nian relasiona ho gastu bá osan subvensaun husi Estadu bá P-FM ne’ebé prosesu ne’e la’o hela iha Tribunál.

“Keixa ne’e hatama duni husi kuadru P-FM hasoru  Egídio de Jesus, nu’udár fundadór ida husi P-FM no kazu ne’e iha hela Tribunál, ha’u hanoin ne’e osan subvensaun Estadu nian tenke iha ema ruma responsabiliza,” Cesar Moreira haktuir.

Nia dehan, gastu orsamentu subvensaun Estadu bá P-FM ne’e kestaun jestaun internal. Nune’e, tuir Cesar Moreira nia haree katak ne’e problema jestaun no problema komunikasaun husi diresaun bá gastu orsamentu ne’e.

Lee Mós : Ricardo Nheu, Prezidente Partidu Frenti-Mudança períodu 2022-2027

“Ita hanoin katak karik ida-ne’e problema internal P-FM nian, maibé ema ruma tenke responsabilidade, liuliu má-gastu ne’ebé iha no Tribunál sei haree ida-ne’e. Ha’u hanoin difisil liu tan ita dehan se mak sala no se mak loos,” Cesar Moreira hateten.

Informasaun ne’ebé Cesar Moreira nu’udár Konselleiru P-FM iha koñesimentu katak kazu ne’e eis Sekretáriu Jerál P-FM atuál Prezidente P-FM, Ricardo Cardoso Nheu mak halo keixa. Nune’e, sira na’in-rua sei bá hatán tuir argumentu no faktu sira ne’ebé sira rasik konsidera hanesan má-gastu.

Família sira tanis hakuak eis vise-prezidente partidu FRENTI MUDANÇA (P-FM), Egídio de Jesus, bainhira PNSIK halo detensaun iha nia rezidénsia iha Taibesi, Díli, Sabádu (23/07/2022). Foto/Espesiál

Cesar Moreira hateten, iha situasaun ne’e Egídio de Jesus hetan ona detensaun no parte seluk bele hamnasa, mas di’ak liu hotu-hotu tenke haree situasaun ne’e ho kuidadu atu partidu la bele iha problema.  

“Ita sira bele hamnasa, mas partidu sei tanis. Ha’u ko’alia beibeik iha internal katak kuandu Egídio de Jesus utiliza osan ne’e bá nia interese pesoál buat seluk, mas nia uza mós bá atividade no programa partidu nian, relatóriu sei iha no Comissão Nacional  Eleições (CNE) rasik mós iha relatóriu,”  Cesar esplika.  

Bá partidu nia di’ak, Cesar Moreira hateten, tuir loos tenke iha komunikasaun di’ak atu la bele iha konsekuénsia legal no konsekuénsia polítika  bá partidu. Tanba grupu sira ne’ebé konsidera hanesan poténsia bá partidu mak halo malu nune’e no sira ida-idak iha nia ema bele retira husi partidu no sei ladún di’ak bá imajen partidu nian no at liután bele prejudika partidu tuir eleisaun 2023.

To’o notísia ne’e publika seidauk hetan konfirmasaun husi atuál prezidente P-FM, Ricardo Cardoso Nheu tanba tuir informasaun ne’ebé iha katak eis Sekretáriu Jerál P-FM ne’e foin to’o hikas iha Timor hafoin liu loron balun halo viajen bá rai li’ur.  

Jornalista : Vito Salvador