Hatutan.com, (25 Jullu 2022), Díli—Desde tinan 2002 to’o tinan 2022, Comissão Função Pública (CFP) ho Ministériu Saúde (MS) rekruta ona profisionál saúde na’in 5.525.

Serimonia Asinatura Termu Aseitasaun ba Rekrutamentu Públiku Professionál Saúde kategoria Emfermeiru no enfermeira Junior ho Parteira Junior na’in 24, iha Salaun Palásiu das Cinzas, Caicoli, Díli, Segunda (25/07/2022). Foto/Média MS.

Profisionál saúde hirak ne’e kompostu hosi rejime jerál na’in 1.261 no rejime karreira profisionál na’in  4.264 ne’ebé distribui ba iha médiku espesialista na’in 101, médiku jerál na’in 962, médiku dentista na’in-ualu, enfermeiru jerál na’in 1.428, parteira na’in 678 no tékniku aliadu (TDTSP) na’in 855 no asistente enfermeiru na’in 232.

Lee Mós: Ministériu Saúde Kontinua Tau Prioridade ba Saúde Inan ho Oan

“Parte esensiál seluk maka dezenvolvimentu ba rekursu umanu ba saúde ne’ebé adekuadu, forte no profisionál, halo kolokasaun, re-kolokasaun, destakamentu no distribuisaun ida ne’ebé adekuadu no ekuitativu ba profisionál saúde sira to’o iha nível estabelesimentu saúde, ospitál, sentru saúde no postu saúde, liuhosi ingresu iha Rejime Karreira Espesiál,” Vise-Ministru Saúde, Bonifácio Mau Coli dos Reis fó-sai dadus ne’e bainhira hamutuk ho Inspetora CFP, Sónia da Silva Freitas hala’o Serimonia Asinatura Termu Aseitasaun ba Rekrutamentu Públiku Professionál Saúde kategoria Emfermeiru no enfermeira Junior ho Parteira Junior na’in 24, iha Salaun Palásiu das Cinzas, Caicoli, Díli, Segunda (25/07/2022).

Bazeia ba Decreto-Lei n.º 22/2011, de 8 de junho, Primeira Alteração ao Decreto-Lei n.º 34/2008, de 27 de agosto no Decreto-Lei n.º 44/2011, de 24 de setembro, Segunda Alteração ao Decreto-Lei n.º 34/2008, de 27 de Agosto, kona-bá Regime dos Concursos, Recrutamento, Seleção e Promoção do Pessoal para a Administração Pública; Lei ne’e fó dalan ba Ministériu Saúde atu servisu hamutuk ho CFP ba iha prosesu selesaun no rekrutamentu ba profissionál saúde sira hotu ne’ebé integra iha sistema nasionál saúde liuhosi estabelesimentu ekipa juri.

Prosesu ne’e tomak liuhosi faze hahú hosi proposta hosi Ministériu Saúde, ne’ebé hato’o ba CFP, anunsiu ba vaga, submisaun ba dokumentus, avaliasaun no verifikasaun ba dokumentu.

Anunsiu rezultadu selesaun dokumentu, teste ba kandidatu sira-ne’ebé kumpri rekizitus ba selesaun dokumentu, anunsiu teste no ezultadu hodi hato’o ba CFP atu halo omologasaun.

Lia-menon ba Rekrutadu Na’in-24

Profesionál saúde sira ne’ebé ohin simu termo de aceitação sei enkuadra tuir Decreto-Lei N.o 13/2012 de 7 de Março kona-bá Regime das Carreiras dos Profissionais Saúde ne’ebé iha Aneksu II no III. Respetivamente define Estatutu Karreira Enfermajen no Karreira Parteira.

“Ha’u enkoraza ita boot-sira atu lee Dekretu-lei ida-ne’e ho didi’ak hodi komprende ninia konteúdu. Sira ne’ebé ohin simu Termo de Aceitação nu’udár profisionál saúde ne’ebé sei liga diretamente ho pasiente iha Kuidadus Prestasaun Saúde nian (Primários no Hospitalares) tuir ida-idak nia área espesializasaun enfermeiru no parteira,” Vise Ministru ne’e enkoraza.

Enfermeiru sira sei koloka bazeia ba kategoria enfermeiru jerál, nível juniór grau A, eskalaun 1 no ba parteira sira sei tama iha kategoria parteira profisionál, nível juniór grau A eskalaun 1. Iha Dekretu ne’e klaru tiha ona hodi define sira nia respetiva nível salariál.

Ministériu Saúde nia papél maka asegura no fortifika Sistema Nasionál Saúde iha nível hotu ba Estabelesimentu Kuidadus Prestasaun Saúde, hanesan ospitál nasionál, rejionál, munisipál, sentru saúde, postu saúde, SISCa no Saúde na Familia. Estabelesimentu sira ne’e hotu mak hamutuk sei hatudu dezempeñu prestasaun saúde.

Parte Ministériu iha esperansa boot katak profisionalizmu nu’udár funsionáriu servidór ninia kompromisu, dedikasaun nian ne’ebé sei koloka ka destaka hodi presta servisu iha nível hotu-hotu fó prestasaun direta ba komunidade iha Hospital Nacional Guido Valadares, Hospitais Referéncia, Sentru Saúde no Postu Saúde, tenke kaer metin prinsipiu hodi tau interese nasaun as liu ba iha interese partikular no privadu sira hotu.

Vise Ministru husu atu hatudu integridade, inisiativa, responsabilidade, onestidade, kompromisu, respeitu, lealdade, konfidensialidade, auto-disiplina, reziliénsia no perseveransa.

Jornalista: Rogério Pereira Carceres