Hatutan.com, (27 Jullu 2022), Díli-Ró Lusitania no ró Kay Rala Xanana to’o oras ne’e seidauk halo manutensaun. Nune’e, mós ró nia dokumentu sira inválidu.  

Ró Lucitania. Foto/Hatutan.com

Informasaun ne’ebé Hatutan.com asesu husi fonte oioin iha Unidade Polísia Marítima (UPM) katak ró rua ne’e tenke “urjentemente” halo manutensaun ona.  Se lae, iha loron ruma ró rua ne’e bele soe de’it  ka dezmantela tiha de’it  hanesan mós ho kondisaun ró NRTL Camnasa husi Komponente Naval FALINTIL-Forsa Defeza Timor Leste (F-FDTL).

Iha tinan ne’e nia laran, UPM rasik submete ona proposta  orsamentu bá Komandu Jerál PNTL atu bele halo manutensaun bá ró Lusitania no ró Kay Rala Xanana. Iha proposta ne’e, kontein orsamentu manutensaun nian bá kada ró ho kustu entre $250,000-$400,000.

Husi estudu tékniku balun katak bainhira Timor iha rasik nia docking hodi halo manutensaun bá ró sira Timor nian, maka sei la gasta orsamentu boot. Maibé tanba Timor rasik seidauk iha baze docking ró nian, hakarak ka lakohi, tenke lori bá halo manutensaun iha Bali ka Surabaya-Indonézia.  Nune’e, bele kobre kustu orsamentu boot bá kada ró ho modelu hanesan ró Lusitania no ró Kay Rala Xanana purvolta $500,000 kada ró.

Komandante Jerál Polísia Nasionál Timor-Leste (PNTL), Komisáriu Faustino da Costa, rekoñese katak, to’o oras ne’e, ró Lusitania ho ró Kay Rala Xanana ne’ebé koloka bá iha Unidade Polísia Marítima (UPM) seidauk halo manutensaun, tanba seidauk iha docking atu hadi’a ka halo manutensaun bá ró sira.

“Loos duni, durante ne’e manutensaun la halo, tanba ita Timor-Leste, laiha docking. Dala ida tan, Timor-Leste ita seidauk iha docking, fatin para hi’it sa’e  husi tasi laran mai rai maran atu halo manutensaun,” Komisáriu Polisia, Faustino da Costa, hateten bá jornalista sira iha kna’ar fatin Kuartél Jerál PNTL, Caicoli, Díli, Tersa (26/07/2022).

Tékniku sira husi UPM no Ministériu Interiór nian  halo hela identifikasaun bá kondisaun sira ró nian, maibé, presiza atu duni harii docking iha Timor-Leste, nune’e bele fasilita tékniku sira halo manutensaun bá ró rua iha UPM ne’e.

Ró Kay Rala Xanana. Foto/Espesiál

Tuir informasaun hosi tékniku sira ró nian katak, masin iha tasi-been TL nian maka’as tebes, no ikus mai provoka hodi halo sipu ruin barak mak moris to’o bele belit iha ró nia lolon.

Bainhira sipu ruin barak moris no belit iha ró nia lolon parte li’ur, difisil bá tékniku sira atu hamoos, tanba ró para de’it iha tasi-laran. Entaun, solusaun bá ida ne’e, tenke hasai ró bá rai-maran, ho ninia meiu maka tenke docking iha Timor-Leste.

Komandu PNTL mós durante ne’e rona informasaun katak, iha kompañia privadu ida iha TL mak oras ne’e hakarak atu kria kondisaun docking hodi solusiona problema bá ró Lusitania ho Kay Rala, inklui mós ró seluk tán.

“Espera katak, ida ne’e bele realiza iha futuru, tanba PNTL presiza duni situasaun ida-ne’e para bele hadi’a ró ne’e,” Komisáriu Faustino da Costa tenik.

Hatán kona-bá dokumentu sira bá ró rua ne’e nian mós inválidu ona, Komisáriu Faustino dehan, kestaun ne’e la’ós ró ninia dokumentu de’it, maibé mós ró sira ne’e halo movimentu de’it tasi TL nian.

“Agora, la’ós ró rua ne’e mesak, mais ida ne’ebé ita ko’alia kona-bá oinsá ita mobiliza ró sira ne’e sai hosi TL tanba dokumentu kuaze inválidu hotu,” komandante Faustino preokupa.

Jornalista: Rogério Pereira Cárceres