Hatutan.com, (26 Jullu 2022), Díli—Polísia Nasionál Timor-Leste (PNTL), liuhosi Unidade Tránzitu ho Seguransa Rodoviária, prefere oráriu sirkulasaun ba kontentór bele sirkula de’it iha tempu kalan, nune’e tenke halo alterasaun ba despaixu ne’ebé Governu f­ó-sai ona atu bele fó biban ba PNTL, hodi halo kontrolu iha sidade.

Sirkulasaun kontentór iha sidade Díli, Tersa (26/07/2022). Foto/Hatutan.com.

Komandante Polísia Tránzitu Munisípiu Díli, Inspetór Polísia, Domingos Sarmento Gama dehan, despaixu hosi Ministériu Transporte no Komunikasaun (MTK), Ministériu Interiór (MI) haktuir katak, sirkulasaun ba kontentór sira, tenke kumpri ba oráriu ne’ebé estebelese ona.

Lee Mós:Tránzitu Hein Hela Na’in ba Patrimóniu Estadu Ne’ebé Prende Iha Fim de Semana

Oráriu sirkulasaun ba kontentór sira-ne’e, hahú iha tuku 19:00 kalan, to’o 06:30 dadeer madrugada. Hosi tuku 07:00 dadersan ba leten, labele halai. Sei sirkula fali iha tuku 09:00 dadeer, to’o iha 11:45, sira tenke para. Hafoin ida ne’e, sei halai fali iha tuku 14:00 to’o 17:00, oras lorokraik. Nune’e, sei hahú fali sirkulasaun iha tuku 19:00 kalan, to’o fali 06:00 dader madrugada.

Advertisement

“Maibé, tuir planu, iha tempu besik, MTK ho MI sei tuur hamutuk hodi halo fali alterasaun ba oráriu anteriór ne’ebé mak estabelese ona,” Domingos Sarmento Gama, hateten iah Díli, Tersa (26/07/2022).

Tuir oráriu ne’ebé iha ona, PNTL labele bandu totalmente atu labele halo sirkulasaun, la loos. Bainhira iha fali mudansa ruma ba oráriu ne’e, sé enkuantu despaixu ne’e iha ona alterasaun.

“Tuir informasaun ne’ebé ha’u rona hosi diretór jerál MTK, Gaspár de Aarújo katak, iha tempu badak tuur hamutuk atu halo alterasaun. Ha’u nia rekomendasaun ba Ministériu rua katak, sé bele alterasaun ida-ne’e muda atividade sirkulasaun ba kontentór sira ne’e, bele karik, kalan de’it, nune’e ita bele fásil kontrola,” nia hateten.

Bainhira desizaun sira ba alterasaun oráriu ne’e mak la akontese, maka sei laiha nia efesiénsia ba membru PNTL sira atu halo kontrolu ho másimu iha terrenu, ikus mai nafatin akontese engarafamentu nomós asidente iha fati-fatin.

Maski nune’e, Unidade Tránzitu ho Seguransa Rodoviária, sempre prontu atu ezekuta órden iha terrenu, tuir lei no rezolusaun sira ne’ebé mak estabelese hosi governu.

Advertisement

Durante ne’e PNTL halo observasaun, sirkulasaun kontentór sira ne’e hatudu katak, iha kondutór balun kumpri, maibé motorista balun bainhira haree polisia laiha, sira sempre viola oráriu ba sirkulasaun nian.

“Maibé ita nia ema, ita hatene, malandru ne’e barak loos, ne’ebé dala-ruma sira haree polisia laiha ne’e, sira bele na’ok oras ida ne’ebé tuir loloos sira labele halo sirkulasaun. Mais ami prende tuir lei kódigu estrada ne’ebé mak iha,” Komandante Domingos hateten.

Jornalista: Rogério Pereira Cárceres

Advertisement